超級六合彩 一注獨攬7,974萬
1 :
GS(14)@2015-07-27 08:37:48【本報訊】第86期超級六合彩於昨日晚上攪珠，開獎號碼為4、11、15、26、28、30以及特別號碼13，今期頭獎一注中，幸運兒獲派7,974萬，是歷年頭獎派彩的第四高。今期的頭獎基金罕有地高，因為上周二的5,000萬暑期金多寶沒有人中頭獎，之後的一期頭獎亦沒有人中，令到多寶越滾越大。這是繼今年6月第71期攪珠，有幸運兒贏得5,797萬頭獎彩金後，頭獎派彩再創今年的新高，而且是歷來第四高。
派彩歷年第四高
今次或是亞視最後一次直播超級六合彩攪珠，因馬會早前宣佈新馬季賽馬直播和六合彩攪珠電視轉播，由下月一日起將交由無綫J2台播放。另外，亞洲電視自從在2001年7月，重新由無綫電視手上，取回賽馬和六合彩的播映權，至今已經有14年。其間最高收視的六合彩直播，包括2013年12月10日，當晚頭獎一注中派9,095萬元，為歷年最高頭獎派彩。■記者黃偉基
來源:
http://hk.apple.nextmedia.com/news/art/20150727/19233857
經典主題曲冇得聽無綫播六合彩 新女主持曝光
1 :
GS(14)@2015-08-03 08:39:06■無綫踢走亞視於今晚播出六合彩，除了主持人不一樣，連經典主題曲都有新版本。設計圖片及對白
今晚無綫J2台接亞視手播出六合彩，但無綫藝人主持不見了，馬會自行委派賽馬前主持兼在《童夢奇緣》演過小角色的35歲舞台劇演員蔡運華擔任主持。至於觀眾35年來聽慣的六合彩經典主題曲，也一併消失了，皆因無綫將音樂亦重新混音，徹底洗走觀眾睇亞視六合彩的記憶！
前晚「六合彩之子」蔡國威為亞視主持第88期六合彩攪珠後，亞視前後播足35年六合彩的歷史任務亦隨即告一段落，由今晚開始交棒無綫J2台播出，並盛傳馬會與無綫簽下5年長合約。無綫過往1997年至2001年由無綫播六合彩這4年間，亦與亞視一樣可委派藝人出任主持，惟今次無綫再次接手卻例外，觀眾在未來一個月六合彩攪珠，也不會見到無綫藝人亮相。
暫禁無綫藝人主持
本報接獲可靠消息，自馬會公佈六合彩由今日開始改由無綫J2台播出後，馬會和無綫均接到不少反賭博團體投訴，直指無綫藝人是不少年輕人偶像，若由這班藝人出任主持，變相鼓吹賭風。馬會方面對有關投訴極度重視和緊張，為免事情鬧大，所以決定暫禁無綫藝人亮相，在未來一個月內自行委派人選擔任主持工作。而擔任今晚新一輯六合彩主持者，據悉是曾為馬會賽馬節目擔任主持及在劉德華主演電影《童夢奇緣》做過小角色的35歲蔡運華（Shirley）。消息指出，之後Shirley或會與另一馬會派委主持、有線「球彩台」前主播陳思琦（Rita）輪流上陣。不過，馬會至下月初待過完一輪冷河後，才由無綫委派藝員出任主持，包括2012年度落選國際中華小姐范文雅，以及藝員訓練班出身的吳珮如擔任主持。記者昨日致電馬會，對於今晚新六合彩主持人選，馬會發言人拒絕透露，只回應：「唔係TVB藝人，詳情大家可留意聽晚（今晚）直播。」問是否因為有反賭博團體投訴，所以暫不敢起用無綫藝人？馬會發言人說：「唔評論。」
■現年35歲的蔡運華，今晚將任無綫J2全新一輯六合彩主持，其名字有「運」，單看名字相當吉利。微博圖片
■落選華姐范文雅有望於一個月後接手主持六合彩。微博圖片
重新混音勁電子味
