CEO性格害死雷曼 左丁山
2008-09-19 AppleDaily
金 融風暴掛上十號風球，此颱風名為雷曼，吹到全世界股市散晒，星期一早上睇彭博網站，已知美林會賣畀美國銀行，而雷曼兄弟則求救無門。到了中午，收到記者消 息，話香港雷曼兄弟嘅僱員開始返公司執拾私人物件，雷曼彎梗咯，全個亞洲股市（香港、日本、南韓都放假休市）跌倒一仆一碌。
星期一晚上睇CNN，美銀主席 劉易斯與美林總裁John Thain見記者，立即打電話畀美林一位老友，安慰幾句，老友話：「好消息係美林唔使執埋。壞消息係畀美國銀行買咗！聽天由命啦。」老友C在美林認股權上 損失慘重，好彩仍然睇得開，保持幽默感。美國銀行呢三十年來努力退出國際市場，好似喺香港咁，極少極少人士知道美國銀行今天在香港做緊乜嘢生意。
中環「美 國銀行中心」只係一個名字，美國銀行在「美國銀行中心」嘅唯一資產聽講係一個車位而已。美銀咁鬼內向，幾乎係美國鄉下人家，趁低價買入一家國際化到極嘅美 林證券，公司文化方面有好大衝突，磨合期間會有不少磨擦。雷曼申請破產保護令，其市場交易地位已被凍結，對左丁山冇直接影響，但一位在雷曼東京嘅老友已達 退休年齡，因鍾意工作，鍾意東京，唔想退休，點知今次一煲蹺起，佢啲退休金如何呢？
教左丁山為佢唏噓不已。星期一早上碰到靚女L，佢晨早就面黑，原來佢積 累一批雷曼擔保嘅迷你債券作收息用，不知可否收回本金。跟住收到女士Y電話，好緊張咁問AIG Accrual Notes以及雷曼嘅結構產品。唉吔，唔識噃，啲老友好杰呀。雷曼總裁Richard Fuld，做咗十五年CEO，對雷曼忠心耿耿，而且做咗近四十年，認為雷曼好有價值，所以點都唔肯承認雷曼有問題，更認為貝爾斯登與雷曼冇得比，雷曼唔會 變成貝爾斯登，故此與南韓KDB（韓國開發銀行）談判時，堅持售價不能低過book value（賬面淨值），韓國人梗係唔制啦，於是拉倒。
Fuld（富爾德）嘅寧死不屈，寧為玉碎之作風害死所有夥計，於是《金融時報》專欄一個標題係 「Hubris - is thy name Richard Fuld」，自大狂、自戀狂、自負過高，CEO個人性格可以害死公司，害親全世界！
國有化AIG 左丁山
2008-09-20 AppleDaily
美 國政府點解救AIG而唔救雷曼兄弟？顯而易見嘅理由係AIG擁資產一萬億美元，業務遍及歐美亞洲，為無數普遍平民提供壽險，如果一旦破產，各地政府為咗國 民利益，必定爭相凍結AIG嘅子公司（AIA）嘅資產，引發無數官司，訴訟經年，諗吓都令各國政府頭痛。
《華爾街日報》曾經報道，美國財政部之救房利美、 房地美，背後受亞洲國家央行所影響，因為冇一間央行唔持有兩房債券也，故此美國財政部宣佈接管兩房之後，亞洲央行負責人（包括中國周小川）都一致讚好，發 言表示支持。你估背後冇人做導演嘅咩，一啲權威人士就係收到美國請求之後，公開大力支持美國救兩房嘅。雷曼兄弟破產，連累美國最大嘅Reserve Primary Fund要為雷曼債券撇賬七億八千五百萬美元，導致每個基金單位價跌至一美元以下（即是呢個貨幣保本基金不能保本），投資者於是蜂擁贖回，令呢個基金大縮 水，由六百四十八億美元減至二百六十億美元以下，並且宣佈限制贖回，長達一個星期咁耐。
