裸露短褲 左丁山
2008-10-10 AppleDaily
金 融海嘯發生之後，一個常見嘅英文字就係short，中文意思係沽空、拋空咁解，沽空有借貨沽空，有無貨沽空，前者係對沖基金睇低銀行Ａ，但手上冇貨，於是 透過證券商搵到保險公司借銀行Ａ嘅股票，畀番利息，在市場上沽售，等股價跌到咁上下，就在市場以低價買回，攞番股票，還畀保險公司。保險公司買銀行股票作 長期收息用，收埋幾十年唔賣，久唔久借出嚟畀人沽空賺取利息，即係收完股息又收利息，增加回報，幾好搵啫。無貨沽空英文叫做naked short，對沖基金可以指鼻哥沽貨，夠晒勇，但如果畀人睇穿，或者基金睇錯市，畀對手挾空倉，自己冇貨交收，咁就好危險，例如對沖基金沽空福士汽車就輸 到貼地。
（按：VW福士自九月十八日後升咗27%，成為全球市值最大之汽車公司。）呢日睇文字大師William Safire講英文，標題係"How can you be naked wearing shorts?"（十月六日IHT），為之大笑，一解日間追蹤財經新聞之緊張！此標題或可譯為「穿上短褲，何來裸體」，英文雙關語用得十分巧妙。
現在歐洲 美國都已暫時禁止所有沽空活動，國際大市場之中只有香港仍然容許借貨限價沽空，證監會算係幾有原則性。諷刺嘅係，呢個時候中國證監會提出容許做孖展及沽空 當係救市措施，似係搞笑啫啩。沽空是否害死股市？其實不可盲目亂噏。彭博統計過，九百六十九隻禁止沽空金融股，曾經一日之內跌咗4%。又如美聯銀行 （Wachovia Bank）在九月二十九日一開市就跌咗九成，喂，已經唔准沽空咯喎，仲跌得咁快咁慘？理論上，有學者反對禁止沽空，陳家強局長嘅弟弟陳家樂，係科技大學財 務學教授，就曾在《信報》撰文指出沽空冇問題。實務上，英國不止一位對沖基金經理，非對沖基金人士反對禁止沽空。
對沖基金唔可以沽空就不成對沖基金，活動 陷於停頓狀態，將有不少對沖基金人士失業，投資者贖回基金迫使基金洗倉，為一個不穩定市場增加更大嘅沽售壓力，直至好多對沖基金清倉完畢，停業為止。不可 不知，對沖基金全球管理萬幾億美元，佢哋大大收縮之後，全球股市少咗好多購買力，不利股市反彈回升。
任總之言 左丁山
2008-10-11 AppleDaily
雷 曼兄弟破產之後，世界金融體系走入一個向下旋轉循環，銀行系統備受衝擊，現在連英國都緊急向英國銀行注資，包括RBS、巴克萊、Lloyds TSB三大，滙豐亦有資格向英國財政部伸手，但滙豐已經話咗唔需要。滙豐嘅一級資本比率有8.8%，高過晒英國大銀行，在世界級大銀行之中，算係數一數 二，當然香港本地銀行嘅資本比率仲高，例如東亞銀行嘅比率超過14%。去年十月，左丁山應邀到一個獅子會午餐會演講，評論次按危機，點知有獅子會獅兄問冧 巴，要左丁山講一隻「避風塘股」，當時毫無準備之下，提議買滙豐，認為滙豐可升可跌，但會跌得少啲。
眨吓眼，一年已過，滙豐從高位回落三成多一啲，但恒指 唔見咗五成幾，其他世界級銀行股跌到四腳朝天，叫做勉強過關。任總裁話外面風大雨大，請香港人唔好自亂陣腳，好啱聽！香港銀行系統比外國穩健，皆因銀行貸 款比較保守，炒賣CDO等字母湯產品比較少，故此撥備亦都少啲，不致影響資本比率。以前有議員政客話本地銀行睇磚頭做事、太過保守，實情係佢哋唔知自己講 乜，亂罵一通而已。又有人高呼任志剛下台，當然係亂噏，純粹民粹主義，任志剛明年退休，有晒程序，係正常人事更替，但在呢個關鍵時刻叫任總下台，純粹係搞 局，有破壞冇建設。
