萬南 二五中環 股東冇錢賺 惟有食番餐
1 :
GS(14)@2016-05-22 14:04:38http://www.metrohk.com.hk/index.php?cmd=detail&id=309725&search=1
萬南去過唔少股東大會，小股東普遍為咗食餐好，有啲公司仲可以又食又拎，不過地產股會德豐(020)今個星期開會，有股東向主席吳宗權(圖)投訴自己獲兩個人授權出席，點解唔可以拎兩份點心券，當場考起男神，要勞煩員工幫忙應對。
萬邦投資擺幾圍任食
萬南知道有唔少年長小股民覺得炒股賺唔到錢，轉為食指大動，吼實邊間上市公司比較有良心，股東大會供應美食就情願長揸，實行化悲憤為食量，入到股東大會就衝去自助餐枱搶食，試過搞到情況甚為混亂，於是有公司改為派食物券。綜合大眾意見，公認萬邦投資(158)最豪，喺酒家擺幾圍慢慢任食。
至於一啲五、六線公司，唔單止股價表現不似預期，仲要孤寒到唔提供食物，股東自然向管理層開火，點知管理層又十問九唔應，逐漸換來好少人出席股東大會，更甚搞到流會。最近三三傳媒(8087)喺西營盤某酒店舉行股東大會，就因不足法定人數兩名股東出席被迫流會，要擇日重開，唔知又關唔關食物質素事呢？
萬南 二五中環 銘源股東會 騎呢鬧雙胞
1 :
GS(14)@2016-05-22 14:05:16http://www.metrohk.com.hk/index.php?cmd=detail&id=309725&search=1\
講開股東會，講多單花生指數極高嘅事畀大家知，因為股東爭拗而停牌超過一年嘅銘源醫療(233)，最近將鬥爭行動升級，其中爭拗一方嘅老闆，係有廉署剋星之稱嘅林炳昌(圖)，雖然佢仲未坐董事局，但律師出身嘅佢入稟鉻源註冊地百慕達最高法院，獲授權今日(星期五)喺北角召開股東大會。
不過仍控制銘源嘅另一方卻有奇招，宣布今日同一時間喺西環舉行股東大會，實行各有各開，搞到小股東立立亂，唔知邊方先至係堅的。林炳昌再告去法庭，獲判西環股東會無效，又炮轟港交所坐視不理，吸睛度極高，帶動花生期貨價亦急升。
萬南 二五中環 卓悅總部開張增資源拓電商
1 :
GS(14)@2016-06-06 01:41:01http://www.metrohk.com.hk/index.php?cmd=detail&id=310875&search=1
萬南認識卓悅(653)老闆葉俊亨接近廿年，當時佢哋辦公室係租咗九龍塘金巴倫道一幢兩層高獨立屋，面積大約3千零呎，隔籬左右有唔少時鐘別墅，感覺都幾特別，記得萬南當年問過葉老闆點解揀呢度，佢話方便出旺角巡舖。卓悅上市後地方唔夠用，後來轉租土瓜灣全幢寫字樓，之後分店開完一間又一間，不斷招聘人手，好快又坐到密麻麻。
年幾之前，卓悅扑鎚4億幾買荃灣全幢工廈，改裝為超過22萬呎嘅自置總部，計起嚟每呎只係2千蚊鬆啲，剩計地價都平到笑。今個星期新總部正式揭幕(圖)，除咗有大批代言藝人明星捧場外，更有唔少財金猛人出席剪綵，包括玩具大王蔡志明、金利豐(1031)CEO朱李月華、以及康健國際(3886)行政副主席曹貴子等等。
萬南有幸參觀卓悅新總部，葉生話已經預留一兩層地方，以便將來擴充，暫時租出去收住租先。至於近期零售消費力減，集團亦開始轉型力谷電子商貿，包括早前同支付寶合作搞大型促銷。為咗湊呢個好有潛質嘅部門，老闆決定撥大半層樓畀佢哋大搞，相信好快有滿意成績出嚟。
萬南 二五中環 大孖沙有耐性 等靚價拆飛機
1 :
GS(14)@2016-06-06 01:42:01http://www.metrohk.com.hk/index.php?cmd=detail&id=310875&search=1
香港之前只有中國飛機租賃(1848)專做租飛機生意，今個星期加埋中行(3988)成功分拆嘅中銀航空租賃(2588)仲未夠，跟手輪到國家開發銀行旗下檔飛機租賃準備上市聆訊，有缸湖中人話呢門生意利錢好高，但資本密集，上咗市容易「骨水」買飛機囉。