雷曼尚且如此，你話AIG破產，後遺症之大，難以想像，故此聯儲局 雖然老大不願，還是要出手救援，提供過渡貸款八百五十億美元，利息係LIBOR+8.5厘，兩年內可轉換為AIG股票，一旦轉換，美國政府會擁有 79.9%股權，換言之，原AIG股東嘅股權攤薄晒，蝕到眼光光，如此救市不救人之模式，人者，即原股東及原管理層。AIG嘅行政總裁上任冇耐，就要鬆 人，美國政府派人接管AIG，破天荒創歷史──美國國有化一間巨型私人企業。
今年係美國大選舉，奧巴馬陣營趁機大罵布殊政府無能，直斥麥凱因係布殊一幫 人，間接壓迫美國政府救AIG，其他公司如果冇AIG咁嘅影響力，唔好幻想美國政府會有動作。AIG在前主席Greenberg主政期間，同時捐款畀共和 黨與民主黨，與國會議員及白宮主人維持良好關係。美國與馬來西亞政府談判WTO時期，堅決要求馬來西亞開放保險業予外資企業，其實呢啲所謂外資，就係 AIG。美國傳媒當時報導美國談判代表團嘅保險界顧問，就係AIG嘅僱員！美國政府曾視AIG為國寶級公司也。
小小笑話 左丁山
2008-09-22 AppleDaily
游清源一篇「搓our breast」轟動中環，OL到處傳閱，於是捧紅新科議員陳克勤，紅過李克勤o忝，左丁山用iPhone按入YouTube，立即有得睇陳議員發言。呢個年頭，要走紅並不容易，克勤仔好，講一段英語，就立即無人不識，果然係民建聯後起之秀。
中環周圍有人講英語，一人真係講得好掂，令人傾服，但亦有不少人講寫英語係咁意，照樣搵到食。呢日中午出門吃午飯，經過一間公司寫字樓，玻璃門內空無一人，應該係全體人員已出外吃飯。玻璃門上貼上一字條：Out of lunch until 2:30pm，不禁失笑。呢間公司老闆係英國人，全部夥計係唐人，何以夥計貼張字條都寫錯英文呀？應該係Out for lunch（出外午膳）先至，Out of lunch相等於「午膳欠奉」或者俗講，「冇晏食」。唐人學英文，最怕前置詞之使用，因為無規可循也。好多中環秘書講慣：「老闆out town」，其實應該係out of town（出門），講得多，以為出外午膳就係out of lunch。
唔少笑話源於當事人不知來龍去脈。譬如九月十九日下午在寫字樓睇now新聞台，講一位前美林副總裁上海講金融風暴，基本上分析正路，左丁山同意佢講法，但now記者唔知根據乜資料，旁述話：「胡××有華爾街神童之稱，三十三歲就成為美林副總裁，係第一位中國人做美林副總裁……」笑話啦，副總裁（Vice President）好高級咩，MBA入投資銀行，五年之內做到副總裁，冇運行。美林之內，唐人副總裁數目，多到數唔清，有乜咁神奇？唔信就問財經事務及庫務局局長政治助理伍潔鏇。伍小姐以前係美林律師，知道美林事務。講起，o依家發生美國金融十級大地震，震央在紐約華爾街，殃及各國各地區，令各地政府窮於應付。呢，香港財經局局長陳家強係財務學教授，副局長梁鳳儀係前金管局高層，政治助理來自美林，正好組成鐵三角，理論與實務兼備，應付金融風暴，佢有信心。之不過政治層面就唔知，譬如雷曼迷你債券事件，令不少中產階級遭殃，為禍慘過Accumulator，政黨追究起，究竟由金管局還是由證監會負責，天曉得。