任總喺星期三早上發表談話，加多一兩句，呼籲媒體及政界、政府以持平客觀態度，看待及評論金融危機，此乃經驗老到之言，政客、記者、評 論員之中，好多唔識金融經濟，易陷入民粹主義，寫評論有感性，少理性；有激情，少思考；有建議，冇數據，冇理論；總之睇落牙煙，相信任總係有感而發。外國 有緊急措施，提高銀行存款保障上限，愛爾蘭更保證所有國有銀行存款可得百分百擔保。於是有人話香港點解唔提升存款保障，此問題可以討論，但千祈唔好鬧政府 反應慢，冇準備！孫柏文，李兆富等，勤力啲寫番幾篇解釋吓啦！
股災教訓官民 左丁山
2008-10-13 AppleDaily
環 球股災，散戶股民好容易變成住在「機構內」的投資者（institutional investor）或跳出視窗（jump out of windows），眼白白睇住自己啲現金流入坑渠，對住經紀（broker）講一句：「I am broke（我冇錢咯）。」經紀回應話：「最衰係誤信信貸評級公司，Standard & Poor makes you poor（標準普爾令你窮）！」算了吧，走入大熊當道嘅「注意熊出沒世界」，成為大熊點心便是。想想一九七四年，唔少股民入咗青山或者跳樓，歷史不過重演 而已。
見到國情專家Ｌ，問一聲：「國家坐擁一萬七千億美元外滙儲備，美國愁對十萬二千億美元國債，點解祖國唔出面救市，救吓Ａ股、Ｈ股，順便救埋港股？」
專 家Ｌ話：「你有所不知，中央去年嘅政策係『教育股民』，今年嘅政策係『教訓官民』，明白未？」唔明噃，願聞其詳。專家Ｌ再解釋：「中央認為中國中產階級仍 然係少數，咁多中產熱衷炒股，必須教訓吓，等將來更多中國人富裕起來之後，唔會盲目炒股。況且炒股熱火會成為官商勾結、洗錢、貪污工具，高官識貪，芝麻官 識搶，Ａ股大地震之後，呢排貪官先知道洗錢不成反遭套牢，慘過遊刑也。」
咁有深度嘅解釋，仍然難明。難道中央置股民於不 顧？專家Ｌ話：「中國股民大部份係將餘錢炒股買股而已，佢哋唔怕套牢嘅。短炒變長揸，一樣得，唔會死得人。但另外一批投機人士裏通外國，與外國資金合作， 引外資入中國，開人頭戶口炒股，佢哋套牢咗就會令啲外資慘受教訓。問佢哋以後敢唔敢再搞中國？」因有外滙管制，外資經非正式渠道入咗大陸，放在股票上，成 為「非流動資產」，適逢祖家要撲水應急，確實焦急到死，飽受中國式教訓。專家Ｌ話中國唔會輕易幫美國脫險嘅，幕後要傾妥好多條件至得，譬如中海油以前要買 UNICO，美國國會多多事幹，阻住唔畀買，現在仲唔趁機講明，以後中國要買邊一間美國公司，美國唔好再次阿支阿左！但又適逢喬治布殊已係全跛鴨，冇資格 應承中國任何條件，等到奧巴馬上台先至算啦！
救市有待 左丁山
2008-10-14 AppleDaily
昨 日講及喬治布殊已成跛鴨，講說話已無權威性，佢嘅任期到○九年一月新總統上任為止──距今只有九十日左右，邊個會睬佢呀！《紐約時報》有報道談及上次大蕭 條係一九二九年開始，一九三一年法蘭克林．羅斯福上任之前，共和黨在任總統胡佛對股市大跌、銀行陷入危機，束手無策，後來想到一條橋，就係宣佈銀行放假， 相等於暫時銀行停業，希望美國人冷靜下來，不去銀行提款。胡佛想拉埋羅斯福一齊宣佈，以示共和民主兩黨團結救國，加強權威性。
