萬南 二五中環 新煮意陷 息魔陷阱
1 :
GS(14)@2016-01-24 22:56:33http://www.metrohk.com.hk/index.php?cmd=detail&id=300839&search=1
有睇開本欄，都知萬南頻頻「關注」新煮意(8179)呢間公司，在下唔係同佢哋有仇，相反更不時幫襯旗下酒樓季季紅(圖)食有米豬，記住係去藍地總店，比其他分店好食多多聲。新煮意舊年股價勁插水，依家公司市值跌剩只得兩億，證明股東用腳投票，唔妥佢哋兩單收購同業發記及十八座狗仔粉嘅刁。
新煮意上個月底配股，伸手籌咗2,700萬，以為會用嚟擴展生意啦，點知一個屈尾十，竟然花咗大半呢筆錢炒股，上月底開始密密掃建行(939)，點知一買即跌，愈跌又愈買，最終累積用咗超過1,500萬掃咗3球建行，平均買入價每股$5.02，暫時帳面已經輸咗百零萬，唔知要賣出幾多萬隻有米豬，先賺得番呢筆數。
又或者你會話買建行係大藍籌，現價又有8厘息咁高，相當吸引喎。但萬南依然認為新煮意不務正業，尤其係啱啱先問股東攞錢，要買建行，散戶唔識自己買咩？再講，8厘息係假設今年派息會維持不變，不過舊年內銀生意難撈，盈利能力肯定大不如前，萬南夠膽人頭博芋頭，今年內銀肯定會削減派息，結果買內銀就好似跌入息魔陷阱，最終愈買愈多中伏。
萬南 二五中環 一早沽清人仔 I.T前CFO終平反
1 :
GS(14)@2016-02-09 02:55:30http://www.metrohk.com.hk/index.php?cmd=detail&id=301916&search=1
藍籌股恒隆地產(101)上星期公布咗份麻麻哋嘅業績，全年純利倒退57%賺51億，其中一個原因係人仔貶值，令佢哋出現44億元匯兌虧損。人仔不停咁跌，老實講好多喺內地有資產嘅公司都捱打，相信3月業績期陸續有類似慘輸人仔個案出現。
舊年8月人仔開始跌，I.T(999)率先宣布將12億做開定期嘅人仔斬纜，換番做港幣，造成一次過虧損6千萬兼發盈警，當時被外間鬧爆，仲傳I.T嘅CFO曾慶㓋(Eymon)被祭旗因而下馬。如果而家睇返轉頭，Eymon真係硬食呢單嘢，事關公司決定做人仔定期，早喺佢14年上任前已經開始。
再講，Eymon斬䌫人仔嘅時機，其實靚到無得頂，當時人仔突然單日大幅貶值2%，之後再陰啲陰啲咁跌，相比依家又再跌多咗5%，換句話講已經幫I.T.輸少3球。有熟Eymon朋友話佢為此都走得唔多愉快，不過依家心情平復，仲返咗新工添。
萬南 二五中環 私有化恒地？ 四叔梗No way!
1 :
GS(14)@2016-02-09 02:55:56http://www.metrohk.com.hk/index.php?cmd=detail&id=301916&search=1
呢排有大行出報告，吹四叔李兆基有機會私有化恒地(012)，消息一出即刻股價炒咗上去，但據經常喺大有錢佬身邊田田拍馬屁為生嘅人認為，寫呢份報告嘅分析員一係想搵個理由炒恒地上去，如果係咁就係醒目仔，否則佢只係讀死書計死數嘅人，完全唔明大孖沙嘅心態。
馬屁高手認為，四叔私有化恒地機會係零，因為呢間係佢嘅旗艦，冇咗市值過千億嘅公司，大孖沙會覺得好無面，更加有可能令到佢哋打唔入國際性嘅富豪榜。
話畀大家知，其實好多有錢佬好鍾意睇富豪榜，更會叫秘書儲起呢啲雜誌。馬屁高手仲話四叔就算想私有化，系內仲有大把公司畀佢㨂，總之一定唔係恒地，而呢一個邏輯，亦適用於其他大孖沙，「肯肯定」唔會搞旗艦公司。
萬南 二五中環 「槍手」太認真 純官一頭霧水
1 :
GS(14)@2016-02-29 02:48:06http://www.metrohk.com.hk/index.php?cmd=detail&id=303268&search=1