公司買法拉利 左丁山
2008-09-23 AppleDaily
雷曼之後 左丁山
2008-09-25 AppleDaily
雷 曼申請破產，後遺症多多，北美雷曼已經賣咗畀巴克萊，九千名員工仍然有工做，但入行冇幾耐嘅已經炒咗魷魚，冇乜希望重返公司。芝加哥大學經濟系畢業生小B 去年唔跟同學去紐約搵工，返咗香港做小記者，薪酬少得可憐，與同學冇得比，親戚戥佢唔抵。最近小B決定回多倫多探親，想順道到紐約一遊，諗住十幾名同學在 曼赫頓，住在邊個屋企都可以慳番酒店費，點知一經電郵聯絡，同學全部話佢哋已經執緊包袱返鄉下，離開華爾街投資銀行咯，小B十月份去到紐約，唔會見到佢 哋。小B大失所望之餘，收到父親來郵，寥寥數語：「多謝上帝，你不在華爾街工作！」
話就係咁講，不過以小記者嘅人工，去紐約冇朋友招呼住宿，都幾頭痕o 架。北美雷曼被巴克萊收購，亞洲雷曼傳聞會被野村收購，原本僱員可以鬆一口氣，唔使失業。至於雷曼發行嘅迷你債券，買家使唔使負責呢？仍是一個謎，迷你債 券持有人未必得到賠償。
老實講，雷曼名氣大，有信貸評級，一年前邊個敢話雷曼唔掂呀，中招者好難話當時受蒙蔽嘅，銀行職員推銷雷曼迷你債券時，如果話雷曼 冇風險，應係出自真心。左丁山去年睇報紙廣告，仔細研究一番，幾乎想話認購，後來唔買，純粹因為手頭現金有其他用途，而唔係叻到知道雷曼將來會好唔掂。天 下之事，瞬息萬變，一間一百五十八年嘅老字號，歷經風浪，卒之倒下，直至九月八號都無人相信。最弊聯儲局曾經背書貝爾斯登拯救房利美、房地美，令市場，特 別係雷曼總裁富爾德，錯誤認為到咗最後關頭，都會出手相救。
於是富爾德決定玩占士甸式開快車衝懸崖遊戲，邊個早停車就邊個輸，結局係聯儲局最後唔同佢玩， 富爾德揸住架雷曼跑車就咁衝出懸崖飛墮三千尺。事後好多檢討，指責雷曼董事局根本唔知做緊乜，對旗下產品之複雜性及風險性完全不了解。董事多數係老人家， 點識得數學博士先至睇得明嘅衍生工具方程式吖，總之平時有錢賺佢哋就唔會問，到出咗事，識都冇用咯。柯清輝最可愛，佢話睇唔明次按債券條文，所以恒生銀行 唔買，老實人於是避過一劫。
杯葛毒奶 左丁山
2008-09-26 AppleDaily
香 港時興講品牌，中國大講民族品牌，創造、營造品牌需要經年累月，以優質產品、優質服務為先，宣傳公關、包裝為輔、非一時一日可成。中國商場傳統講貨真價 實；童叟無欺。胡雪巖（參考高陽小說）做生意，聰明靈巧，上下逢迎，過水濕腳，但到咗辦藥材舖，就堅決用真貨，不取巧，重品質，因為佢認為製藥賣藥關乎救 人一命，以假藥賺錢，必遭天譴。
