傘運片爭最佳電影導演《亂世備忘》報名金像獎
1 :
GS(14)@2016-11-29 07:55:29新晉導演陳梓桓拍攝有關雨傘運動的電影《亂世備忘》，雖然未能夠在剛舉行的台灣金馬獎最佳紀錄片獎中獲獎，不過《亂》片已報名明年的香港電影金像獎。陳梓桓昨日接受訪問時，他說：「因為已經播咗足夠場數，所以金像獎方面都問我哋會唔會報名。已經報咗新晉導演、（最佳）電影同啲剪輯嘅技術獎。」他表示《亂》片前日在筲箕灣L CINEMA上映一場，只有80多個座位一早爆滿，希望在下個月有機會加開幾場。而憑電影《一念無明》贏得金馬最佳新導演獎的本港導演黃進，亦準備為電影報名金像獎。雖然《一》片仍未正式在港上映，但已播足優先場數符合報名資格，黃進昨日接受電話訪問時表示：「發行商應該會幫我報出年嘅金像獎，下個月1至7日嘅優先場，聽聞已經好爆，應該仲會加場。」
黃進冇諗過攞獎
日前導演黃進在金馬獎頒獎台向女友示愛的感言：「劇本係電影嘅靈魂，而你就係我嘅靈魂！」不只令台下女友陳楚珩哭成淚人，更贏到不少網民支持，黃進透露由始至終沒有預備講稿，他說：「因為冇諗過會贏，所以喺台下一直好輕鬆，直到宣佈得獎個人就變得好亂，上台講嘢都好亂，最後將當日寫喺facebook嘅status講咗出嚟。」他亦希望感言可以令多點人重視編劇這個崗位，同時金馬獎座減輕再獲獎壓力：「而家係好好嘅時候，因為冇諗過攞獎，而家有咗金馬呢個bonus，令自己可以有多啲空間。」採訪：何永寧
■傘運電影《亂世備忘》的導演陳梓桓，已報名明年的金像獎。劇照
■（左起）《一》片編劇陳楚珩、導演黃進、金燕玲等上周奪金馬獎。
■金燕玲和余文樂在《一念無明》演母子。劇照
來源:
http://hk.apple.nextmedia.com/entertainment/art/20161129/19848439
【唱好K】飛圖卡拉OK導演 唔想畫面係行行企企
1 :
GS(14)@2016-11-29 07:56:07蔡錦源解釋飛圖最初要向唱片公司買版權再製作卡拉OK，所以不會有原唱者演出，甚至要找人代唱。
飛圖，我細細個就聽過呢個名。偶爾去唱K點番飛圖出品，都係為啖笑。笑甚麼？笑畫面老土，笑女演員總是行來行去，行去又行來；笑啲男演員大部分表情浮誇，又太chok。90年代初曾經「秘撈」為飛圖導演幾十首卡拉OK的蔡錦源笑說：「因為最初只係想有畫面，啲人對字幕唱歌，畫面播乜根本沒人理。」他曾任港視、無綫及亞視編導，笑謂當年為賺錢接飛圖的卡拉OK拍攝工作，不過雖然為錢，他也希望「好玩」，為畫面加入故事性。「度啲情節比演員，唔想咁悶，如果來來去去嗰啲鏡頭，我剪接都唔知點剪。」
當年飛圖一隻卡拉OK LD鐳射碟，28首歌賣成$800一隻，銷量仲要過萬，出一隻身家即暴漲幾百萬。老闆葉志銘，也就是葉玉卿的哥哥十分識做，借到海外取景為名，請員工去遊埠為實，所以後來很多飛圖出品都有外景風光，包括法國、荷蘭、希臘、紐西蘭、泰國等，創了海外取景卡拉OK的先河。「葉生希望當bonus，請一齊做嘢嘅人去玩，甚至我太太，佢都請埋去玩。」葉志銘雖然出名惡，但從來沒罵過蔡錦源，還對他很客氣，幾近有求必應。「葉生好豪爽，同我哋出去拍嘢，我話『如果拍這首歌，有架車就好了』，結果佢搵咗架勞斯萊斯。開蓬勞斯萊斯！你唔拍長啲，都對唔住自己。」雖然話係遊埠，攝製隊一樣無偷懶，一日拍足四五首歌。蔡錦源仲會趁機為日後的卡拉OK拍定一些「萬能key」。「邊個演員得閒，就叫佢俾啲mood，俾啲感情我，反正啲歌都係關於愛情，實啱用。