香港過千間上市公司，每年年報例必要撰寫主席報告，但萬南相信少過百分之一係由主席親自撰寫，通常都交由IR做槍手代筆，所以行文千篇一律，照單執藥，唔少Hea做槍手更認為反正冇乜人會睇，索性攞番舊年份報告出嚟，更新數字同頭尾幾句又循環再用。
正正因為咁嘅原因，上星期有傳媒發現新世界(017)新鮮出爐主席展望，純官以大文豪歌德名句「生命當屬生存者所有，生存的人應為改變時刻做好準備。」於是好奇問純官引用呢句，點知佢一頭霧水，經職員一番提場，先尷尬話唔係佢親自寫，係公關照大約意思搞的。
若果要親自撰寫主席報告嘅大孖沙，一定係恒隆地產(101)主席陳啟宗，每年閉關嘔出來，所以閱讀性最高；紅籌中信(267)主席常振明亦都有鋪執筆癮，更以自己耍家嘅圍棋比喻經營環境。至於細價股之中，包浩斯老闆黃銳林更曾做過老師，寫得一手好文，曾經寫「(本公司)既已跨出第一步便絕無退縮之理，我們志比天高而明乎千里之行始於足下。」可能黃生近年較忙，已搵人代筆居多。
萬南 二五中環 財爺Fin tech 真．貼地
1 :
GS(14)@2016-02-29 02:48:30http://www.metrohk.com.hk/index.php?cmd=detail&id=303268&search=1
財爺曾俊華(圖)新預算案出街，派糖減稅唔再多講，單係佢話鼓勵業界研究Blockchain 技術應用喺金融業，已經夠畀一百個Like佢，證明財爺堅貼地。好多人對Blockchain一頭霧水，呢種技術已經喺比特幣運行咗一段時間，好多投行早已知係好嘢，紛紛搵人開發研究。
簡單啲講，大家現時用信用卡簽帳，簽完之後發卡銀行同商戶所屬嘅銀行都要搞一大輪認證先可以對到條數，交易平均要幾日先可以完成收款，當中耗用不少人力資源從中處理。但如果用Blockchain的話，高手話只需幾粒鐘便可完成交易，銀行慳番好多，屬於破壞性創新，足以推冧好多舊科技。
萬南 二五中環 賓架熱傳 吳亮星唔連任
1 :
GS(14)@2016-02-29 02:49:10http://www.metrohk.com.hk/index.php?cmd=detail&id=303268&search=1
近排出席好多新春酒會，有陣時更要連踩兩場，日日食埋啲咁上下嘅菜式，見幾乎同一班嘅人，講真都有啲悶，好彩我班老友勝在夠八卦，而且收風快，所以日日Keep到有新話題。原來銀行界呢期最新亮點，就係傳緊尊貴嘅立法會議員吳亮星(圖)，今年未必會爭取連任喎。
好多銀行界老友講笑話星爺可能搭得洗頭艇多，講嘢比較無厘頭，有損代表銀行界別嘅專業形象，四圈執位搵人頂上都係好事。銀行界得124票，開銀行或接受存款嘅財仔嘅代表先有得選，所以歷屆都係自動當選居多，聽聞有個業內女叻人都有啲興趣，即將四出食飯傾偈。
萬南 二五中環 獨立屋頻爆竊 速遞保險箱搶生意
1 :
GS(14)@2016-03-07 03:09:33http://www.metrohk.com.hk/index.php?cmd=detail&id=303808&search=1
雖然正月就快過，但新春Gathering依然唔停，萬南早前去咗個有錢佬慈善晚宴，呢啲場合例牌畀人揼心囗，就連在下呢啲小角色都唔放過，乖乖放低一張金牛。其實有兩類公司都鍾意贊助呢啲活動，第一類老闆係慈善活動嘅搞手，唔撐講唔過去；第二類係想賺有銀仕錢嘅公司。
呢晚就有一間幾出名嘅保安公司好醒目，趁機喺會場宣傳佢哋一個新服務，就係24小時速遞保險箱。簡單啲講，即係租一個容量約兩個A4紙咁大嘅保險箱，有需要就電召保安公司送箱上門，當然亦可以去保險庫自取啦，費用大約每年3皮嘢。