但羅斯福挑通眼眉，一於唔畀 面，一口拒絕，胡佛氣到七竅生煙，與羅斯福面左左，但自己唔敢宣佈。羅斯福上任後不久，立即宣佈銀行假期，抄胡佛嘅方法，但因為佢受人民歡迎，權威性高， 竟然生效。
由此可見，在美國制度下，新總統還未上任，已經唔會睬離任總統，何況現在奧巴馬仲未當選，點會睇布殊台戲吖；結論係，在未來三個月，美國不會上 下一心，美國政府與國會不會團結，什麼救市措施如要產生效果，有待奧巴馬上台，何況保爾森嘅七千億美元方案，未實施已要修改o忝！
點解唔係麥肯上台？皆因 此君嘅民望，愈來愈落後，除非有奇蹟出現，或者美國白人選民真係口講人權，心講歧視，到投票日不投奧巴馬一票。
如麥肯入主白宮，美國啲自由派與黑人豈不怨 憤之極，難與共和黨共事了。麥肯最令人失望嘅係在金融海嘯之時，拿不出一套可行方案，在市場與干預之間搖擺不定，邊有領導才能呀，抵佢輸啦，佢競選時要求 支持者尊重奧巴馬，可知佢已打定輸數。但左丁山同時亦唔睇好奧巴馬上任後之美國經濟。奧巴馬會加稅，增加公共支出，傾向貿易保護主義，更會趁海嘯之後，加 強監管與干預市場。目前雖然好多人話資本主義已死，美式市場主義失靈，民心回歸政府權威，以至國有化。但過去百幾年經驗證明，計劃主義、干預、國有化等等 只會窒礙經濟發展，破壞性大，呢套民粹主義為本嘅政策初期受人民歡迎，慢慢就會怨聲載道，美國經濟邊會真正向好吖？
可疑放料 左丁山
2008-10-15 AppleDaily
雷 曼風波未平息，突然間有不明動機之人向報紙放風，指二○○三年間港交所有一名高層曾提交報告，指當時開始流行嘅ELN（股票相連票據）產品可能受操控，衝 擊聯繫匯率。於是對金融事務並不熟悉嘅何俊仁議員對《信報》講（十月十一日），如果報告屬實，則證明有關方面粗心大意，罔顧風險。呢份所謂報告，不知是否 官方或內部文件，在呢個時候向報紙發放（《信報》有影印），疑點多多，最妙嘅係港交所回應：「沒有聽說過」，證監會回應：「不知道有關報告」；金管局回 應：「不評論不知道來源的資料」。據講呢位所謂港交所高層寫報告後，不足一年就離職，唔通呢位高層心有所不忿，啱啱見到雷曼爆煲，於是發放資料，證明自己 確係有料？
左丁山就平時好討厭「匿名信」投訴呢回事，如呢位仁兄確係前港交所高層，不妨大膽啲企出嚟，以真面目示人，幫民主派添點火藥，攻擊政府監管不力 吖，如果份報告全文發表，等我哋評價吓是否寫得好，寫得有道理，直情有益社會o忝。呢幾年結構性產品數量激增，聯繫匯率穩如泰山，全無證據顯示有甚麼國際 投機人士衝擊港元，已可證明呢位前高層嘅判斷錯誤，雷曼迷債風波動不了市場，過去五年來，左丁山知道不少人專買ELN產品，賺到笑逐顏開，唔知幾和味。買 ELN係博（一）股市上升；（二）股市牛皮靠好，即使跌市亦不跌超過一成。呢兩種情況在二○○三年沙士低潮之後，一路去到二○○七年十月，完全啱晒，故此 買ELN者，笑到四萬咁口。
最弊係物極必反，大市一旦下跌十幾個巴仙，買ELN者被迫接貨，跟住股市大熊當道，梗係中招啦，故此過去幫人賺錢之產品，o依 家成為殺戮工具，事實上，如果雷曼冇破產，買雷曼ELN嘅仍可接貨死守，未必血本無歸。雷曼事件之要害在於雷曼破產，不在乎其產品之複雜性（雖然真係幾複 雜），何俊仁明白未？事實上，o依家市場上還有大量非雷曼ELN，持有人接貨嘅機率非常大，投資者要自己負責風險。
估馬易過估值 左丁山
