智取大市：特首選戰鬥賣港
1 :
GS(14)@2016-11-08 05:51:13上周五梁振英、曾俊華出席公佈辣招，選特首前邊個咁得閒搞大壇嘢？連中央唔叫唔做嘅梁振英都仆出嚟，一定係中央意思。記者會上梁振英當曾俊華空氣，點知曾俊華不惜當眾插嘴，證明場政治show嘅重要性，今次辣招係中央落嘅order，二人必須邀功。講番辣招，買第二層住宅要劃一支付樓價15%稅項，較原本按樓價遞增至8.5%嘅稅率大增，即係打壓投資需求。樓價咁貴，升斗市民本來已買唔起，泡沫出晒嚟先加辣？真係為港人着想？睇睇眼前人民幣形勢！離岸價CNH貶到紀錄以來新低，外滙儲備面臨新一輪走資潮。說穿了，中央要求香港加辣原因係——防．走．資！之前中央大大聲話唔驚外資流走，容許外資自由進出，但走資呢家嘢，其實最驚係自己人走，因為外儲多多都唔夠賠。所以先有銀聯禁無限碌卡來港投保，亦傳Bitcoin出境換外滙落閘，家陣加辣等於逼香港人順從內地防走資嘅政治任務。收到嘅稅，除咗起香港人唔點用嘅高鐵外，總有其他倒水方法，「取之於民，用之於中央」容乜易，睇嚟中央先係大贏家。今次辣招，睇得出梁振英政治上仍有本錢，雖然曾俊華可謂港人眾望所歸，但千祈不要睇小CY連任機會。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161107/19824782
智取大市：明年港股更刺激
1 :
GS(14)@2016-11-10 07:33:32炒股最緊要有乜？就係有波幅，今年港股波動性的確有限，不過，明年最大主題可能係通脹，勢令股市波幅加劇。希拉莉贏唔贏，就快知，但一切都反映得七七八八，2016年餘下時間難免重拾弱勢。然後，2017年以偏低水平開局，不過通脹殺到，配合物業資產泡沬繼續膨脹，加上恒指每股賬面值提升從而拉低估值，港股好難長期維持偏低水平。只要明年某段時間冇乜壞消息，人類猛然發覺通脹下要買啲嘢保值，就有番買股票意欲，今年咁嘅環境都可以炒到24000點，出年25000點甚至26000點絕對唔奇，之後再面對資產泡沫爆破風險，成也通脹，敗也通脹。明年港股或許係低開再先升後跌，所以未來一至兩年，波幅一定比20000點至24000點範圍更大，升會更高，跌會跌得更慘。講番周二，最強勢藍籌神華（1088）、金沙（1928）衝高後有阻力，押注大股似乎已非年底前最佳出路，靠細價股以至殼股仲有機會年底前突圍。之前推介嘅I.T（999），周二正式破旗，短期內收復3元關口難度唔大，首站會挑戰3.4元雙底頸線。I.T幾可肯定明年業績會有好轉，可先下注，等出年好大機會行運。晉佳
http://fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161109/19827365
智取大市：股民三招對抗特朗普
1 :
GS(14)@2016-11-10 08:01:34特朗普做美國總統既成事實，但作為股民必須保持正能量，最重要係日子如何過下去。近代史之中，全球投資市場好耐冇試過面對一個「估佢唔到」嘅美國總統，長期嚟講，特朗普會唔會按佢競選時嘅大膽政綱一樣行事，一樣係未知之數。咁就煩啦，啱啱選完總統，直到出年1月20日佢就職嗰日，中間呢段時間，大家都要估估吓，究竟特朗普上場後，環球會發生乜嘢事，會有幾大破壞力。市場最厭惡乜嘢？咪就係不明朗因素，既然有咁大個不明朗因素之下，加深股市弱勢，實在合理不過。由今年11月10日至出年1月20日呢段期間，佢求其噏啲嘢，就會大幅度影響市場，好一個將市場舞高弄低嘅好機會。參考一直以來政治主宰股市嘅玩法，呢兩個月，好大機會將投資者玩到謝一謝。不過，仲有三種對策：第一，棄權唔玩，雖然呢招太消極，但總好過輸錢；第二，完全抽離現實，大玩逆向思維，就好似特朗普確認當選前，港股曾經跌近千點，但突然抽上，收復返400幾點跌幅，總之嚇到瀨尿先買，一high即刻沽；第三，炒殼股，皆因大陸資金走資最實際，邊個做美國總統，睬你都有味，一定仲有得玩。晉佳
