📖 ZKIZ Archives

官義岱 給力 拆拿 孫政才聽唔聽習總支笛？

1 : GS(14)@2013-01-30 22:20:10

http://www.metrohk.com.hk/index.php?cmd=detail&id=204351&search=1
較早時重慶市一名區長雷政富因為接受性賄賂而下台，但原來除咗雷政富， 另外仲有5名重慶政企要員中咗美人計，畀人捉黃腳雞勒索威脅，要求利益輸送。據《南方都市報》報導，重慶商人蕭燁用靚女勾引、暗中拍低性交易過程，敲詐數名重慶黨政幹部和國企負責人。據聞佢哋都被停職，接受調查，但暫時冇正式紀律行動。習近平1月22日開中紀委說：「有腐必反，有貪必肅」。佢叫下面唔好「上有政策，下有對策」，但似乎下面啲人睬佢都儍。重慶淫官爆料人朱瑞峰表示，重慶警方不但唔係調查重慶官員接受性賄賂的問題，反而正從「詐騙勒索」的方向追查傳出官員不雅短片嘅人。到底重慶市委一哥、60後新紮明星孫政才係咪聽大佬習近平支笛，睇嚇呢單嘢點發展就知喇。
官義岱
PermaLink: https://articles.zkiz.com/?id=282228

官義岱 給力 拆拿 救火隊長王岐山

1 : GS(14)@2013-05-11 15:54:57

http://www.metrohk.com.hk/index.php?cmd=detail&id=210545&search=1

                      

內地貪污問題嚴峻係人都知，新上任嘅國家主席習近平都話過要小心亡黨亡國，所以習近平同新任總理李克強都講明要反貪污，而呢個重任就交咗畀副總理王岐山。王岐山喺中央領導核心入面雖然只係排名第6，但佢嘅重要性可以話係緊隨習李之後。由當年廣東爆發財務危機開始，到北京爆發沙士，王岐山次次都會臨危受命，同中央補番個大大鑊，而且佢次次都拆得番掂嗰度好嘢。王岐山反貪污勝在反應快，每次網上爆出貪污醜聞佢都好快做嘢，而且佢開會唔畀下屬講廢話照秘書稿讀，要所有官員都實牙實齒做嘢。另外，由王岐山反貪仲有一個好處，就係佢冇仔冇女，唔會有把柄畀人捉到。喺中國新一屆領導人入面，王岐山繼續做佢成日做嘅救火隊長角色。





 



官義岱
PermaLink: https://articles.zkiz.com/?id=282815

官義岱 給力 拆拿 軍頭唔畀面習總

1 : GS(14)@2013-05-11 15:55:08

http://www.metrohk.com.hk/index.php?cmd=detail&id=210305&search=1
內地一哥習近平最近整治軍紀首次碰到「軟釘子」。話說內地軍方下令禁止價值45萬元以上豪車掛軍方車牌，點知新規定第一日，就畀記者拍到有貴價車掛軍牌喺京師招搖過市。北京軍區回應查詢時答得好妙，佢哋話喎，之前使用軍牌嘅豪車為咗「避免浪費」，「將有限制的繼續使用」。一個貌似非常嚴格嘅制度，你一開咗個後門，咁就即刻形同虛設。以後大家喺路上見到嘅豪車，都將會係「為咗避免浪費繼續使用嘅」。你話咁咪即係冇咗條規矩？問題係，究竟習一哥畀人咁樣落佢面，咁佢仲有冇後着呢。佢一方面要維持紀律，但亦唔可以同軍頭反面。要平衡兩者，真係一啲都唔容易架！
PermaLink: https://articles.zkiz.com/?id=282816

官義岱 給力 拆拿 外交系統今非昔比

1 : GS(14)@2013-05-11 15:55:25

http://www.metrohk.com.hk/index.php?cmd=detail&id=210449&search=1
官義岱有一個睇法，就係內地新一屆領導層其實唔係咁重視外交。喺江澤民時代，外交系統可謂紅極一時，當時嘅外長錢其琛兼任埋副總理，喺領導層中地位崇高，有外交教父嘅稱號。喺今屆嘅中央政治局入面，25位成員中只有習近平本人同外交有關，外交部長王毅同負責外交嘅國務委員楊潔篪都唔係中央政治局委員。不過話說回頭，所謂「弱國無外交」，搞外交最緊要都係要有「食力」，今時今日內地嘅經濟規模係全球第二，緊貼一哥美國之後，各國自然識得畀面，習近平唔使搵啲特別高級嘅官員做外交都一樣掂。
PermaLink: https://articles.zkiz.com/?id=282817