有次試過叫一個笑得好靚的女演員在景點笑笑笑，我哋拍拍拍一堆鏡頭，嗰刻唔知拍乜o架，但需要笑臉時就拿出來剪。」飛圖撈得風生水起，唱片公司發現卡拉OK有利可圖，於是自行為歌手製作，飛圖要「第二手」才得到版權，所以轉型與歌手簽約。憑一首《像霧像雨又像風》唱到街知巷聞的梁雁翎，可謂飛圖一姐，其實佢係飛圖老闆之一，蔡錦源對佢好欣賞。「我哋一齊出外景，佢比我哋仲忙，佢會為其他演員化妝整頭髮，拍攝需要甚麼，佢都會立刻幫我哋跟進。」飛圖後來幫張智霖、許秋怡拍攝獨家卡拉OK《現代愛情故事》，也力捧趙學而，但其他卡拉OK大多剪接過去舊片，新出的影碟開始翻炒舊歌。飛圖發展後來走下坡，加上盜版猖獗，於是賣股權予楊受成，葉志銘從此淡出卡拉OK及唱片界。記者：葉青霞攝影：劉永發
飛圖卡拉OK LD鐳射碟，初期推出的影像大多由主角行行企企shot堆砌而成，索價$800一隻，一樣好銷量。
即使是外籍模特兒一樣是在港先試鏡再錄用，再跟香港的工作人員一起飛到當地，可見製作費之高。圖右為蔡錦源。
來源:
http://hk.apple.nextmedia.com/su ... t/20161129/19848610
【我主場】憑《一念無明》膺金馬最佳新導演黃進拍到鬱結 女友愛相隨
1 :
GS(14)@2016-12-06 03:56:20■黃進和編劇女友陳楚珩合作拍攝《一念無明》，成績獲金馬獎肯定。攝影：沈健程
第53屆台灣金馬獎曲終人散，亮點是黃進憑《一念無明》奪得最佳新導演時，在台上以「劇本是電影的靈魂，而你就是我的靈魂」向台下哭成淚人的編劇女友陳楚珩示愛。日前二人在尖沙嘴接受本報訪問，陳楚珩以「非人類說得出口」來形容男友的得獎感受。原來黃進拍片期間曾出現情緒鬱結，幸獲女友陪伴熬過。
浪漫話日日講
對於金馬獎台上的言論被指是公開示愛，黃進笑言是美麗的誤會：「其實嗰日我冇諗過會贏，所以冇準備講稿，你見我連屋企人都冇多謝就知，我只係重複番頒獎禮當日寫喺facebook嘅狀況。」不過這句情深對話，卻打動了女友和觀眾。在旁的陳楚珩雖然冷靜地指「佢講嘅都唔係人類講得出口」，但分明是想掩飾內心的興奮，她說：「佢每日都會講，有時會話如果人生冇咗我佢會死，因為佢覺得人生已經冇其他意義，佢經常講啲好哲理性嘅浪漫說話。」又解釋在頒獎禮台下哭，主因是男友辛勞獲得回報：「我而家都想喊。」《一》片獲政府的「首部劇情電影計劃」200萬撥款，之後的拍攝等問題都要兼顧處理，要在有限時間內完成，加上電影本身沉鬱的氣氛，令黃進不能抽離，出現情緒鬱結。黃進回想當時情況說：「拍完之後情緒好波動，頭幾個月剪唔到片，因為心情依然係太沉重。」陳楚珩陪他熬過這段日子：「帶佢去旅行呀，煮吓飯畀佢食呀，都係蒸魚、炒蜆、蝦同埋煲湯囉，佢好鍾意食海鮮，其實都係陪住佢。」
■《一念無明》故事氣氛沉鬱，令導演黃進不能抽離。劇照
■黃進捧金馬獎時，在台上向女友（右圖）發表「你就是我的靈魂」言論，令女友爆喊。資料圖片
資料圖片
■黃進十分珍惜女友，認為彼此能夠互相啟發一起成長。
籌拍人性新片
黃進和陳楚珩一起讀書，參加社運、拍攝長片、行紅地毯，差不多24小時形影不離，除像一般情侶會逛街、看電影，他們都喜歡討論，黃進說：「真正健康嘅關係，就係能夠互相啟發，可能會有爭拗，但衝擊會令大家一齊成長。」並強調十分珍惜這段關係：「其實同一個拍戲嘅人做男、女朋友好辛苦，工作嘅消耗同佔據生活太多，如果唔係一齊相信呢件事嘅話，好難一齊相處。」他們已開始籌備新一齣電影，題材仍離不開探討人性，因為對社會關注，正是他們拍電影的初衷。採訪：何永寧場地提供：Cafe Hillywood