2008-10-16 AppleDaily
上 星期日沙田有婦女銀袋賽，由莎莎贊助，大派入場禮物，於是一如過去幾年，由早上十時開始，入沙田馬場之馬迷，川流不息，卒之入場總人數超過七萬人，盛事 也，可見莎莎婦女銀袋賽已成為近年受歡迎嘅賽事，每季與國際賽，年初三新年賽與打吡賽可堪比較，而最有特色嘅，就係好多入場女士特別扮靚，戴靚帽不在話下 啦，今年沙圈所見，穿低胸裝女士更多，圍在沙圈嘅馬迷睇人又睇馬，可謂目不暇給。居然碰到賓架W，乜咁得閒呀？佢話吊頸都要透一口氣，呢排畀雷曼兄弟累埋 啲銀行兄弟所賜，工作時間長到不得了，星期日本想在屋企瞓覺，點知聽到梁副局長在電台講話政府會用盡或盡用彈藥嚟保住香港，於是成個人都緊張起嚟，索性入 馬場減壓；果然，佢坐在廂房外看台，望住一片空曠嘅彭福公園沉思，見此情景，費事問佢攞貼士咯。
隔咗幾場後，問吓賓架W有關雷曼迷債如何估價？佢哼一聲： 「勢估唔到雷曼會破產，留下一大堆蘇州屎，全世界嘅基金界，銀行界有幾年麻煩，而且CDO，CDS呢類衍生工具市場亂晒龍，邊度有人知道啲抵押品值幾多錢 呀，政府話投資者可以攞番六至七成，未免太樂觀，如果兌現唔到，政府就係自找麻煩。搵邊個做估值啫？政府唔識，會計師唔識，精算師唔係嗰皮，以前我哋係搵 番投資銀行做財務顧問兼估值嘅！之後核數師再比對其他嘅估值，先至下定奪，現在冇投行啦，冇投行敢做財務顧問啦，試問搵邊個去估值，你估邊隻馬贏婦女銀袋 賽就易好多！」不如搵啲立法會議員估值，佢哋估100%面值不變，銀行照賠，掂唔掂？最好係全港所有散戶向銀行買嘅所有投資產品，包括股票在內，都以去年 十月恒指三萬點嘅市價估值，全由銀行一次過贖回，掂過100%啦，至於銀行因為咁而損失有幾多，根據mark-to-market方法入賬，點樣撥備，如 何影響銀行股價，以至對銀行資本比率嘅影響，關人鬼事咩。
航運海嘯 左丁山
2008-10-17 AppleDaily
星 期三夜馬，在馬場碰到船公司老闆Ｃ。老闆Ｃ平時對賽馬有興趣，但入場次數比較少，因為成日出外公幹，拜訪貨運大客戶，未必搵到星期三晚與星期日到馬場一行 也。馬季開鑼後，已經碰見佢三次，於是問佢：「今季為何入場次數多咗？」老闆Ｃ話：「橫掂生意太淡，出埠公幹都係蝕皮啫，留番響香港好過，真係有料到先至 飛啦。」
聽老闆Ｃ講，好多人注意金融海嘯，美國標普500今年跌咗四成，香港恒指以三萬二千點計，從一年高位回落五成，慘嘞啩，但係波羅的海乾散貨運指數 從今年高位一萬二千點跌到星期二（十月十五日）嘅1615點，剩番唔夠14%咋，與股市相比，航運價格何止碰上海嘯，直情係十級地震，船公司如過去貪心， 唔肯簽長期租船合約者，死到直晒。影響所及，船公司就向造船廠扭計，想取消一兩年前嘅訂單或延遲收新船，用盡一切方法拖延。航運好倚賴國際貿易，進出口業 蓬勃嘅話，航運就會興旺，但如果美國削減買入外國貨，中國削減輸入巴西鐵鑛、澳洲煤嘅話，船公司就遭殃。
今次之災害，先係美國房地產市場下滑，次按斷供， 跟住銀行收樓、撇賬，次按債券市場爆破，連累投資銀行，反過嚟拖累銀行，跟住一發不可收拾，引發金融海嘯，銀行為求自保，拼命收緊貸款，不願借錢出去。各 行各業一向倚賴銀行貸款，突然之間「斷奶」，有乜辦法唔收縮呀。
