新旅行社「度新假期」 女士先行 黛安
1 :
GS(14)@2013-04-29 22:29:11http://www.skypost.com.hk/column ... 5%88%E8%A1%8C/90865
九龍灣德福廣場二期「旅遊天地」噚日有新旅行社開張，叫做「度新假期」，係專業旅運旗下嘅附屬公司。專業旅運營運總裁甘子銘（Alfred）向黛安介紹，「度新假期」係一間客路以女士為主導的旅行社。約一年前，公司做過市場調查，發現無論家庭或情侶旅行，去玩嘅話事權都掌握喺女性手上；而相對男性而言，女士們更經常相約出遊。據統計，公司每接四組全女班顧客，才有一組全男班客人報名，比例係4：1！難怪有此定位。
女士去旅行最鍾意Shopping同做Spa，除咗上述基本項目，Alfred話「度新假期」仲會安排一些特色活動，例如於美容之都南韓，會請化粧達人教扮靚；去到美食如雲嘅泰國，就會跟大廚學煮餸。
旅遊活動別有特色
專業旅運行政總裁高鄭杏芬（Iras）同黛安講，三八婦女節前後，同九個姊妹去咗泰國玩四日，其中一朝八點幾就起身，跟曼谷著名餐廳「Blue Elephant」嘅靚仔廚師逛地道街市，大廚仲教識咗佢哋整冬蔭功、胡椒雞、蝦沙律同紅咖喱魚四道菜，沿途大家有傾有講，臨尾仲有大餐食，全日行程只係700元，姊妹們都好盡興。
專業旅運開業27年，一向以自由行套票做主打，嚟緊會透過「度新假期」開拓旅行團客源，佢推出嘅「專賞團」走高檔路綫，五月底出發嘅土耳其十天團團費由9,998元起，Alfred話希望每月開到兩個旅行團。
現時「度新假期」於九龍灣及港鐵九龍站設有分店，Alfred透露11月會喺荃灣再下一城。
恒生80大壽 港鐵站展覽說歷史 黛安
1 :
GS(14)@2013-05-07 01:39:17http://www.skypost.com.hk/column ... D%B7%E5%8F%B2/92257
今年係恒生銀行80歲大壽，前兩日恒生喺會展搞咗個生日派對，有二千幾名嘉賓捧場，連財爺曾俊華都大駕光臨。
恒生喺香港服務300幾萬市民，幾乎一半港人都係佢嘅客戶。唔知大家對佢認識有幾深？話說80年前、即係1933年，恒生只係上環一間800幾呎的小銀號，當時全公司只有11名員工，以小型找換店形式經營，第一年已錄得過萬元的純利。其後幾十年，雖經歷社會動盪，生意仍愈做愈大：50年代開始發展商業銀行業務；60年代推出恒生指數，成為環球市場反映港股走勢嘅重要指標；70年代在港交所上市；80年代中仲進軍埋內地市場，現時為全球50大上市銀行之一。
好多人約朋友出街，都習慣相約喺某某鐵路站嘅恒生銀行等。有姊妹問黛安，知唔知港鐵站幾時開始有銀行出現？原來81年恒生已拎到在地鐵開店的專營權，雙方合作咗30幾年，可算是老朋友。所以生日派對上，恒生銀行副董事長兼行政總裁李慧敏（Rose）特別頒咗個「長期合作夥伴大獎」畀港鐵，港鐵行政總裁韋達誠仲好畀面，親自去領獎！
展品具紀念價值
恒生另一位長期合作夥伴係香港賽馬會，原來銀行90年代開始幫馬會發會員卡，順便處理戶口帳項，所以馬會行政總裁應家柏當日亦有到場。
為慶祝恒生銀行80周年，港鐵中環站正舉行歷史展覽，展出該銀行皇后大道中舊址嘅大閘、木招牌複製品等具紀念價值的展品，稍後會移師到紅磡同旺角站展出。
HTC One貨源 月底湧港 黛安
1 :
GS(14)@2013-05-11 15:48:32http://www.skypost.com.hk/column ... 9%A7%E6%B8%AF/93243
HTC最近推新機The new HTC One，近日翻開報紙，每隔幾頁就見到相關廣告，宣傳攻勢逼人。黛安都忍唔住訂咗部黑色機，可惜仲未有貨，日前見到HTC北亞區總經理董俊良（Jack），即時追問幾間有機攞。
Jack叫黛安耐心等多陣，估計五月中就有，月底更會有大批貨源供港，屆時會進一步作全面宣傳，又透露搵咗五月天同王力宏做生招牌，為新機賣廣告。
新機功能強勁