事實上，今晚六合彩不但人面全非，就連觀眾過去35年聽慣的六合彩主題音樂亦將消失。亞視自1976年7月13日首播六合彩以來，也是起用荷蘭樂隊Shocking Blue於1972年的作品《Inkpot》作主題音樂，除無綫於1997年7月5日至2001年6月28日播映六合彩這4年間，選用其他音樂做主題曲外，亞視2001年接手再播六合彩，也是選用同一音樂，雖然無綫今晚再播六合彩，仍會沿用《Inkpot》，但因為之前版本是由亞視混音，無綫因版權問題及想令觀眾耳目一新，所以重新將《Inkpot》混音和編曲，在前晚J2台播出的宣傳片，便聽到全新混音版六合彩極重電子音樂成份，與昔日聽慣的傳統版風格截然不同。採訪：魯吉
■無綫J2前晚播出六合彩宣傳片，將原來主題曲重新編曲混音，加重電子音樂成份。電視圖片
來源:
http://hk.apple.nextmedia.com/entertainment/art/20150801/19239009
蔡運華六合彩處女報：從未想過會上C1
1 :
GS(14)@2015-09-23 02:19:24無綫J2台接棒亞視播出六合彩，新一代六合彩之女，係前主持兼舞台劇演員，35歲的蔡運華(Shirley)，大家對佢嘅表現都頗為滿意，而蔡運華睇嚟對自己第一次主持六合彩都好緊張，前晚都係facebook一路更新。昨日一早亦share本報嘅即時新聞表示：「謝謝蘋果，從未想過，一把年紀會上到C1頭條和即時娛樂焦點，看一眾好友相約看直播的雀躍，實在可愛。因為這次，而與很多舊相識從新連繋，也是有趣 It's a special summer~」
來源:
http://hk.apple.nextmedia.com/entertainment/art/20150803/19241174
六六無窮：搶攻1億六合彩發達秘笈
1 :
GS(14)@2016-02-28 16:39:24■蔡國威前日拍攝時特地穿鮮色外套入投注站，希望可以借助運勢帶1億巨獎返屋企。攝影：仇志德
俗語有云：「唔賭唔知時運高」，六合彩繼上年8,000萬中秋金多寶後，黃金機會終於再度降臨，後日（3月1日）是六合彩40周年金多寶，如果一注中頭獎，獎金可高達1億！小賭怡情，大賭亂性，用10蚊發個橫財夢，絕對博得過。不過想要刀仔鋸大樹，除了靠命水，當然最好有高人指點，《蘋果》就找來曾經中過唔止一次六合彩「六合彩之子」蔡國威和梁思浩，以及堪輿學家麥玲玲和李丞責，組成六合彩最強package，為你打造一條發達方程式。採訪：譚倩宜、曹家誠
蔡國威：着紅衫買大冧巴
在亞視主持《六合彩》超過10年的蔡國威，除了每期可以埋身直擊六合彩攪珠結果，「近水樓台」的他自爆多年來中過無數次六合彩：「我最叻嗰次中過三獎，已經係5蚊注年代啦，嗰次派彩4萬幾，另外中過3次4獎，至於幾百蚊嘅安慰獎，就真係數唔到咁多。」
■錢錢錢錢，冇人嫌錢多，蔡國威稱如中頭獎，就會開製作公司接濟亞視班手足。
中獎開公司請同事
貴為「六合彩之子」，蔡國威自創一條發達秘笈：「我每次買彩票嗰陣，都會着紅色、橙色嘅鮮色衫，入去投注站嗰陣，記住唔好垂頭喪氣，要歡天喜地嘅樣。因為你分分鐘係入去見財神。話個貼士畀大家，有好多人問我有乜嘢號碼係經常出現，我同朋友統計過，發覺大號碼出現嘅次數係比細號碼多！」去年7月，蔡國威為亞視主持最後一次六合彩，談到今次若有幸中獎，他亦不忘念舊說：「如果中咗1億，我會買3層樓同環遊世界，剩番啲錢我會開間production house（製作公司）幫亞視台前幕後員工。不過就冇可能買亞視，你知啦，啲海水好鹹㗎嘛！」【蔡國威心水號碼】16（冷門號碼，20幾期冇開過，相信會物極必反）、48（大號碼，4係平穩數、8取諧音發好意頭）