http://fb.com/advanceguy1
來源:
http://hk.apple.nextmedia.com/financeestate/art/20161110/19828378
智取大市：全港最殘的股票
1 :
GS(14)@2016-11-18 17:22:01有一隻股票，市值35億銀，但一年營業額有成857億銀！市值對營業額比率係0.04%，港股裏面排第三低，呢隻就係冠捷（903）。冠捷主要代工生產電視機同電腦芒，仲要電腦芒收入略多過電視機，大約一半半。佢係全球最大電腦芒生產商，亦係全球液晶電視四大生產商之一。冠捷啱啱公佈第三季虧轉盈，賺1.45億元，每股盈利6.1仙，將呢條數乘四，以前收市價1.5元計，市盈率6.1倍。冠捷第三季收入按年下跌11.7%，毛利下跌兩成，點做到虧轉盈？係靠削減開支，將銷售及分銷開支減少2,000萬美金，再減少1,000萬美金行政開支，減少800萬美金研發開支。經營利潤嘅3,529萬美金，就係咁嚟，呢種轉盈方式等於慢性自殺，睇到都想喊。點解仲要講呢隻股，下回分解。大市炒兩極化，濠賭股金沙（1928）、銀娛（027）升到癲，航運股中國遠洋（1919）等又爆上，呢兩個sector未來一年都值得憧憬，不過狗衝喺第四季唔係王道，暫時估計呢批強勢股都係chok住咁升，候低吸嘅話，相信可以等到低過周四收市價上車，策略是不用急。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161118/19837271
智取大市：基數近零的威力
1 :
GS(14)@2016-11-22 00:21:26特朗普效應似乎逐漸淡化，濠賭股、手機設備股爆上，較大可能係市場期待基金年結嘜數交功課，與此同時喺美金急升情況下，呢兩個sector亦成為資金避難所，相信踏入11月下旬，呢兩個sector會繼續硬淨。承接上期講冠捷（903），產能、收入極高，盈利、市值極低，放血式削成本令季度業績虧轉盈，投資者投反對票，結果周五冠捷股價跌3%。不過，以下幾點值得留意。第一，業績反映大削成本，冠捷係能夠賺錢，年度市盈率變番只得6倍。要令呢間公司重返大公司行列，當然十分難，但由於基數超低，所以改善空間極高。第二，公司唯一執董係72歲嘅宣建生，一位老人家霸住咁大間公司嘅董事會，自然轉身、轉型慢。不過，既然宣建生年紀老邁，總有一日退下來搵人接管，既然董事會冇其他董事，冇接班人，睇嚟最終好大機會賣盤收場，公司有嘅係根基。第三，冠捷6月底現金加存款唔夠5億美金，長短計息負債加埋5.6億美金，削減成本後，上半年經營現金流2.37億美金，睇嚟好快變淨現金公司。財政健全其實有好有唔好，因會令賣盤逼切性減低。呢隻係長期備忘股，情況同百盛（3368）差唔多，但論潛力冠捷高得多。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161121/19840168
智取大市：年底冇得輸劇本
1 :
