Can Bank：市場供應真的有增加？
1 :
GS(14)@2017-10-22 16:36:19特首林鄭月娥於上周三發表其上任以來首份施政報告，一改前任於立法會內講足兩個鐘，只將重點變演辭，講咗40分鐘就收工。值得一讚係，今次林鄭演辭確實係重點而唔係廢話，無論對佢報告內容係認同與否都好，起碼唔會覺得虛度咗光陰。當然報告內容除開頭對中央政府效忠之外，對於政治着墨不多，但算是大範圍涉足到各項民生問題，起碼在港人最關心的房屋議題上着墨不少，報告中不單有首置盤、白居二、綠置居等，表面上好似有好多現成單位可以供出市場，但實質上有幾多又無提過。上述這些政策真正新供應，是正在興建的公屋（綠置居），以及首置盤，兩項供應不算多，而白居二這些是要有人出才可以有人入的政策。未來以綠置居取代公屋，即係話新公屋只賣不租，取而代之是一系列過渡性租住房屋，包括類似光屋的租住單位；社會房屋共享計劃；未補地價房屋出租以及組合屋等；雖然原有公屋不會變成綠置居，但資助租住房屋過渡化似乎係方向。報告有提到目前75.6萬戶公屋住戶有19%是長者住戶，16%是領取綜援住戶，換言之，在政府眼裏只有約27萬戶是真正有需要長租公屋，即係餘下40幾萬戶有機會有能力從資助市場或普通市場上置業，或會成為新市場需求。
來源:
http://hk.apple.nextmedia.com/financeestate/art/20171017/20185196
Can Bank：新股炒爆四指標
1 :
GS(14)@2017-11-05 15:43:52近期新股市場熱鬧，先有三馬概念的眾安（6060），至於騰訊（700）親生仔閱文（772）仲誇張，散子身邊唔少朋友都孖展成球成球咁入，有唔係炒開股票嘅朋友都孖展五球，大家對閱文掛牌後升幅零懸念。嚟緊焦點新股就係超人概念電競股雷蛇（1337），雖未有盈利，但概念嘅嘢，盈利一向唔係指標，熾熱度相信都唔會太弱。新股短炒一向只睇供求，不過，熱潮幾時炒爆，有啲指標就要留意一下。第一：加價！尤其是已經公開晒招股價範圍嘅新股，即係突然要延遲上市日期，上調招股價範圍，方便cap更多水。根據過往經驗，呢樣都唔係好兆頭。第二：做傳統行業新股PE奇高！公司上市就係為集資，如果大家同期上市，唔少公司都會參考吓其他定價如何，咁就難免會出現「佢個定價定到咁高，點解我間公司唔得」嘅情況，結果就會有傳統行業股都有70-80倍PE。金融海潚時就有一間內房股以逾70倍PE定價，你問佢點解會定咁高，佢一定係話盈利係未來，下年嘅PE降到xx倍，但結果係隻內房股咁多年來都未浮過上水面。第三：大市有見頂迹象！尤其是環球經濟已經有迹象轉差，大市衝極都衝唔上，但新股市場氣氛仍然熱烈。第四：《蘋果》A1！呢樣大家《蘋果》讀者都明，唔使花時間講。散子
來源:
https://hk.finance.appledaily.co ... e/20171031/20199999
Can Bank：三代人供一層樓
1 :
GS(14)@2018-01-08 00:28:44新世界（017）新世代首置計劃（前稱大學生首置）噚日終於出爐，首期7.5%，發展商做一按，首十年按息P減2.75%。由頭到尾都叫呢個做計劃，唔係優惠，可想而知，個計劃一啲都唔優惠。首期的確降低了，以天生樓入場費587.8萬計，首期僅44萬，按揭年期可以長達40年，以年齡上限35歲上車計，要供到75歲先供得完；而按息亦都比銀行高，即使P相當於5厘去計，減2.75厘，亦較一般銀行的減2.85厘為高。更不用說首十年後，按息將調升至P減1.75厘。息高年期長，發展商做一按，表面上入場容易了，但發展商就不單賺息又可以賺到長年期。