Jack係HTC嘅領導重臣，07年加盟公司，現主責內地、港、台、韓、日同越南等地業務。日前之所以遠道訪港，無非都係想會一會傳媒，親自向大家推銷新機。
活動上，Jack如數家珍，講解黑夜感光效果強勁嘅UltraPixel手機鏡頭、前置雙喇叭，以及方便用家追蹤朋友動向及新聞消息嘅BlinkFeed動態時報功能。黛安見到Jack咁落力，都知道HTC對新機有幾重視。
男友得悉黛安與Jack見面，事前已叫黛安打聽，點解HTC唔將日本同台灣大賣嘅Butterfly引入香港。Jack解釋，因為Butterfly推出時，本港已有4G上網，但該機並不支援4G，不符合香港電訊市場需求。
他們曾想過另製4G版的Butterfly出售，但考慮到製作需時，屆時或與HTC One在港推售的時間相撞，故最後香港用家都無緣見「蝶影」。
Jack臨走前再三強調，HTC好重視香港市場，未來推新機，均會優先考慮供應畀大中華市場。
反思孟加拉製造 黛安
1 :
GS(14)@2013-05-20 13:57:10http://www.skypost.com.hk/column ... 3%BD%E9%80%A0/95194
你着緊嘅衫來自邊度？構思可能係出自巴黎、米蘭，製作卻可能是中國，甚至是上月發生工廠倒塌嘅孟加拉。
孟加拉係世界第二大成衣出口國，好多國際品牌都喺嗰度有生產綫，但勞工安全同權益卻一直受到忽視。
黛安未曾到過孟加拉，前兩日從多次到訪當地嘅公平貿易動力兼公平點總監趙善榮（Anthony）口中，了解呢個國度不少。
選擇有企業責任的公司
聽Anthony講，孟加拉首都達卡工廠開到成行成市，不少工廠都係24小時運作，從街上望入去，大部分時間都燈火通明；員工大都住喺鄰近搭建嘅臨時屋，衞生環境惡劣。佢哋每日起碼工作10至12小時，賺取僅約300港元嘅月薪。
雖然工廠貼有安全指引，但管工多係有例不依。試過火警時，管工居然唔畀工人走，叫佢哋留低做嘢。咁都得？認真離譜！
近年好多內地廠房因成本上漲而遷到孟加拉，當中不乏港商，但安全設施唔見得好好。最近H&M同Zara等多個大品牌承諾改善工作環境，希望係一個轉變嘅開始。
好多當地人同Anthony講，有得揀都唔想去達卡，寧可留喺農村耕田，一年都可賺到一千多港元。可惜普遍人都無自己嘅地，喺鄉下都係做人哋僱工，同樣要畀人剝削。
點先可以幫到當地人？Anthony叫黛安要選擇有企業責任嘅公司幫趁。而近十年，陸續有公平貿易機構轉賣孟加拉農村婦女嘅手工藝品，並提供合理薪金。黛安喺公平點網頁搵到孟加拉製小布袋、手鐲、頸巾、番等。為表支持，我都買咗幾件送畀朋友。
一田莊偉忠：平常心觀得失 黛安
1 :
GS(14)@2013-05-22 14:29:08http://www.skypost.com.hk/column ... E%97%E5%A4%B1/95496
一田購物優惠日明日展開，前兩日一田行政總裁莊偉忠（Daniel）仲抽時間同黛安飲嘢，認真難得。
每次一田做優惠，不少貨品都會以二、三折低價作招徠。黛安問Daniel點樣做到，佢話一來大量入貨，成本平啲；其次就係優惠日期間會壓低利潤，自己同供應商都賺少啲，減減下就有六、七成折扣。叫人哋陪你賺少啲都得？黛安相信只有Daniel做得到。
互惠互利贏尊重
點解咁講？話說08年金融海嘯，不少企業都經營艱難，唯獨一田逆市仍有不錯嘅生意增長，當時Daniel擔心個別供應商會捱唔過經濟寒冬，於是主動打電話向對方提出，希望提早找數，事件轟動業界。當時有人笑一田傻，Daniel冇理會，事後唔少受過幫助嘅供應商，主動寫信畀Daniel致謝。
而最近日圓貶值一事又係咁，從做生意角度睇，當然係愈遲畀錢愈好，現時行內數期一般係60至90日，但一田刻意壓低數期至45日，等供應商唔使因日圓急跌而受重傷。
雪中送炭、互惠互利，一田就係靠此贏得供應商嘅尊重。因此當一田需要幫忙，供應商都特別關照。
過去幾年，先後發生金融海嘯、日本311核事故，一田嘅經營環境其實唔算好，但生意仍節節上升。Daniel話自己從不覺得日子艱難：「有困難咪解決佢囉」。佢話生意並非一時，而係要一路做落去，唔好將得失睇得咁重。最後又同黛安分享一句座右銘：「以平常心觀得失，天分外藍，月分外明，人分外美。」