官義岱 給力 拆拿 內地係談判高手？

1 : GS(14)@2013-05-11 15:55:36

http://www.metrohk.com.hk/index.php?cmd=detail&id=210624&search=1
中國共產黨其實係一個好叻嘅政黨，但好多人特別係香港人，其實唔係好明白呢一點。喺中國歷史上，佢哋搞咗好多次密室談判，幾乎次次都係贏家。1920年代，國民黨同中國共產黨密室傾掂第一次國共合作，通過成立黃埔軍校，為共產黨培養出包括林彪、徐向前等解放軍將領。1937年，國共經過7個月內6次密室談判，促成第二次國共合作，被國民黨迫到守喺江西省井崗山嘅共產黨爭取到喘息嘅機會，留番啲最難打嘅仗畀國民黨同日本人打，終於坐大成功，喺1949年成立政府。共產黨唯一蝕底嘅一次，就係1980年代同台灣嘅李登輝搞密室談判，畀李登輝摸清楚共產黨嘅底，然後李登輝就宣布「戒急用忍」，拒絕同大陸融合。但到2010年同香港嘅民主黨密室談判，就又成為大贏家，搞到香港泛民分裂，令到香港泛民嘅「五區公投」唔齊人，聲勢大減；而且最犀利嘅係，香港「泛民」中間形成心結，彼此猜忌，至今不能撫平。
PermaLink: https://articles.zkiz.com/?id=282818

官義岱 給力 拆拿 習近平談愛國

1 : GS(14)@2013-05-11 15:55:47

http://www.metrohk.com.hk/index.php?cmd=detail&id=210777&search=1
國家主席習近平喺3月19日接受外國傳媒訪問時表示，「中國人是講愛國主義的，同時也是具有國際視野和國際胸懷的。」佢咁嘅提法，十分耐人尋味。一方面，習總睇到大家對狹隘愛國主義嘅批評，但另一方面，佢又唔想一棍打死愛國主義。官義岱要同讀者介紹一吓嘅係，習近平對愛國主義嘅講法，同國際主流似乎有啲唔同。「愛國主義」一般係同「世界主義」對立，所以，主張最終要消滅國家，建立共產國際嘅馬克思，亦唔多贊成愛國主義。就連國父孫中山，都唔係好贊成亂用愛國主義。佢話過：「為何非『愛』國不可、非認同不可？」英國著名文人約翰遜亦曾講過：「愛國是惡棍最後的避難所。」佢嘅意思係話，所謂愛國主義，係政客操弄政治嘅工具。而且呢啲行為無助民主嘅發展，因為社會嘅精力都會虛耗於愛國嘅爭論之中。
PermaLink: https://articles.zkiz.com/?id=282819

官義岱 給力 拆拿 領導嘅艱苦歲月

1 : GS(14)@2013-05-20 13:42:54

http://www.metrohk.com.hk/index.php?cmd=detail&id=211308&search=1

舊年年底中共十八大產生咗中共新一屆中央領導，其中31.7%嘅中央委員、28%嘅中央政治局委員都做過「知識青年」，喺1960年代響應過毛澤東「上山下鄉」，7位政治局常委中，有4人都係「上山下鄉」嘅「知青」出身。無論係中共中央總書記習近平，定係剛出爐嘅國務院總理李克強，官方報導都著重提到佢哋喺農村「插隊」嘅基層歷練。點解呢啲「基層歷練」咁重要呢？因為呢啲經歷，反映佢哋係「有擔當」嘅人，冇逃避到捱苦嘅日子咁解喎。內地官場文化其實有種諗法，認為捱過苦嘅人可靠啲。講近啲，習近平上場後提倡要慳儉節約，又或者李克強話「公費吃喝」要減少，唔多唔少係受到「上山下鄉」嘅經驗影響。其實做得中央領導層，仲有一個不成文嘅條件，就係喺「文化大革命」時期唔可以做「造反派」，當年毛澤東為咗奪權，號召「造反派」搞到天下大亂，連國家主席劉少奇，副總理鄧小平都畀「造反派」鬥到七彩。已經落台嘅薄熙來，當年就係「造反派」，所以佢就算唔畀人拉，都未必上到位。