■梁思浩透露每次有大彩池，身邊都有唔少朋友要他夾份買六合彩，以沾其旺氣！攝影：仇志德
梁思浩：留1/3彩金行善
梁思浩自言曾經中過一次二獎，兩次三獎。天生有橫財命的他，坦言中獎後會即刻做善事，思浩說：「我嘅六合彩貼士係，入投注站前要對住個天大聲講，話中咗就會做幾多善事，因為呢個係天降橫財，所以要話畀個天知，當係一個交換條件。而我綜合八大堪輿學家嘅講法，話當旺顏色係紫色同藍色，而今年旺財位係正東位，你哋可以搵就近正東位嘅投注站落注，如果我今次中咗，會用3分之1彩金做善事，其他擺喺度先，因為未需要用！」【梁思浩心水號碼】冇提供（因為他自稱之前試過講過一個號碼，最後開口中，結果遭內地地下錢莊恐嚇，驚驚吓不敢再講！）
攝影：馮嘉文
麥玲玲：東南當旺夾時辰
話說財神位日日唔同，玲玲師傅就預先幫眾「蘋民」算一算2月29日和3月1日當日的大利位置以及時辰和當旺生肖，玲玲師傅說：「29號當日朝早9點到下午3點，可以去東面投注站，港島區東面有柴灣、杏花邨，而九龍東面就係觀塘、將軍澳。嗰日當旺顏色係綠色同間條，至於當日合屬猴、牛、雞嘅生肖，適合買熱門號碼，而相沖嘅豬就可以買冷門號碼。」至於3月1日財位就會移至南面，可以到薄扶林、紅磡一帶碰運氣。她說：「藍色同波浪紋都係當日較旺嘅，至於吉時係早上9點到11點同下晝1點到3點。」玲玲師傅話屬羊、狗同虎都係合3月1日，可以買熱門號碼，至於相沖生肖的鼠就適宜買冷門號碼。【麥玲玲心水號碼】23、38（同樣取其諧音好意頭）
攝影：曹家誠
李丞責：借猴蛇運吼綠波
自言不愛賭博，但間中會試運氣的李丞責，透露多年來中過不同彩池的賽馬，六合彩亦中過10次以上，包括頭獎，他指今年屬蛇和屬猴的有偏財和抽獎命：「其實有冇橫財偏財命係好睇個人運氣，可以畀啲貼士大家提升運氣，就算你生肖唔係蛇同猴，但都可以夾佢哋落注嚟增加運氣。今年旺綠色，所以綠色嘅珠比其他顏色會大啲機會中。」李丞責指投注站的座向十分重要：「如果投注站座向唔好，派大獎嘅機會就會增加，因為投注人旺過投注站，舉例中環史丹利街個投注站（有指中獎次數最高的投注站）而家動緊土，而好位、壞位如果動土都會令風水更惡劣，相反派大獎機會亦容易啲。我就鍾意多玻璃、上樓甚至斜路嘅投注站，而設喺地牢嘅投注站，相對就冇咁容易中獎。」【李丞責心水號碼】24、41（全年當旺、經常會出）
來源:
http://hk.apple.nextmedia.com/entertainment/art/20160228/19508560
超級六合彩投注額4.46億新高5注瓜分1.36億橫財
1 :
GS(14)@2016-03-02 08:35:46■市民昨在投注站對飛期間笑逐顏開。黎樹雄攝
【本報訊】哄動全城的億元六合彩昨晚開彩，一注獨得的超級巨夢破碎，由5注瓜分1.36億元頭獎獎金，每10元一注派近2,722萬元。今期總投注額高達4.46億元，創下史上最高紀錄，政府從中抽取25%博彩稅即1.1億，故政府才是終極大贏家。記者：葉錦泉 張培生昨晚攪出號碼為11、16、19、21、30、33，特別號碼31。可能數字組合較普通，令到多達5注中頭獎，雖然因此無法產生超級億萬富豪，卻令中獎者特別多，可謂皆大歡喜。二獎有24注中，每注派848,470元；三獎有795注中，每注派68,300元。至於中三個字的七獎（派彩40元）昨晚更多達73萬注中，破2004年9月14日70萬注歷年最多中彩注數紀錄。