當今中國何其不幸，商人淪為奸徒，為賺錢罔顧良心，不惜殘害用家最大資產──新生嬰兒，前有假奶粉，令全國出現大頭BB， 今有毒奶粉，產生腎石嬰童，賣假奶粉，毒奶粉者，其將絕後乎？可能呢啲廠商只求賺錢，在世享福，已無「不孝有三，無後為大」嘅觀念，懶理他人絕後。若然如 此，對呢類廠商施以懲戒嘅最佳方法，唔係叫佢哋辭職或者上庭控訴，而係用資本主義市場方法，令佢哋破產，令佢哋建立嘅事業，一無所有。所有人應該即時停買 呢啲公司嘅所有產品，不單止牛奶、奶粉咁小事，而係對呢類品牌全線杯葛，所有買咗呢啲公司股票嘅基金，散戶請立即擲貨，做一個「社會責任投資者」，蝕咗本 可以從另外股票賺番，持股與壞品牌公司扯上關係，點對自己子女講對錯？
說起品牌，中國商家要學好嘅，唔好走乖路，以圖取巧。最近睇《蘋果》新聞，話日本名 牌「樂聲牌」講拜拜，其實以中文名字而言，日本「松下電器株式會社」將改名為Panasonic Corp.，以適應全球化潮流。松下經數年努力，建立Panasonic牌子，而今將公司名字都改成一樣，取消日文名字，可見該品牌之成功及為世界接受。 自十月一日開始，日本地區確實係逐步棄用National品牌，但在香港澳門地區，中文名「樂聲牌」已深入民心，仍會沿用，故此以後見到 Panasonic樂聲牌，唔使驚奇，香港澳門嘅樂聲牌自電飯煲開始，已有五十年，聲譽咁好，你估咁易放棄咩。中國海爾牌電器大可向樂聲牌積極學習，千祈 唔好變成蒙牛伊利！
高盛威晒 左丁山
2008-09-27 AppleDaily
上 星期日跑完馬，本想到馬會沙田會所「銀袋」吃自助餐，點知訂位碰釘，話要八點半後先至有位喎。冇所謂啦，兩家人游完水先至去到「銀袋」，仲未夠八點半； 咦，幾乎四顧無人，座位任坐：係知道早啲嚟到啦。侍應即刻行埋嚟解釋：「八點前真係坐滿人呀，不過八點散場，個個埋單返屋企。」咦，星期日係車路士對曼聯 噃，乜場波咁有吸引力？侍應話：「左先生，未必係返屋企睇車仔對紅魔嘅，今晚播《家好月圓》大結局呀！」乜嘢《家好月圓》呀？我哋兩家人冇人睇過，完全唔 識，侍應以為我哋唔係香港人，啱啱埋埠啫。左丁山三扒兩撥食完，趕回家睇車仔場波，押注車仔贏，點知祖高爾與安歷卡門前失機，應贏不贏，只能逼和，保持主 場第八十五場不敗紀錄。
睇落曼聯球員季初狀態唔弗，史高斯與傑斯已老，今季要蟬聯冠軍，並非易事。睇波之時，美國友人來電，講到保爾森會巡迴電視台出席清 談節目，解釋救市措施，爭取政治支持。保爾森喺○六年答應喬治布殊做財長時，聲言要有全權，不准白宮幕僚干涉先至肯做，碰啱白宮幕僚長保頓係佢以前在高盛 嘅同事，故此好易傾得成。當今白宮與財政部係高盛校友世界：「高盛人」權傾一時，保爾森之七千億美元救市大計，明益高盛與剩下來之唯一對手摩根史丹利，彰 彰明甚。美國報紙報道，聯儲局極力呵護高盛與大摩轉型為商業銀行（類似JP摩根大通、花旗，以及美銀加美林嘅模式），令雷曼舊人吃盡酸葡萄，埋怨為何雷曼 得不到眷顧。世界係咁o架啦，中國俗語最啱，朝裏有人好做官。聽一個非高盛賓架講，上到北京，碰到前高盛亞太區阿頭Thornton，呢位先生鋒頭好勁， 北京財金高官全部畀面，爭相與佢談話，京官直情當其他香港賓架冇到，點解咁巴閉呀，因為Thornton可以好權威咁講與保爾森老友，與格林斯潘相熟，與 伯南克傾過偈……香港賓架喺北京唔通話啱啱見過任志剛咩！
二手樓重災區 左丁山
2008-10-01 AppleDaily
