裕樹消失7年！拒返娛圈 望入飛行學校做機師
1 :
GS(14)@2016-08-21 08:11:03「直樹」鄭元暢…「湘琴」林依晨喺想當年仲吹緊台風嗰陣，唔少人都會煲吓台劇，就好似2005年播嘅《惡作劇之吻》，吸引勁多人睇，時至今日，隔咗差唔多11年，一班《惡》演員都會約埋聚舊，不過就唔係成日見到演直樹弟弟「裕樹」—章柏翰，當年佢10歲就拍呢套劇，拍完《惡吻2》，佢就冇再喺演藝圈拍戲。「裕樹」章柏翰最近接受台灣報道專訪，講到消失7年原因，報道指章柏翰係童星出道，幼稚園就開始演出，直至拍完《惡》，好多人喺街上叫佢「裕樹」，不過佢從來冇睇過自己演出，因為覺得好怕羞同尷尬，雖然現時仍會重播，不過佢都只係瞄一眼，唔敢睇，佢話當時角色好冷酷、鍾意欺負「湘琴」林依晨，係導演要求佢「臭臉、翻白眼」，呢個並唔係佢個性，佢話拍劇印象最深係學校嗰場戲，要背好多台詞，加上對白有好多成語，只可能死記，最終NG咗廿幾次，令佢心情好沮喪。章柏翰又喺報道講，之後就專心學業冇再接戲，現時21歲讀台北大學，記者問佢會唔會再接戲重返演藝圈？他即堅決答冇諗過呢個方面，拍戲時喺片場等待時間太多，唔鍾意呢種生活方式，佢又希望讀完大學畢業，去美國飛行學校就讀，之後報考航空業做機師，認為「年輕就要做夢」。
來源:
http://hk.apple.nextmedia.com/entertainment/art/20160821/19744776