老闆Ｃ話：「《金融時報》有一段報導，令我感同身受，就係一間公司本已卜好一條船運貨，但 公司畀銀行cut line，開唔出信用狀買貨，於是公司無貨可運，船公司亦無計可施。講法律爭拗呀，留番拜山至講啦，目前就係冇生意怎麼辦？」答案又係搵政府？
一位 Wharton School財務教授在《金融時報》撰文提議政府央行擔保私人貸款（private lending），真係匪夷所思，如果要香港政府擔保中小企向滙豐借錢，此是什麼世界？唔怪得老闆Ｃ頭腦好亂，到馬場諗吓邊隻馬可以贏，反而唔會諗到神經 錯亂。
德國雷曼票據 左丁山
2008-10-20 AppleDaily
陶 傑寫外國先例，十分幽默。香港人甚為崇洋，講經濟文化、政治、建築等等，總以外國先例為大道理，政府亦一樣，講乜都話外國係咁咁，例如環保、碳排放。特區 政府只有一件事不敢引用外國先例，就係民主選舉及取消功能組別。金融方面，最近又有人指責香港證監會仍然准許沽空，大大聲話歐美都禁止沽空咯，點解香港唔 禁止？當然亦有雷曼迷債，口口聲聲話外國禁售予散戶，香港唔禁，就係任志剛監管不力。
十月十六日嘅《國際先驅論壇報》第十一頁有篇報導，成日引外國先例嘅 崇洋人士不妨睇真吓。據報導，德國亦有雷曼風波，雷曼在九月十五日宣佈破產後，德國散戶投資者，其中好多係退休人士，發覺佢哋買入咗一間公司發行嘅 Zertifikate即係英文certificate（證書、票據），法律上屬於bearer bond（不記名債券）類，呢批票據係由雷曼兄弟擔保嘅，雷曼執咗，無人認頭，估計六萬名德國散戶中招，五億歐元（約五十餘億港元）就咁蒸發咗。
德國市場 上，類似票據充斥，共有三十四萬種，發行量高達一千三百億歐元，全世界最多最大。德國人一向性格保守，唔鍾意冒險，所以德國啲街坊儲蓄銀行以「低風險，高 利息」包裝嚟努力推銷不同種類票據，買中雷曼票據嘅就最唔好彩，有好多雷曼苦主就係聽銀行職員講而買入嘅，情況與香港非常相似。實質上，德國市場流行嘅票 據完全係衍生工具結構性產品，甚為複雜，但過往投資者收息收得高興，無人理會，呢次雷曼破產嘞，德國散戶先至如夢初醒，睇真吓張cert原來係結構性產 品。
雷曼票據在德國市場佔好少份額啫，比例上微不足道，但都有六萬散戶損失五億歐元吖，點解唔見德國監管當局、德國財長、總理出嚟發話呢？德國國會議員又 唔指住德國央行行長嚟鬧呢？呢啲就係外國例子嘞！報導說德國散戶依法辦事，搵律師投訴/控告銷售銀行誤導，要求賠償，德國央行至今未曾要求銷售銀行回購雷 曼票據，因此例一開，一千三百億歐元票據如何處理？
泰林結業銀行更緊 左丁山
2008-10-21 AppleDaily
泰 林電器突然全線結業，令人意外。泰林已有六十年歷史，左丁山係細路仔之時，已知道泰林賣靚嘢，賣貴嘢，咁老字號，久經風雨，歷六七暴動，八七股災，九七金 融風暴，○三沙士而不倒，唔通今次抵唔住金融海嘯？思之令人遺憾。亦驚係一葉知秋，零售業生意難做，○九年好難捱，尤有甚者，泰林欠債一億元，拖數不少， 供應商有大損失嘅話，可能骨牌式倒下，牽連更廣。
退休商家P已不問商事，只在文化藝術教育方面下工夫，到香港大學教MBA，樂得逍遙。泰林 倒閉前一日，佢請左丁山到電氣街食法國餐，話明法國鄉間風味，絕不扮嘢。P老哥係熟客，叫法式燒豬、雞炒飯、西班牙火腿，加上甜品，果然正到無倫，左丁山 好耐冇食過咁靚嘅西餐。但係，可惜吖，成間餐廳，只係得我哋兩個人食午飯，兩個鐘頭內唔見第三個客人行入內，餐廳點維皮呀？後來先知道，餐廳係老闆自置物 業，一於唔使驚喎。