GS(14)@2016-12-07 07:56:27年尾流流，戰友倉位隨住股票價格喺海中央浮吓潛吓。不過，未來一個月較大機會發生嘅兩個劇本，第一係繼續浮潛，第二係慢升，排面睇坐和望贏。經歷過美國總統大選、意大利憲法改革公投，兩隻所謂黑天鵝出嚟都隊唔冧個市，年尾前美國加息又已經全面反映，點解跌嘅機會細？第一，悲觀嘅人理應喺黑天鵝過程之中沽咗貨避險；第二，今後一個月，可謂今年內少有毫無不明朗因素嘅時期，大戶理應好好把握炒上機會。弱極，咪又係唔上唔落咁，拉勻都係和。意大利公投後嘅周一，港股普遍下跌，明顯試探外圍股市反應，所以當日有點沽壓，點知夜晚外圍唔跌，港股周二就收復失地。銅鋁鋼繼續係主力，細價股為副。現貨銅喺每磅2.7美金出現阻力，但11月嘅14連升、急漲三成之後，再三反覆上試2.7，向上動力非常充裕，除銅價之外，睇嚟貴金屬價格向上機會亦較大。鋁股周二比起江銅（358）更明顯發力，中鋁（2600）喺特朗普當選頭兩日，有資金湧入炒上破頂，其後以反覆上升取代整固，嚟緊似發動第二輪攻勢。俄鋁（486）槓桿比中鋁更大，一樣可取，4蚊可成首個目標。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161207/19857136
智取大市：中資有少數贏家
1 :
GS(14)@2016-12-24 10:41:21上期講到中國金融系統病入膏肓，中央當然唔係儍，面對如斯境地，即使金融問題解決唔到，都盡量阻止流入實體經濟。究竟用咗乜嘢方法？有冇效果？中央呢幾年已經試圖將金融系統同實體經濟融資市場分開，中央以強權作為籌碼，換取內銀向部份有發展潛力行業進行財務支持，令個別行業能夠面對正常融資環境，例如「三農」或小微企業達到一定比例嘅銀行可獲更低存款準備金率，方向正確，但後來一樣有人破解咗，例如利用受惠行業嘅公司殼，造假獲取融資，另一方面，資金繼續傾斜去大企業、有高官背景嘅關連人士，貪腐問題始終成為解決中國金融問題嘅絆腳石。中央出盡九牛二虎之力，避免實體經濟被金融問題感染，較有建樹嘅地方，係令到少數行業、股份能夠喺搖籃之中跑出，唔會一籃子中資企業全部GG。長遠選股就要揀擇，因為多數股票差、少數股票好，贏錢有難度。
Google旗下無人駕駛項目Waymo計劃同本田合作，喺後者嘅測試車隊進行測試。昂納科技（877）近年發展傳感器及光雷達業務，預期無人車用嘅光雷達將喺2018年後應用，有機會食正無人駕駛消息，加上股價喺3.4元附近似乎築底，應該係一個唔錯反彈機會。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161223/19873871
智取大市：強美股係2017重大風險
1 :
GS(14)@2016-12-30 02:05:24之前一連三期講完中國因素點樣影響2017年港股，就輪到講美股……不過，特朗普當選後美股急升，打到亂晒章，2017年為免睇多錯多，寧願從技術分析出發。目前美股絕不能估頂，只知道每逢大升市頂部必有嚴重超買訊號出現，所以一日未見RSI嚴重超買，都要假設美股會繼續升。去到2017年上半年，相信有兩種現象繼續出現。第一，美股升，港股未必跟；美股跌，就會跟到足。換言之，港股繼續跑輸美股。另一種現象，就係越嚟越多人同你講，要all-in美元資產，亦有更多人會將MPF轉晒去美股基金。唔炒股嘅人都叫你買美元資產，就係美股長期升浪尾聲嘅徵兆。除咗圖表、相反理論比特朗普本人更可信之外，估值亦需要一睇。當標普500指數市賬率賣緊2.92倍之際，恒指市賬率只有1.13倍，價格反映兩者一切利好利淡因素，估值差距離值得再擴闊？長遠絕對成疑問，須知道標普500指數2.92倍，係非常接近2007年牛市頂部嘅市賬率3倍水平，換言之，長線絕對偏貴。短線嚟講，喺美股樓上冇蟹貨，買盤動力充足，一定升得勁過港股，但長遠投資嘅話，美股貴，向下風險一樣唔低。2017年港股面對兩項重大潛在風險，第一，內地樓市爆煲，第二，美股估值過高繼而進入熊市，係咪一定2017出現，都仲未知。咁2017年買股點做好？下期嚟一個總結。最後提多句市況，恒指反彈179點，喺中國國債問題淡化，加上美國加息因素已反映喺股市上，不明朗因素出得七七八八，相信嚟緊1月市況會唔錯，可坐貨等反彈，希望能升至接近23000點。晉佳