咁當然計劃針對得年輕人，梗係會話佢哋日後人工高咗，還款能力高咗，可以早啲還款，咁咪唔使捱貴息囉，但貴息起碼要捱5年，因為首五年禁售。發展商做一按，即係唔使壓測，只限年歲，不限資產，一方面，可以幫年輕人上車，另一方面要靠父母更容易，首五年唔畀租賣的確可以減少投資者入場，不過，樓價無跌之下，唔需要壓測的高成數按揭，日後若出現撻定及銀主盤個案，發展商仍然是有權追差價的。長年期按揭，更可以造就父母幫手付首期，下一代幫手供尾期，真正是三代人供一層樓。發展商做生意無理由要無端端平價賤賣，畸形樓市之下，低首期長年期按揭，抑或劏房問題比較大，真係要到時辰到先知。
來源:
https://hk.finance.appledaily.co ... e/20171219/20249221
Can Bank：猛鬼酒店房價未必有折讓
1 :
GS(14)@2018-01-22 05:57:46過去周末，本港又發生一單命案，今次地點係某間高級豪華酒店房內，有興趣嘅讀者不妨留意本報突發報道。本欄位處財經版，自然會用錢銀角度睇吓單Case。過去幾年，本港樓價升完又升，凶宅都可以持續創新高，咁酒店凶房價又如何？其實酒店始終都有款待生意，凶房一般都唔會出租，一來有起咩事酒店本身有排煩；即使無事無幹，啲客見到多咗啲嘢，周街「唱」都唔係一件好事。所以酒店方面，都會自動將凶房列入優先次序較低的房間。不過，咁並唔代表呢啲Case對酒店價值並無影響，雖則此等事宜並無人公開地進行分析估值，但仍然可以睇吓房價同同區嘅差距。散子今次專程比較一下，五間網上最普遍被指猛鬼酒店嘅房價，睇吓有無折讓。五間酒店分別位於台灣、馬來西亞、泰國、日本以及倫敦（酒店背後嘅故仔，有興趣讀者可以上網找找），全數以相同星級，地點相若、平日以及Agoda價格作比較；其中台北君悅酒店一月平日價格只需1,638元（港元，下同），但鄰近的W酒店價格則達到2,351元；至於附近的香格里拉索價亦要2,087元一晚，折讓幅度約30-40%。至於泰國曼谷皇宮飯店，平過鄰近的華美達酒店一半；與易思廷（Eastin）價格亦差60%。馬來亞西雲頂高原酒店方面，亦平過附近的DZH Health Resort Club約四成。但亦並非間間酒店都有折讓，倫敦的Langham Hotel與附近的同級酒店價格基本上一樣，甚至貴過其他酒店，價位仍維持在3,300元水平。至於港人旅遊熱點日本，其位於富士山山中湖新星酒店，由於附近太多可以選擇，價格亦有高有低，所以難以比較。最後又要威又要帶頭盔：酒店房價涉及多方面因素影響，上述價格只可作參考，有啲酒店亦因為猛鬼而吸引到人入住，所以並不能一概而論。散子
來源:
https://hk.finance.appledaily.co ... e/20180116/20275402
Can Bank：HKTVmall實體店同順豐有乜唔同？
1 :
GS(14)@2018-01-28 18:48:54臨近過年，新界個別地區拖篋人士又再媲美機場，筆者住新界，過去幾年，每一年臨近過年前幾個禮拜嘅周末假期，幾乎每年都被呢啲篋碌過，咁當然碌過咁多次，散子亦由最初只着拖鞋出街，至今日唔着返對籃球鞋都唔敢出門口。其實早期呢類訪客對新界居民影響，唔只係被篋碌腳咁簡單，起碼散子就試過要喺中環買洗頭水返屋企；身邊新界區嘅朋友亦都有咁嘅經驗，近年藥房供貨相對有準備，散子亦不至於無洗頭水洗頭。另一方面，近年網購盛行，網購不再單是淘寶，更有HKTVmall，起碼在日常用品上有咗保障。唔少人都知HKTVmall去年開始有開實體店，早前出街都有經過，但就真係吸引唔到散子入去行吓。實體店有少少似順豐取貨點，拎貨嘅地方，唔係去拎貨嘅都無謂入去，直到過去嘅周末，散子終於親身試過去拎嘢，一如所料，就係拎貨嘅地方。其他有咩唔同？極其量就係有姨姨喺門口切士多啤梨試食，可能臨近過年，店內都有放朱古力等賀年禮品，但就係吸引唔到散子留步望多兩眼。事實上，如果實體店係協助舒緩物流緊張嘅，係值得嘅，起碼順豐都有辦你睇。但相對於順豐，HKTVmall嘅實體店地點上相對核心，人流相對多，雖然面積較細，但呢類舖租金平極都有限，成本未必真係低，王維基要止蝕，呢啲實體店嘅定位要清晰啲。