來源:
http://hk.apple.nextmedia.com/entertainment/art/20161205/19854946
被指唔識做Show《勁歌》導演Jacky FB爆seed！
1 :
GS(14)@2017-01-09 08:11:30《勁歌金曲》頒獎禮係樂壇最後一張成績表，前晚20首金曲，仲有男/女歌手及金曲金獎全部頒晒，係咪心水都唔緊要，但總算係太公分豬肉，人人有份皆大歡喜。不過，原來幕後仲有小風波，話說完咗頒獎禮之後，《勁歌》導演Jacky Lee(李志倫)突然係網上爆seed，留言﹕「成世人第一次俾人話我唔識做Show......全世界得你識做Show囉東方不敗。」Jacky未有開名，但就氣憤難平，不久又開第二個post讚狄易達係台上多謝佢﹕「開心事！估唔到你真係多謝我唔圈你......恭喜你達仔。」似乎受咗啲委屈喎。其實前晚前前後後頒咗差唔多40個獎，好多得獎者未開口已經畀人圈，就連攞「最受歡迎男歌星」嘅張敬軒講咗一句已畀人圈，仲畀C君寸﹕「咁你可唔可以報埋新聞同天氣報告？！」達仔冇畀人圈又真係好難得。之後Jacky再鬧得明顯啲，佢話﹕「阿勁大籮既西門吹雪、其實你知唔知我做過D乜架！3000隻MV、200個廣告、50部音樂電影、兩次十大廣告、400場演唱會包括3000萬製作既Show、仲有4部電影包括有王家衞五億部《擺渡人》呀。你呢X，你唔識我不如你Google吓Jacky導演或ConceptX啦。FB神請幫我Like爆呢個Post(拜托手勢).....因為今次大台青蛙太過份了.....真心着火。」好多人都想知「大台青蛙」究竟係邊個？Bob(林盛斌)都忍唔住要問，Jacky回覆話﹕「Bob神！係冷如冰、寒如雪既劍客！Simon吹雪。」雖然最終都係冇開名，但Jacky所講嘅西門吹雪係邊個呢？Jacky就貼埋圖，正正就係《大內密探零零發》入面嘅西門吹雪，而睇番啲大台幕後嘅相，今次《勁歌》總選監製麥鎮東，同《零零發》嘅西門吹雪髮型都有幾分相似，係唔係講佢呢？今次Jacky仲要畀人鬧唔識做show，當然氣難下.......但講講下，又真係幾似無綫金牌監製邵麗瓊筆下嘅《愛．回家之八時入席》劇情，電視台由上而下卸膊文化係真實中呈現。
來源:
http://hk.apple.nextmedia.com/entertainment/art/20170109/19891263
【同期猛人】杜琪峯屢獲最佳導演獎
1 :
GS(14)@2017-01-14 07:54:30李國麟75年於無綫第4期電視藝員訓練班畢業，同期同學猛人輩出，包括杜琪峯、劉仕裕、黃杏秀及潘嘉德等。
杜琪峯
曾在無綫劇《民間傳奇》和《少年十五二十時》演出，後轉投幕後。離開無綫後執導《槍火》和《黑社會》等電影，並多次奪得香港電影金像獎及金馬獎最佳導演。
劉仕裕
在《民間傳奇》演衙差和家丁。擅拍鄉土色彩劇集，包括《情濃大地》、《茶是故鄉濃》和《酒是故鄉醇》等，《西遊記》和《火玫瑰》也是其代表作，十多年前離無綫北上發展。
潘嘉德
無綫金牌監製，作品包括《卡拉屋企》、《刑事偵緝檔案》系列、《鑑證實錄》系列、《衝上雲霄》和《On Call36小時》等。
黃杏秀
一出道受無綫力捧，經典劇包括《絕代雙驕》和《天龍八部》（圖）等，她於《風雲》中被吳孟達強姦戲曾哄動全城。80年代尾秀姑淡出娛圈做陳百祥背後女人。
來源:
http://hk.apple.nextmedia.com/entertainment/art/20170113/19894825
Next Page