http://fb.com/advanceguy1
來源:
http://hk.apple.nextmedia.com/financeestate/art/20161229/19879517
智取大市：2017低吸三件事
1 :
GS(14)@2016-12-30 08:13:09係時候總結過往幾期內容，訂出明年策略。上期總結咗來年最大潛在風險因素係內地樓市爆煲，同埋美股牛轉熊，除呢兩項因素外，其他如內地水緊、違約、人民幣貶值等未必形成真危機，反而能成為低吸炒波幅嘅機會。例如近日港股已反映國債「假章門」、美國加息等不利因素，後市有望轉趨風平浪靜，面對美股調整，周四港股都跌咁少，似乎有買盤吸納，係博反彈時機。第二點要注意，來年美國八次議息，當中可能會加息三次，相信會令升跌市周期縮短。倘若2月初加息，就可以話掃除不明朗因素，唔加息亦可能對市況有即時刺激，大戶有藉口舞高再出貨，換言之，1月係唔驚美國息口因素嘅月份，有利股市。以後每次議息前，要重訂一次策略。第三點，明年上述模式未必能重覆使用，萬一內地樓市明年急跌，或者美股大跌，候低吸嘅策略就不管用，尤其面對內地樓市急跌嘅話，一定要清貨之餘，仲要小注高槓桿造淡博爆煲劇本出現，至少用嚟hedge住份工。通達（698）由2.4元樓上震到落差唔多1.8元，然後大股東連續增持幾日，股價開始回穩，基本因素冇變，收入繼續升，可視早前大調整為錯價，現價可一博。
晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161230/19881018
智取大市：港股一月博盡？
1 :
GS(14)@2017-01-05 07:59:412016年震盪市場事件確實多，仍搞唔冧港股。2017年，美股高不可攀，中國樓市繼續玩倒數，二選一危機喺2017年隨時爆發，時間越推遲，危機感越大，幸好呢兩個因素未喺年初發酵，加上美國加息已部份消化。與此同時，呢個時候唔少人仍然抱住危機心態去睇港股，唔敢揸太多貨，同時喺恒指市賬率1.2倍唔夠嘅低估值之下，種種因素有利港股，1月份最有機會成為港股2017年裡面天朗氣清嘅日子，暫可睇高一線。今年機會未必多，大戶抱住今日唔知聽日事心態，一有機會梗係博得盡，升勢未必弱，所以呢段時間值得持貨一博。坦白講，2016年測市能見度低，2017年，同北京霧霾能見度冇乜兩樣，最多能睇一兩個月內嘅事，所以暫時只睇好港股到2月初。每次市場感覺良好、令人覺得可以安全入市時，反而係食糊嘅時候。金風科技（2208）12月7日公佈，同蘋果合作風電項目，翌日裂口高開一成左右再以陰燭收市，然後股價反反覆覆，2016最後一個交易日，股價先至突破12月8日高位，似乎開始轉強。單嘢證明蘋果覺得，金風質地同執行能力唔錯，而又冇乜反映過喺股價之上，所以買得過。晉佳
http://fb.com/advanceguy1
來源:
http://hk.apple.nextmedia.com/financeestate/art/20170103/19884410
Next Page