■網上昨流傳一張疑似以30元投注額中頭獎彩票（左圖）；另DJ葉文輝轉載其好友展示的彩票，投注逾12萬元僅中個半字（右圖）。
■著名六合彩主持「冬叔」夏春秋（左四）昨為億元攪珠擔任嘉賓。馬會提供圖片
「冬叔」任攪珠嘉賓
至昨深夜網上更熱傳一張疑似中獎彩票，從相中「頭獎彩票」可見持有人在3月1日花了30元，以自選方式買了3注，其中一注更中了頭獎，但馬會指為了中獎者利益，不會評論網上流傳中獎獎票的真偽。馬會原先已預計昨晚的「40周年六合彩金多寶」頭獎一注獨中可贏一億元，億元金多寶令全城瘋狂，港九昨多處都出現排隊買票的人龍，投注額於下午1時已突破3億元，之後越升越急，晚上7時已衝破4億元大關，每小時出現過千萬元投注額。到晚9時15分截止投注，總投注額達破紀錄的4.46億元，較2014年9月的3.48億舊紀錄高28%（多1億），以732.4萬港人計算平均每人投注61元。投注額創下新高，頭獎彩金亦因而水漲船高升至1.36億元。為隆重其事，昨晚六合彩攪珠馬會更特別請來了曾主持六合彩直播多年的「冬叔」夏春秋做嘉賓。歷來產生最多六合彩頭獎得主（42人）的中環士丹利街幸運票站昨整天人流不絕，高峰期有二、三百人排隊，人龍由店內排到出行人路再轉彎。不少中環白領包括駐港外籍員工都犧牲吃飯時間來買彩票碰運氣。不少內地遊客如從湖南來的何小姐，昨也禁不住在新界區投注站買六合彩，不分中港齊開心發橫財夢。不少投注者指若中頭獎後的夢想，都與在大圍投注站的美少女陳小姐一樣：「（若中獎）首先會買樓！」李先生亦向記者稱若中頭獎會捐出2,000萬元做善事。
來源:
http://hk.apple.nextmedia.com/news/art/20160302/19512865
六合彩之子：感覺死唔眼閉
1 :
GS(14)@2016-03-05 01:15:31見到蔡國威就想起六合彩及亞視，20年亞視生涯真的有陣亞視味，威仔說心情很複雜，「好似一部電影一樣，由我入行第一日啲影像全部一次過番晒出嚟，我入亞視嗰陣係林伯（林百欣）年代，係最輝煌嘅時候，感受到好多製作，就算錢同資源唔多，但係大家都只係有個目的，夾手夾腳做好啲節目，希望可以同無綫爭一爭，成個氣氛都好好」。威仔續道：「不過自從林伯賣盤，每次轉一個老闆，都會諗呢個老闆係咪比之前更加好？雖然每個朝代都有啲代表作，但係好似脫離唔到個魔咒，所有嘢都冇承繼，跟住就一路向下。」
「靠人情味撐落去」
外間有不少人都不明白，何解一間無糧公司，仍然有員工不計較上班，威仔說：「大家仍然基於亞視嘅人情味，好熱愛呢間公司，一路撐落去，喺一個冇得續牌嘅情下況，大家以為司榮彬係另一個白武士，一個新希望，點知拖吓拖吓又唔開（節目），仲去到拖糧、欠薪呢一步，成個感覺真係好欷歔同感慨，點解要用一個咁嘅方式去結束，嗰種痛真係好難形容，有一種死唔眼閉嘅感覺，完成唔到歷史使命。或者對所有員工係一個解脫，大家要努力向前走，可能係一件好事。」■記者何慧斯
來源:
http://hk.apple.nextmedia.com/news/art/20160304/19516010
記住向西！想中一億六合彩？麥玲玲醒你心水號碼
1 :