大家樂旗下八食肆 力推素食 黛安
1 :
GS(14)@2013-05-31 12:41:05http://www.skypost.com.hk/column ... 4%A0%E9%A3%9F/96590
黛安噚日同大家樂集團首席執行官羅開光（Sunny）喺意粉屋High Tea，望一望枱面嘅餸：松子仁醬炒鮮野菌、香辣番茄意粉……全部都係素食嚟嘅？Sunny話，事關佢正想同黛安講，集團旗下八間餐廳，包括意粉屋、Spaghetti 360、Oliver's Super Sandwiches、MIX等，上月開始加入「Go Green」行列，供應素食喎！
其實，大家樂自上年開始，逢周一至三已提供素食餐單。Sunny話，現時全綫約150間分店，日賣約3,000個素食餐，客源主要來自中上環嘅上班一族。Sunny笑言，上年佢話要推素餐時，職員個個話「吓？我哋啲客人食肉㗎喎！」現時的成績反映，顧客對素食一樣有需求。雖然素餐佔整體餐膳比例只有約4％，但對比年前已是一大進步。今年多咗咁多分店加盟，預期素餐總銷量可增至每日4,000份。
Green Monday倡素食
Sunny仲向黛安透露，之前落屋邨巡舖時，聽見有客人問初一、十五會唔會有齋食，佢正研究點樣可以滿足呢班客人嘅需要。
素食風氣近年喺社會盛行，Green Monday兩位創辦人魏華星（Francis）及楊大偉（David）功不可沒。David話最近佢哋做咗一個約500人嘅市場調查，發現Green Monday成立短短一年，已有近四成港人知悉周一茹素運動，約七成人表明支持活動，其中七成人仲話會以行動響應！
《晴報》首季廣告收入勁升80％ 黛安
1 :
GS(14)@2013-06-08 15:59:11http://www.skypost.com.hk/column ... 8780%EF%BC%85/97421
黛安先要喺度恭喜《晴報》，噚日黛安收到廣告媒體監察機構admanGo嘅專題報告，裏面提到創報未夠兩年嘅《晴報》，廣告收入大躍進。
以今年一至四月為例，《晴報》嘅廣告收入升幅高達80％，冠絕同業，其餘四份中文免費報只係錄得10幾％至30幾％嘅增長。雖然《晴報》仲喺投資期，但已錄得如此佳績，黛安都替該報嘅員工感到高興。
《晴報》成績咁好，全賴實力廣告商支持。現時個人護理產品專門店屈臣氏，係投放最多資源喺免費報紙賣廣告嘅公司品牌，單係今年首季，就用咗逾3,000萬元，而《晴報》亦係獲屈臣氏投放較多廣告資源嘅主要免費報章之一。
首季飲品廣告支出升九倍
除咗屈臣氏之外，《晴報》仲備受飲品品牌垂青。今年首季飲品品牌投放於《晴報》嘅廣告開支增加九倍！此外，電器、電訊及流動電話服務、浴室家居用品等行業，亦分別加大於《晴報》嘅廣告開支兩至三倍。
香港首份免費報出現於2002年，11年後嘅今日，已有多達五份中文免費報。前年《晴報》加入戰團，令免費報業廣告市場重新洗牌。有市場分析話，《晴報》等新競爭者嘅加入，為廣告商帶來更多選擇。
至於收費報更加唔使講，話說06年，收費報同免費報嘅廣告收入仲係九比一，今天已大幅收窄至六四比。今年首季，廣告商喺免費報投放嘅支出高達16億元，比去年增近30％，而收費報嘅增長就只有6％，兩者差距近四倍。
信和做大使 幫政府宣傳廚餘回收 黛安
1 :
GS(14)@2013-06-25 01:07:51http://www.skypost.com.hk/column ... B%9E%E6%94%B6/99495
「我哋儘量唔好食淨啲嘢，如果唔係就變廚餘。」上星期同信和管業優勢聯席董事伍振民（Terence）食Tea，佢提醒黛安。可能最近幫信和主理得多廚餘項目，Terence無論喺源頭減廢或是回收再造都特別上心。
聚會相約喺奧海城，Terence仲即席帶黛安參觀商場新置嘅廚餘回收機。該機設於底層垃圾站附近，現時每日處理四間食肆約50公斤嘅廚餘。Terence介紹，呢部日產廚餘機分解能力高，達99.8％。以每日50公斤廚餘為例，99.8％、即49.9公斤會分解為水蒸氣及二碳化碳，餘下的0.2％、即0.1公斤會變成堆肥。