地 產W回饋母校，於母校頒發獎學金之日，回校捐贈二百萬元成立兩個獎學金，在座學生、校友大力拍掌讚賞。前一哥高佬L在頒獎禮上致詞，講述「手空空、無一 物」之創校精神，又云：「飲水思源，如果大家認同我在過去的工作崗位有少許成就，那一定要感謝新亞書院的培育，為我在進入社會之前，奠下了無私、無畏、無 懼的性格基礎。」現任院長教授W就讚一哥L退休後不為金錢所拘囿、不為五斗米折腰。咁又係，既然成日唱住「手空空、無一物」，退休後有唔錯嘅長俸，已經夠 晒啦，使乜再搵一份工，攞苦嚟辛。
地產W低一哥L兩班，與大賓架薛太同班，既然搵錢無數，不再手空空，每年捐番一兩百萬港元畀母校，輕鬆之至，佢同一哥L都話，希望今年攞獎學金嘅學生，立志於二三十年之後，走上台頒獎學金畀到時嘅師弟妹喎。
保 險界阿爺黃伯喺三年前過身，當時黃伯一定諗唔到保險界巨無霸AIG會幾乎破產倒閉。黃伯於桂林街時代唱過「手空空無一物」，當年加入保險界，吃盡人情冷 暖，更親身感受「餓我體膚勞我精」嘅艱苦生活；黃伯卒之憑「艱險我奮進」嘅精神，成為人壽保險界一代宗師、香港友邦（AIA）之阿爺，回母校尋根。此日黃 伯家人出席頒發紀念獎學金，再捐贈十三萬餘元嘅「成功慈善基金」。見到黃伯家人，點會唔講吓AIA呀，黃太話AIG出事啫，香港AIA一定冇事，但佢哋為 集團工作咁耐，積積埋埋啲AIG股票跌到得番三美元一股，可說多年心血一鋪清，喊都冇用；唉吔，由八十美元一股揸起，真係聽者流淚。
臨 走前，左丁山問吓地產W點睇樓市，佢話豪宅升得高、跌得狠，九龍站樓群跌得最快，成為高級打工仔豪宅重災區，可能與投資銀行不景有關。W太話「凱旋門」單 位有人劈價求售，一個貝沙灣相連單位由外籍人士持有，二千幾呎，急降價到蝕本幾百萬離場，因是之故，W太叫我哋如果仲想買樓嘅話，不妨揸住錢再睇定一啲。 講成咁，好彩地產公司嘅董事米高W坐在隔籬一枱，聽唔到啫，佢間公司揸住「天璽」仲未出售呀！米高W返母校頒獎學金，話明只講回饋母校，一於對地產市道隻 字不提。
事後孔明不是先知 左丁山
2008-10-06 AppleDaily
餐 廳羅屬下其中一間意大利餐廳在「快樂時光」時候，生意甚好，周時有二三十人訂地方開派對，年青賓架Ｋ係其中一個。呢日偶然同佢講起，為何啲外國人經常到餐 廳羅處開party？賓架Ｋ說：「你哋以前嘅作風或者跟我哋唔同，譬如你哋請食飯，用輪流做東嘅方法，輪流找數。我哋呢，要每次分清楚，二十個人飲湯，就 叫餐廳開二十張單，碌二十張卡，乾淨利落。好多做外國人生意嘅餐廳，都肯咁樣做，但私人會所一定唔肯。餐廳羅間餐廳近住IFC，所以幾受歡迎。」
人客覺得乾淨利落啫，餐廳就會覺得好煩，手續與紀錄都增加咗，不過為咗做生意，乜都要制，以客為尊吖嘛。但中式食肆要分單，難度甚高，搞唔掂。外國作風要分單，你唔請我，我唔請你，亦有另外一種作用，就係有時方便向公司申領（claim）補貼。