市道如此，租金應該下調至啱，但前星期聽一位商舖代理在電台講，業主仲未肯減租，亦有人願意承租，真係 奇哉怪也，大概香港啲業主好有銀，彈藥充足，以前搵長咗都唔定。不過食完飯後，因食得太豐富，決定由灣仔行返中環，以助消化，咁啱在金鐘站附近碰到賓架 M，佢話到太古廣場call客，左丁山笑佢：「係唔係探聽軍情啫啩，驚公司老闆唔見咗呀？」賓架M為之苦笑，佢話：「兩樣都有啲啦。現在稍有差池，就會走 數，唔勤力啲睇住客戶盤生意都唔得。不過九一一之後，借貸文化有改變。我師傅話八三年佳寧風暴之時，好多客戶唔掂，啲老闆主動搵銀行搭救，希望債務重組， 他日翻身，所以師傅做過好多單債務重組案。但o依家就唔同，有啲公司老闆走上嚟，聲大大好輕鬆咁話，我哋好唔掂嘞，會申請破產，你哋銀行睇吓點做啦！」 吓，有咁嘅事，唔怪得賓架M話辛苦過師傅，老實講，如果啲老闆冇簽私人擔保又唔講面子，全無牙齒當金使呢套古老道義作風嘅話，一走了之，確係幾輕鬆。既有 如此情況，明年銀行唔收緊信貸，吾不信也。
She輸大錢 左丁山
2008-10-24 AppleDaily
中 信泰富為咗對沖澳元上升風險，竟然變成炒濃外匯，已兌現損失八億零八百萬港元，未兌現損失一百四十七億港元，真係唔知點收科，只有望上天打救，希望澳元回 升，唔好再跌，否則損失之大，隨時超過二百億元。中信泰富發行二十二億一千五百萬股，外匯唔見一百五十五億，即是每股損失七元，停牌前收十四元五角二仙， 停牌後跌咗八元，收市報六元五角二仙，雖然已經徹底反映咗，但十月二十二日跌到四個九，顯然就係市場向中信泰富嘅懲罰式反應。與五十二周高位四十九元九角 比較，股價唔見咗四十五元，市值蒸發996.75億元，榮智健主席揸住十九巴仙，佢個人身家損失189.38億元，得番二十點六億元，不能稱為大富豪咯， 但金錢損失事小，面子損失事大，以後榮公子返回北京、上海，點樣見人，要中信北京打救噃！榮氏家族顯赫數十年，歷史耐過新中國，估唔到旗艦企業要畀證監會 調查，慘情也。
十月二十二日參加「香港明天更好基金」與亞洲協會聯合主辦嘅午餐會，演講人大有來頭，就係美國財政部副部長 David McCormick，萬麗海景酒店宴會廳人頭湧湧，財經界猛人雲集，記者都有幾十人到場。點知與啲朋友一傾起，人人都講中信泰富，唔講金融海嘯與美國財政 部，無他者，中信泰富之澳元、歐元Accumulator新聞實在夠震撼，個個都想知道點解，為何范鴻齡身為行政總裁，竟然唔知？在座一啲總裁級人馬與前 投資銀行合夥人都認為匪夷所思，難以置信。一位資格夠老之主席級人物就陰陰嘴笑：「中國人家族企業積習難改，做太子/公主太傅嘅，有時下場悲慘！擺呢哋做 太傅嘅位，你哋就知道難捱，讀哈佛MBA唔會教你！」人多聲雜之中，忽然聽到一個she字，she與「輸」差不多同音，「she輸咗大錢」，唔係講「佢輸 咗大錢」，內有玄機噃，左丁山聽咗，打個突，立即周圍望，但冇法子知道係邊位仁兄仁姐講嘅。於是問吓隔籬一位經濟學專家，「she輸咗大錢」有何微言大 義？專家瞪咗左丁山一眼：「使唔使畫公仔畫出腸呀？」諗落又係，自己唯有收聲。炒外匯十分危險，喺十月二十一日，彭博報導中信泰富新聞之時，同時講到巴西 有三間上市大公司在外匯上嘅損失達到二十三億美元！
Next Page