午飯前收集也適合
同場嘅奧海城高級物業經理陳振華（Derek）介紹，佢哋每日會向食肆收集廚餘兩次，一次喺午膳時間前，一次喺晚間收市左右。夜晚收剩餸，黛安明白，但午飯前有咩可收？Derek話餐廳煮食前，或切下大堆菜頭菜尾棄置，呢個時候收集最適合不過，真係貼心。
Terence話，現時信和旗下有四部廚餘機，奧海城及屯門市廣場各有一部，另外兩部喺旗下屋苑。每部機性能各有不同，屋苑會將廚餘轉化為堆肥，屯門市廣場嘅成品係養分水，奧海城則係水蒸氣，固體、液體、氣體樣樣齊。
佢哋仲計劃喺中港城及黃金海岸商場增設廚餘回收設備。現時政府環保基金有一項廚餘循環再造項目，資助屋苑添置器材處理廚餘，信和仲幫手做埋大使，周圍搞講座解釋廚餘回收嘅好處，又遊說旗下屋苑參加，為環保出力。
K11夏日嘉年華 下周六開鑼 黛安
1 :
GS(14)@2013-07-06 15:00:08http://www.skypost.com.hk/column ... %8B%E9%91%BC/100862
愈來愈多出色嘅商場進軍內地大展拳腳，最近新世界發展聯席總經理鄭志剛（Adrian）就將一手創立、集藝術及購物於一身嘅K11商場，帶到上海淮海中路，新店日前開幕，可惜黛安無緣去見證。
噚日黛安同剛從上海回港嘅K11行政管理層成員胡玉君（Rebecca）食晏，佢叫黛安唔使失望，事關佢哋帶咗好多上海嘅得意項目嚟香港，下星期六開始到八月底，喺尖沙咀K11搞番個「Summer Art Karnival」，不但請咗《水舞間》演員，以大型呼拉圈做出各種驚喜嘅奇藝表演，仲話要喺商場開番個都市農莊，之前上海K11就養咗一批豬仔同乳牛，黛安都好想試下喺鬧市親親小動物。到時只要喺商場買嘢即可獲派「飛仔」，於嘉年華換嘢食同睇表演。
會員平台教品味
黛安之前聽Adrian講過，目標喺五至六年內，於全國開夠19間K11。「K11家族」愈來愈龐大，好在Adrian並無厚此薄彼，仍不時喺最早出世嘅香港店推陳出新。最近，佢哋為會員增設咗一個叫「Klub 11‧Art Academy」嘅平台，九月份開始，佢哋會定期請大師開班，教授唔同嘅生活品味課程。
為咗同大家共度炎夏，八月份會先開五堂暑期甜品班，會員支付積分，就可跟大廚學整卡通麵包、Wasabi芝士餅等美食，Rebecca仲話遲啲約黛安一齊試玩。
AIA新廣告 街頭招真人拍攝 黛安
1 :
GS(14)@2013-07-17 01:00:21http://www.skypost.com.hk/column ... %8D%E6%94%9D/101732
最近從報章及電視廣告，留意到友邦香港（AIA）拍咗一系列廣告為品牌重新包裝，以「真生活•真夥伴」定位。
上星期黛安同友邦香港及澳門首席執行官陳榮聲（Jacky）及市場及業務策略總經理謝佩蘭（Bonnie）食飯，已率先睇過新廣告，片段簡而精，一分鐘嘅歷程，帶大家經歷孩童成長、情侶追夢、夫婦鬧交、意外倖存、長輩患病等不同時刻，故事touching之餘，亦成功營造一種與客人風雨同路嘅親切感。
會景閣天台捕捉浪漫
聽AIA公關Gloria講，廣告片於馬來西亞、上海同香港取景。大家睇唔睇得出邊啲場景喺香港拍攝？黛安只知結尾一幕係香港夜景，Gloria話嗰度其實係灣仔君悅酒店旁邊嘅會景閣天台，拍攝時仲整咗些少煙火效果，感覺非常浪漫，黛安都想去感受同一個夜景。可惜Gloria話，天台平日唔畀人上，今次只為廣告開特例。
除咗會景閣外，仲有一幕火警及雨景，分別喺油麻地果欄及中上環樓梯街拍攝。Gloria話拍雨景嗰幾日，香港正受黑雨侵襲，惟開機時天公不造美，最終都要搵水車「造雨」。
為咗凸顯「真生活」，AIA今次拍廣告棄用演員，改為街頭招聘真實個案。其中一輯硬照廣告（編按：可參考11/7《晴報》封面），一對新人在滂沱大雨下共諧連理，Gloria話佢哋現實中係對真夫婦，難怪笑容特別自然真摰。
Next Page