或者你會話好多人屋企都有保險箱啦，有乜需要租咁笨呀？其實好多住獨立屋嘅有錢佬好驚屋企被爆竊，以往亦聽唔少屋主出門遠行，屋企被老爆嘅例子，最新鮮滾熱辣苦主係廖創興銀行創辦人之子廖烈英，其山頂大宅剛剛被爆，損失十幾萬古董。萬南亦聽聞有啲賊相當狼死，要脅屋主打開保險箱偷到盡，所以有錢佬聽到有速遞保險箱，唔少都覺得制得過。
萬南 二五中環 上市公司打官司 神父成關鍵
1 :
GS(14)@2016-03-07 03:10:09http://www.metrohk.com.hk/index.php?cmd=detail&id=303808&search=1
近排幾乎每日都有細價股被斬倉暴跌，唔少散戶中伏，加上證監會主席唐家成啱啱講完「市場好多賊」，所以大家好注視企業管冶出咗問題嘅公司。呢頭講完，中國衛生(673)就入稟控告前執董鍾浩，指佢串謀他人，騙取公司控股權，要求法庭判相關交易無效。據聞證監會已密切注視呢單案。
本來呢單茶杯內的風波冇乜好講，上到法庭咪互相攞證據出嚟打囉，但在下八卦所知，今次有啲細節原來關乎內地天主教教會，是否之前同中國衛生簽妥一份交易合約，所以神父將會成為關鍵人物。神父本應助人脫離兇惡，估唔到今次無辜捲入塵世嘅金錢轇轕，惟有是其是非其非解決。
萬南 二五中環 棄醫從商變醫學美容一哥
1 :
GS(14)@2016-03-13 02:05:07http://www.metrohk.com.hk/index.php?cmd=detail&id=304361&search=1
今日上市醫思醫療（2138）名字可能唔多人識，不過佢旗下嘅Dr reborn，相信未幫襯過亦見過佢鋪天蓋地宣傳，數數手指，公司創辦人Eddy鄧志輝同萬南識接近十年，算係見證佢哋公司成長，度恭喜Eddy踏入新一頁，今晚即管玩得開心，第二朝起身要畀多兩錢肉緊幫公司打拼。
萬南同Eddy其實係不打不相識，當年在下代表一位阿太，投訴Eddy公司做醫療手術出錯，要求巨額賠償。通常呢情況都係大家互發律師信往來，點知對方竟要求見面，而且由老闆Eddy親自出馬，向在下解釋阿太的手術其實成功，以及早已同阿太講清楚最多做成點樣。萬南事後盤番阿太，佢粒聲唔出就取消委託，明顯身有屎。
萬南就咁開始同Eddy做成朋友，漸漸發覺佢相當傳奇，當年考入港大讀醫，卻選擇中途輟學做sales搵到第一桶金，輾轉又做老闆搞醫學美容。佢覺得好多人對呢行存有誤解，成日誤以為sales會困客人入黑房迫買療程，幾年前搵成村律師及營銷高手，設計一套行內首創客戶關係系統，客人購買任何預付套票，有7日冷靜期可無條件全額退款；另外若然收到任何負面回應，承諾48小時內有專人處理，7日內進行審查。老實講，如果唔係對公司充滿信心，點敢咁樣倒自己米。
如果以市值計，醫思甫上市已成為醫學美容一哥，不過Eddy唔敢自滿，繼續橫向擴展，除賺女人錢之外，男性市場亦唔放過，為開拓男士脫鬚根療程，索性自己做埋白老鼠，咁先夠說服力咁話喎，而且每朝早仲慳番唔少剃鬚時間?。
萬南 二五中環 獵頭公司靜過鬼
1 :
GS(14)@2016-03-13 02:05:41http://www.metrohk.com.hk/index.php?cmd=detail&id=304361&search=1
老友C係國際級獵頭公司高層，早兩日中環街頭頭岳岳咁行，原來搵緊捐血站邊，萬南笑佢生手主動捐血實有景轟，莫非想趁機驗愛滋病，C君解釋流年不利，風水師傳話有血光之災，所以想捐血擋呢劫。
佢話今年獵頭行業都靜過鬼，生意淡到不得了，大公司搵得獵頭post，抑係勁豬頭骨，抑係要一個打十個先做到，仲要整體package亦唔吸引，但為做生意都焗搵人試下，結果慘食貓麵。C君話呢段冰河時期，起碼要到4月尾各大公司出埋花紅，有人開始起身，音樂椅先有得玩落去。
Next Page