來源:
https://hk.finance.appledaily.co ... e/20180123/20282696
Can Bank：你肯畀錢睇亞視嗎？
1 :
GS(14)@2018-02-04 23:19:47亞視噚日正式「復活」，今次借App還魂，透過OTT（Over The Top）網上平台正式復播，除咗直播部份可以免費之外，點播係要收錢，最平係用App睇，月費38元，機頂盒月費68元元，不過三月之前都係免費。自從OTT出現，尤其是Netflix打入香港市場之後，散子身邊唔少朋友都開始習慣付費，問題係畀錢可以攞到啲乜？上個月吳雨出嚟見人就話，會開拍《英雄本色》，又會有由陳志雲主持的《百萬富翁2018》。真係未睇到都聞到陣亞視味。問題係，食返條舊水係咪行得通？參考吓TVB旗下嘅OTT平台，myTV SUPER都有經典頻道，專門播番舊劇，散子屋企有用，散子媽（退休人士）經常使用，簡直係去到唔能夠無咗個機頂盒嘅地步。散子曾經問：「你有無睇過舊劇？」散子媽：「有咁多其他嘢睇，仲乜要睇舊嘢？」有幾多經典到可以好似《大時代》咁可以引起翻煲熱潮？就算可以，又可以維持幾耐？另一方面，亞視上次熄機之後，為咗解決舊債問題，已經賣走部份劇嘅版權，台未開，吳雨只係上個月講過會重拍《我和殭屍有個約會》，即刻就引來FOX溫馨提示，套劇嘅版權已經賣咗畀佢，睇嚟食返條舊水都唔係咁容易。散子在打稿嘅同時一直有睇亞視開台節目，節目中間嘅廣告，大部份以賀年廣告方式，祝賀亞視翻生，而正常嘅商業廣告，就同亞視未熄機之前一模一樣，以中國企業普通話廣告為主，開台節目開始藝員表演嘅參差不齊，陣亞視味濃到聞唔到其他味。舊亞視未死之前，唔使錢都無人睇。新OTT版嘅亞視，又有幾多人願意畀錢睇？散子
來源:
https://hk.finance.appledaily.co ... e/20180130/20289456
Can Bank：沽載通！感情對沖？
1 :
GS(14)@2018-02-20 20:54:44上周六大埔公路九巴翻車意外，造成19死66人受傷，九巴母企載通（062）噚日股價亦一度跌逾4%；埋單跌1.3%。實際上，這類意外對公司影響有多大？今次意外發生後，九巴高層先在當晚向公眾鞠躬道歉，再撥款1,000萬元，透過政府分配予死傷者家屬。FB網頁logo轉為黑白，噚日九巴與載通高層一同默哀。凡事有比較才會有高低。去年9月份，城巴深水埗車禍造成三人死亡的車禍，當時城巴第二日設立保險熱線，協助傷者及受影響人士查詢索償問題，並向死者家屬提供應急金錢。兩周後，再向傷者家屬每人發放3萬元。城巴母企新創建（659）在意外後首個交易日股價跌1.02%。回帶再遠一點，去年2月10日港鐵縱火案，雖然性質上略有不同，但港鐵態度上強硬得多，對傷者「照顧」亦有很大差距，首先與東華三院合作募捐，籌得247.5萬元（其中港鐵與員工佔200萬），其後再進一步捐出500萬元。港鐵（066）於意外後首個交易日股價無升跌。其實天災人禍、意外事故，屬保險承保範圍，對保險公司業績影響較大，對於發生意外交通工具母公司業績影響反而有限。所以意外之後，對專營公司而言，形象上影響較金錢上的損失大，因此，專營公司對意外發生後的應對尤其重要。從傷亡角度去睇意外嚴重性，確實是今次九巴翻車最嚴重，但九巴對今次事件反應不算太差，噚日載通股價受到沽壓，是車禍真的對公司業績有影響，抑或純感情對沖？散子