賓 架Ｋ上星期四吃早餐之際，聽到恒生銀行要為華盛頓互惠銀行債券撥備，不禁嚡嚡聲，佢話在西岸讀書嗰陣，周圍見到WaMu嘅提款機，知道係一間大型儲蓄銀 行，如果有人叫佢買WaMu債券，佢唔會懷疑呢間銀行嘅信貸可靠性以及償債能力，故此恒生銀行買入華互債券，賓架Ｋ唔覺得驚奇，佢所以嚡嚡聲嘅，就係華互 與美聯（Wachovia）呢啲大銀行都會唔掂啫，一年半年前邊個會估得到，事後孔明梗係好醒啦，事前就冇邊個係聰明人，譬如「平保」班投資專家，據講全 部出身名校，薪酬驚人，點解佢哋去年會買入富通銀行股權？富通為爭收購荷蘭銀行（ABN Amro），出資二百四十二億歐元，亦只不過係去年嘅事，歐盟官員自稱監管嚴密，非美國「牛仔」可比，但一樣照批呢單巨型交易，o依家富通要為呢單收購撥 備一千五百億港元，比利時、荷蘭、盧森堡三國聯手救駕，富通股東與債券持有人使唔使歐盟監管當局賠償？賓架Ｋ講咁多嘢，當然係有感而發，佢話：「由 2003至2008年上半年，如果我預料得到雷曼會破產，我會唔會銷售雷曼擔保嘅產品？比任志剛聰明十倍嘅人都諗唔到啦，現在鬧金管局與證監會監管不嚴之 人，簡直係財經文盲，可惜佢哋唔係先知！」
雷曼呀雷曼 左丁山
2008-10-07 AppleDaily
賓 架K講起雷曼迷你債券，愈講愈勞嘈。雷曼破產，令世界上最聰明嘅投資者都吃盡大虧，唔少對沖基金損失慘重，芝加哥一間基金因為用雷曼做經紀，股票存放雷曼 倫敦，全部凍結晒，要攞番呀？唔打番十年八年官司，休想收回殘餘，呢間基金Oak Group經營二十二年，因此而面臨關門停業命運，其他對沖基金因與雷曼做生意，損失總數難以估計。對沖基金呢個行業管理嘅資金高達一萬九千億美元（彭博 數字），畀雷曼破產打咗一記重拳，以後要重新估計對手風險（counterparty risk ），後果難料。
雷曼在香港擔保子公司（空殼公司）發行結構性產品，是否專呃香港人無知？當然唔係。賓架K話根據芝加哥 StructuredInvestments.com嘅資料，結構性票據在二十世紀八十年代在美國出現，因受市場受落，發展迅速，美林、摩根史丹利、雷 曼、花旗等紛紛爭發新產品。過去四年，以二○○三年嘅總發行量二百八十億美元為基礎，發行量增加咗四倍，升到一千一百二十億美元。咁龐大嘅數字，邊個買？ 乜人都有，約五分之三係散戶投資者買入。有此背景，大家就或者會知道點解雷曼在香港不斷發行迷債，據估計約係二十億美元咁上下，雷曼在九月中申請破產保護 令，但在八月份，雷曼仍然喺美國發行「100%保本票據」，每張面值一千美元，對象當然係散戶。
雷曼申請破產時，申報截至今年五月底嘅結構產品總值高達三 百六十六億美元，以此推算，香港嘅份額約係5.4%。另一間大行，摩根史丹利喺二○○七年十一月就發行咗四百二十億美元。賓架K睇住呢啲數字嚡完又嚡，呻 到樹葉落。雷曼破產後，所有股票、債券持有人、債主、客戶全部損失慘重，左丁山怪而問之：「點解唔見美國散戶投資者上街遊行，要求賠償，要求代售銀行，要 求聯儲局，要求財政部負責？」賓架K話：「我唔係聰明人，事先睇唔到雷曼會破產，唔識答你嘅問題！」如果世界上有聰明人買雷曼發行一張最簡單嘅IOU（借 據），都一樣損失晒，與持有複雜無比嘅結構產品遇上同一命運，因為要害在於雷曼破產，不在於雷曼產品嘅性質。
Next Page