GS(14)@2016-05-08 01:56:15又有發達機會啦，六合彩彩金又高達一億等大家發大財。因為上期頭獎冇人中，已經連續7期頭獎懸空，頭獎彩金當然係人人爭中獎，邊個係超級幸運兒，今晚9點半開彩就會揭曉。近日為90歲大壽「事頭婆」英女皇伊利沙伯二世算命嘅玄學家麥玲玲，佢由英女皇命格推算出壽星婆屬金，一生衣食無憂，係大富大貴嘅格局。《蘋果》今次又搵「神算」麥玲玲出動，佢開心「些牙」咗8個幸運冧把：「1、5、9、12、14、23、27、42。」麥玲玲再三強調呢幾個只係佢心水號碼，佢搞笑話：「知號碼實中就唔畀你，留番自己買啦。」麥玲玲話今日係破日，財位喺西面，所以佢建議大家朝早起身出街時要朝西方向出發吸財：「不妨去西環、西營盤、西九龍同新界西，向西地方嘅投注站落注，去一啲運氣差嘅投注站買都會易啲派錢，好似門口整路、天橋底或斜坡附近嘅投注站都係有利。」麥玲玲話今日係「水的日腳」，建議大家着米白色或藍色衫去落注，不坊揀1號同9號窗口落注。雖然麥玲玲分享咗8個幸運冧把，佢話平日好少特別吼實多寶彩金就落注，今日或者會同公司女職員一齊夾份，派佢哋去中環士丹利街嗰間投注站買，但如果太多人打蛇餅排隊，佢就話未必買啦。
來源:
http://hk.apple.nextmedia.com/entertainment/art/20160505/19598322
財經評論：抽到公屋開心過中六合彩
1 :
GS(14)@2016-09-24 23:29:04常有人戲言，抽到間公屋開心過中六合彩。無他，公屋租平，地方實用，加埋靚景嘅話，真係happy過中獎。數到靚景公屋，重建在即的「公屋王」、港島南區的華富邨便是佼佼者，背山面海、享瀑布景觀，又可觀星，吸引不少人慕名而至。更有位處半山的「超豪公屋」葵青葵聯邨，每三層擁有一個空中花園，景觀一流；還有遠望黃金海岸的屯門湖景邨、翠綠山景相伴的將軍澳翠林邨等。正宗「豆腐價，鮑魚味」，只可惜今時今日新推的靚景公屋買少見少。公屋誕生源於1953年石硤尾寮屋區大火，港英政府為安置災民輾轉落成首個公屋石硤尾邨。時至今日，全港約三成人口住在公屋。現時流行將公屋靚裝潮裝，花心思放眼望過去，與值逾數百萬元的私樓差無幾。再說，公屋原則四四正正，保證不會嚇餐死。不過公屋「離地」的入息要求，大部份人對公屋只能得個「睇」字。今天私樓樓價高不可攀，即使有父蔭分擔首期，供樓也是漫長嘅痛苦，閒閒地每月供一萬幾千元，「供樓」二字，無形是個枷鎖。處於夾心的一群，應該如何自處？記者：陳家恩
來源:
http://hk.apple.nextmedia.com/financeestate/art/20160924/19780031
【愧對父母呀】六合彩之女棄主播從演 誓不離地劇場12年
1 :
GS(14)@2016-10-01 13:19:53廣告片段中Sammi(右)服待的「離地大客」(中)一角，令更多網民對Shirlee留下印象。（網上圖片）
蔡運華(Shirlee)——這名字對於很多觀眾來說十分陌生，但說起「六合彩之女」、早前鄭秀文為《100毛》拍攝的護膚品牌廣告短片，當中Shirlee演繹一位「離地大客」……大家應是想起了！由去年主持《六合彩》開始受到注目，到有逾一百七十萬點擊率的廣告片段，被網民盛讚她比客戶更像真客戶，Shirlee笑言：「我以前真係做過AE(Account Executive客戶服務主任)！我覺得呢種(客戶)唔算最離地，更離地都有。佢哋認為好真實同很sincere(真誠)，所有要求都好合理。」工作經驗讓她更掌握客戶心態，難怪其演繹得到網民歡心。