來源:
https://hk.finance.appledaily.co ... e/20180213/20304210
Can Bank：吉利入主平治無咁簡單
1 :
GS(14)@2018-02-28 07:36:22吉利（175）母企吉利集團在之前海量入股平治母企Daimler傳聞之下，一下子就買到成為Daimler嘅大股東。呢個消息，對於老散而言，自然借勢炒個不亦樂乎，但對Daimler就好似殺佢一個措手不及。今次收購Daimler嘅交易，作價90億美元，即係700億港元，實在唔係小數目，於本港上市嘅吉利表明無參與到今次交易，即係出錢嘅完全係阿媽吉利集團。雖然700億唔係小數目，但吉利作為一家多次被習大大加持嘅私營企業，相信700億完全無難度。李書福大嗱嗱使咗700億，相信目的一定唔係財務投資咁簡單，連吉利都發公告，表明希望同Daimler合作，但最新有消息指，Daimler將尋求阻礙吉利獲得公司董事會席位，換言之，吉利今都掂唔到Daimler嘅營運，只能成為Daimler嘅「水喉」，呢個相信同李書福下重注嘅目的有違背。另一方面，Daimler旗下平治本身與北汽（1958）有合作，即使吉利今次收購成功獲審批，成功派員入董事局，如何處理平治與北汽之間的合作亦是大問題。北汽擁有國資委背景，吉利有習大大加持，只係諗吓都夠精彩。散子
來源:
https://hk.finance.appledaily.co ... e/20180227/20316227
Can Bank：十年來的黑洞
1 :
GS(14)@2018-03-19 04:37:212008年金融海嘯，最經典一役莫過於中信泰富（267，中信股份前身）炒燶外滙累計期權蝕155億元，當年為救火，母企中信股份派出常振明南下出任中信泰富董事長，被稱為救火隊隊長。當年中信決定要出手救受重創中信泰富，原因係中信泰富持有中澳鐵礦，係中國掌握全國資源重要嘅一步，中信泰富亦因而大難不死，不過呢個礦十年來一啲都唔爭氣，近幾年先後撥備5次，計埋今次78億元，前後撥備超過400億，而根據中信泰富2008年年報的預算，中信當初預計需要為呢個礦投資42億美元（327.6億港元）。大失預算不在話下，仲要官非纏身，2015年開始Mineralogy起訴中信，指其沒有按約定水平支付特許權使用費，中信最後於去年被判敗訴，要於未來30年每年向Mineralogy支付2億澳元特許經營費用，合共約369億港元。而中信於今年一月已提出上訴。中信在呢個礦花費達千億，如果無後台，以中信泰富爆出炒燶外滙前逾300億市值計，根本是不能承受的重。中信對呢個礦嘅千億承擔換來是甚麼？根據中信2008年年報預計，呢個礦會在2010年下半年投產，年出口量2,700萬噸。但現實係個礦2016年下半年先商業投產，2016年出口量係1,100萬噸；2015年試產就產出753萬噸。中澳鐵礦有咩吸引令中信不惜工本？原因在於中國鐵礦資源不足，而且質素較差，鐵礦石平均品位不足30%，遠低於巴西及澳洲的約60%，而品位低的礦石要篩選至合格，需要破碎及打磨更多，時間及能源消耗更大，成本高效率低，這就是中信力保中澳鐵礦的原因。但值唔值得用咁多金錢及時間去做？只可以講，國家任務嘅嘢，散子真係識條鐵咩！
來源:
https://hk.finance.appledaily.co ... e/20180313/20329918
Next Page