唔止強國公司鍾意搞呢門新興生意，查實香港好多大孖沙都有沾手，包括超人李嘉誠、世紀城市系(355)老闆羅旭瑞，以及利豐(494)大老闆馮國經都有搞飛機租賃，而馮老闆嘅拍乸更係股神畢菲特。有投行老友話，聽聞已經有行家游說佢哋將公司上市，不過佢哋底子厚，想湊大啲等善價才搞喎。
萬南 二五中環 「振英」闖立會 仲自動當選？
1 :
GS(14)@2016-07-24 17:17:06http://www.metrohk.com.hk/index.php?cmd=detail&id=314803&search=1
呢個欄向來少講政治，主力講金融圈八卦事，但適逢立法會選舉報名期，請容萬南講吓某幾個同金融相關嘅功能組別。首先係金融界，現任議員星爺吳亮星表現麻麻，99巴仙唔尋求連任，由於呢個界別係公司票，據聞協調派中銀香港嘅公司秘書陳振英參選，仲好大機會自動當選喎。
至於代表股佬多嘅金融服務界，現任議員肥佬張華峰應會再砌多一屆，雖然都係行公司票，但C組券商眾多，所以向來有競爭性，尤其舊年大時代之後，好多莊家及有銀仕狂開新證券商，暗手掌握好多票，缸湖傳聞有人近期頻頻拜票，準備報名惡鬥肥佬張，令上屆只險勝6票嘅肥佬有好大壓力。
至於會計界比較簡單，肯肯定Kenneth贏。點解？因為爭取連任嘅梁繼昌，以及已經報名參選嘅陳弘毅(同法律學者同名)，英文名都叫Kenneth。講完爛gag，認真嗰句係陳生喺業界唔多人識，本來非常輸蝕，但盛傳西環非常撐佢，更早喺陳生未宣布去馬之前，已主動向「4大」及「10大」打招呼，或明或暗希望一眾拍檔幫吓手叫夥計支持。會計佬數口精當然識do做信鴿，不過會計界行個人票，相對地有個人意志，高人話要揮低梁繼昌唔容易囉。
萬南 二五中環 Hooters襲港 中環人期待
1 :
GS(14)@2016-07-24 17:17:26http://www.metrohk.com.hk/index.php?cmd=detail&id=314803&search=1
以性感女郎做賣點嘅美式餐廳Hooters，喺中環老蘭嘅本港首間分店裝修得八八九九，照計好快就開張，呢排經過門口都見唔少麻甩仔望吓入面。其實香港有好多金融界精英，以前都喺花旗國浸過鹹水，對Hooters好有感情，而家喺某大上市公司做HR高層嘅A君，話當年去美國讀書，大鄉里出城去Hooters，見到成批美女侍應，塊面竟然紅晒。
之後A君成日幫襯Hooters，十年前知道拉斯維加斯開咗間主題酒店，即刻飛去當地體驗。當佢知道餐廳喺香港開舖，已約齊當年一齊喺美國捱薯仔嘅老友去想當年。佢笑笑口話作為HR行內人，除咗想食飯睇吓女仔，仲好有興趣想知佢哋點樣招聘人才。
萬南 二五中環 最紅富二代曲線報父恩？
1 :
GS(14)@2016-08-07 02:28:14http://www.metrohk.com.hk/index.php?cmd=detail&id=315887&search=1
正當中國首富王建林旗下嘅萬達商業(3699)計劃從港股私有化、並尋求喺A股上市之際，首富之子、被稱為「最紅富二代」嘅王思聰，原來喺資本市場同時有動作。王思聰有份投資嘅創業板股、喺本港經營中高檔餐飲嘅飲食概念(8056)今日就會上市，唔知佢係咪打算將呢間公司嘅餐飲業務，同老竇旗下嘅商場搞合作呢？
根據招股文件，飲食概念配售2億股，相當於公司已發行股份25%，定價$0.45，而早喺2014年底，王思聰全資持有嘅私募基金Prometheus Capital，就已經用3,112萬元買入一批可換股債券，行使後相當於8,088萬股，佔公司上市後10.11%股權，禁售期6個月。堂堂中國首富之子吼隻創板股仔，萬南估佢可能早有部署。
大家諗吓，萬達旗下有成180個商場，面臨網購衝擊下，商場要吸客，以中國人「民以食為天」嘅文化，就梗係要吸引有特色嘅餐飲啦，而飲食概念呢間公司，就正係專注向中高消費能力客戶提供各式佳餚，話唔定上市後會進駐各大萬達商場，如果能夠打入大陸市場，收入分分鐘出現幾何級數增長！