官義岱
PermaLink: https://articles.zkiz.com/?id=282899

官義岱 給力 拆拿 竊鉤者誅 竊國者侯

1 : GS(14)@2013-05-22 14:35:37

http://www.metrohk.com.hk/index.php?cmd=detail&id=211493&search=1

細看內地新聞，其實有唔少都好搞笑。最近有兩單新聞，表面睇冇乜關係，其實係同一件事。話說山西國營焦煤集團董事長白培中家中失竊，兩個賊仔，一個姓羅，一個姓李，分別被判死緩同無期徒刑。呢單嘢好似冇乜特別，但最離奇係，白董事長屋企竟然有現金數千萬畀兩個賊仔偷，佢份人工都冇咁多錢，肯定係偷公家啲錢先至有咁多；結果輿論譁然，山西省紀委喺壓力下也做嚇表面功夫應酬嚇大家，最終決定「給予白培中留黨察看一年處分」 。譁，賊仔偷幾千萬就判無期徒刑，但貪官貪咗幾千萬就判「留黨察看一年處分」 。呢個世界就係咁唔公平，大家覺得好笑之餘，其實都幾無奈！









官義岱
PermaLink: https://articles.zkiz.com/?id=282934

官義岱 給力 拆拿 樹倒猢猻散

1 : GS(14)@2013-06-25 01:17:08

http://www.metrohk.com.hk/index.php?cmd=detail&id=214049&search=1

喺大陸做官，跟啱個老細係最緊要嘅。跟得啱，你就一直官運亨通；跟錯咗，自然冇乜運行。好似最近，有位叫郭永祥嘅高官「因嚴重違紀」接受緊「組織調查」。郭永祥現任四川省文聯主席，好似冇乜嘢，但各位讀者有所不知：呢位郭先生，長期追隨前中央政治局常委周永康。佢曾跟住周永康出任中國石油天然氣總公司副總經理、黨組副書記同埋研究室副主任；喺周永康未高升做中央政治局常委，仲喺四川做緊省委書記時，郭永祥就係四川嘅省委秘書長、辦公廳主任。換句話講，佢就係周永康喺四川隻「頭馬」囉！郭永祥後嚟無端端做咗四川文聯主席，由石油界跳去「統領」四川文藝界，好多四川文化人都「媽媽聲」。佢呢次畀人查，唔多唔少都令人覺得周系都「冇乜運行」；總之，就係有啲「樹倒猢猻散」嘅feel囉！






官義岱
PermaLink: https://articles.zkiz.com/?id=283146

官義岱 給力 拆拿 鹹濕官員「好事齊來」

1 : GS(14)@2013-06-25 01:17:20

http://www.metrohk.com.hk/index.php?cmd=detail&id=213917&search=1

大陸啲鹹濕官員近日真係「好事齊來」！首先係原鐵道部長劉志軍受審，控方認定「性賄賂不入罪」，以後高官搞女人再利用職權搞「利益輸送」，全部冇法律控告嘅依據！呢單嘢未高興完，又有原重慶市北碚區區委書記雷政富真人示範乜嘢叫「金蟬脫殼」。雷政富話喎，佢同性愛視頻女主角趙紅霞係「戀愛關係」；佢咁講法，直情係將「性賄賂」呢味嘢「昇華」到另一層次。從此，佢哋全部都同啲後生女搞埋晒啲「戀愛關係」！出咗呢啲新聞，最高興嘅，梗係啱啱被揭同電視台女主播紀英男搞「戀愛關係」嘅國家檔案局政策法規司副司長范悅啦！雖則紀英男公布咗范悅當日嘅「求婚」片段，但呢條片只係證明咗佢「談戀愛」咋喎。如果官義岱係中紀委書記王岐山，依家肯定嬲到想殺人！






官義岱
PermaLink: https://articles.zkiz.com/?id=283147
Next Page
ZKIZ Archives @ 2019