有主播卻不做，Shirlee投身劇場已經十二年。
原來Shirlee曾是廣告AE，應付過不少「難搞」客戶。
Shirlee堅持演員要貼地，不了解世界，怎能透過劇場反映社會現況？（受訪者提供照片）
中大傳理系畢業的Shirlee除了曾任職廣告AE，亦當過記者等工作，而她當年更放棄了在某電視台任新聞主播的機會，毅然踏上這十二年的演員路。Shirlee對舞台劇的興趣，源自小時候一次在文化中心的跳舞表演，「喺旁邊準備時，我望住個舞台空間，冇聽到任何掌聲，但突然覺得有一種好大嘅湧動。」她相信劇場有種魔力，「演者喺舞台上，觀眾坐喺下面，然後喺空氣中『叮』一聲連結咗。」劇場生涯中，Shirlee坦言最初聽過不少冷言冷語：「有啲演員會覺得我無啦啦走嚟做劇場演員，又冇學過正式表演，佢唔會分析劇本、唔會尋根究底。」她甚至有想過「不如唔好做」，但她跟某劇場前輩的一次聊天，令她打消放棄劇場的念頭，「嗰位前輩問我『點解你要做劇場？』咁我反問自己，喺劇場只係嘻嘻哈哈就夠？定你有更深嘅嘢想做，覺得必須喺呢個時間，為o依家香港社會留下一筆(記錄)？」
近年開始有舞台劇搬到戲院即時播映，但Shirlee相信，演員與觀眾於現場的直接交流，難以被銀幕取替。
2013年獲頒藝術新秀獎後，Shirlee媽媽仍不禁勸女兒「搵份長工」。（受訪者提供照片）
有時表演未必要「畫公仔畫出腸」，留一點空間，或許引發觀眾更多想像？
在香港，劇場似乎予人「離地」、難以接近的感覺，但Shirlee不認同：「劇場係反映現實嘅一面鏡子，近年香港有唔少關於本土，以我哋面對緊嘅處境為題材嘅創作。」她亦視劇場為一種提煉過的真實，「拎走晒所有生活好繁瑣嘅嘢，入到去人性核心，畀大家睇到到人嘅本質，例如善。」Shirlee又直言自己是位「貼地」演員，更希望藉演戲鼓勵觀眾，重新面對真實生活，「劇場同生活好貼近，只係有啲形式或手法會令大家覺得，嘩！好高深呀！」
Shirlee的演出中不乏以形體為主或翻譯文本等較冷門主題，做小眾的東西不怕沒有觀眾嗎？她抱堅定眼神說：「表演者一定有種誘惑，觀眾鍾意咁樣，我就畀佢啦，佢一定鍾意。可能，我想做嘅表演形式，只吸引到十分之一或更少觀眾，但我覺得佢哋仍然存在，只不過比較少啫。」
問到哪份工作能賺最多錢，Shirlee馬上說：「時薪計嘅，劇場一定唔係！」她表示本地演員在香港沒有很多演出機會，所以她會接下其他工作維生，如賽馬節目主持、《六合彩》主持等。Shirlee於舞台上有堅持，回到家中又是否一位「貼地」女兒？她笑着說：「十二年入面，父母不斷問會唔會想搵份長工。我唔做主播，佢哋簡直要崩潰！有份咁好又得體嘅工，點解唔做呀？」由於收入不穩定，令她有時很苦惱，怕愧對父母。二零一三年，Shirlee獲藝發局頒發藝術新秀獎，全家都非常高興，Shirlee媽媽更說：「阿囡，我終於明白你呢十年嘅堅持喇！」誰不知兩個月後，甚至現在，媽媽又提醒她，「係時候搵份長工喇！」令Shirlee哭笑不得。採訪：何宛珊(表妹)攝影：馮峰、Neo後期：Roy編審：懷鈺編導：Kaman
來源:
http://hk.apple.nextmedia.com/entertainment/art/20161001/19787371
Next Page