不過以上都係萬南估吓啫，不如睇近啲，又估吓上市儀式有咩人出席好過啦。以王思聰高調嘅作風，話唔定今日會有好多靚女喺交易大堂出沒，話唔定仲會有知名女星撐場現身，大家不妨八一八！
萬南 二五中環 員工宿舍買少見少
1 :
GS(14)@2016-08-07 02:29:02http://www.metrohk.com.hk/index.php?cmd=detail&id=315887&search=1
早兩日睇報紙，發現德昌電機(179)近期連環沽出多個天水圍嘉湖山莊(圖)單位，令萬南好奇點解土炮老牌廠佬會不務正業炒樓呢？於是查吓問股壇百事通，先知原來德昌廿幾年前，用咗兩億向發展商掃入百零個嘉湖山莊單位，一直用作普通員工宿舍，但由於愈來愈多生意北移，宿舍需要減少，於是陸續放售套現，聞說依家只沽剩十零伙嘉湖。
萬南對員工宿舍好有感情，事關在下童年於仍未上市嘅周大福(1929)九龍城員工宿舍生活，記得當年樓下就係金舖，屋企人喺樓下賣金飾，仲要公司包午餐，過時過節大老闆彤叔又醒唔少嘢，屋企慳番唔少生活費。到大咗先知，原來以前好多周大福門市係自置物業，早年興全幢咁買，樓上冇用又怕租畀陌生人打金舖主意，於是益夥計做宿舍。
香港地價咁貴，愈來愈少上市公司提供員工宿舍，有都留畀高層做豪宅居多，普通打工仔宿舍買少見少。反而唔少外資同中資公司，為方便聘請外勞喺香港打工，都會租埋宿舍，其中奧運站一帶屋苑係集中地，有經紀話起碼有幾百個單位租畀大公司，唔怕有租霸。
萬南 二五中環 碎股黨出沒 搵潤啤着數
1 :
GS(14)@2016-08-07 02:29:45http://www.metrohk.com.hk/index.php?cmd=detail&id=315887&search=1
金融界好多叻人，見到實食冇黐牙嘅機會當然唔會錯過，最新例子係華潤啤酒(291)(圖)大折讓供股，由於優先畀碎股超供湊夠一手，於是大批久未出動嘅碎股黨又出嚟玩，以多個名義各持1股，博大霧額外供1,999股。以昨日收市價計，每個戶口輕鬆執6千零蚊，假設每人拆做5個戶口，接近零風險袋3皮嘢。
老友股神M向來食大茶飯，今次都有參與做碎股黨，佢早兩日去合和嘅過戶處，發現九成排隊人士都係搞潤啤供股，工作人員可能知道大家都係供1,999股，費事佢哋問長問短，索性提供模擬支票，畀人照抄寫幾多銀碼。M哥話好多師奶股神都係拎個背心膠袋去過戶處，入面袋滿股票非常疊水，佢仲話佢哋集團式經營，以前靠供碎股搵落唔少。
萬南 二五中環 廖創興第三代 做創投中間人
1 :
GS(14)@2016-08-14 16:40:43http://www.metrohk.com.hk/index.php?cmd=detail&id=316461&search=1
生於大富之家，相信係唔少人嘅夢想，但即使「贏在起跑線」，如果後天唔努力，亦唔代表一定成功。萬南最近認識到廖創興家族第三代成員廖德城(Paul)博士，佢本身係一名IT專家，為家族企業服務，但喺家族持有嘅創興銀行賣盤後，就決定利用自已嘅長處開拓個人事業，仲取得唔錯成就㖭。
廖德城之前喺加拿大攻讀工程物理學，攞到博士學位之後，曾經喺軍工企業做嘢，有機會接觸美國國防部技術，浸咗一排之後，就加入家族嘅創興銀行助拳，主要負責番自己強項資訊科技部門嘅工作。不過，隨着越秀集團喺2014年收購創興銀行，Paul就成立自己嘅公司SMART Social Mind Analytics (Research and Technology) Limited，仲早人一步，喺金融科技(FinTech)同埋大數據(Bigdata)搵到唔少商機。
Paul仲話，離開咗家族公司，令佢有更大空間發展個人事業，所以最近就連創投基金都搞埋，希望利用自己喺銀行業積累嘅經驗同人脈，以中介人身份為初創公司尋求發展資金，亦同時為市場資金尋求合適投資機會。佢仲話，喺美加等地，創投公司獲資助項目嘅成功率往往只有10%，但投資者都唔介意回報低，幾大都畀機會人哋試咗先！睇番香港喺創投方面嘅發展落後人哋一條街，唔知我哋嘅創科局局長，幾時會落實推出講咗好耐嘅創科創投基金呢？
Next Page