馮仁昭四圍超：甘比囡囡跳住睇家品
1 :
GS(14)@2016-04-15 16:30:07【睇貴嘢】■甘比少女上身，前日同秀樺醫飽肚齊齊蹦蹦跳，童心未泯。
大劉劉鑾雄同女友甘比（陳凱韻）平時食得最多就係富豪飯堂級數嘅灣仔福臨門，不過甘比前日同大女秀樺（Josephine）就「貼地」試吓新嘢，兩母女約4點幾，行孖咇逛太古廣場，當時Josephine一身校服運動裝，應該啱啱放學，未有保鑣傍實。
陪女兒食包
甘比拖實囡囡行入商場food court，揀咗中價平民Triple-O's漢堡包開餐，只有Josephine專心嘆漢堡包，甘比就邊玩電話「陪食」。佢等囡囡食飽後就一齊手拖手行去連卡佛家品店。Josephine心情high爆，邊行邊跳，而拖實阿女嘅甘比都跟埋一齊蹦蹦跳，認真童心未泯，完全冇代溝，同平時陪大劉出入嗰個繃緊樣好大分別。原來甘比之前已經買咗家品，留低保鑣睇實店員包貨，Josephine返到店入面就有禮貌同店員打招呼，之後坐喺電腦椅自娛。兩母女等店員包妥貨品後，就行去上落車區上車，沿途兩母女仍繼續跳跳紮，連跟住佢哋嘅店員同保鑣雖然攞住大袋戰利品，都有少少跟住佢哋步伐跳行，認真搞笑。撰文：馮仁昭
【有斬獲】■秀樺有媽咪陪行街，全程歡天喜地。
【好滋味】■甘比前日湊女去金鐘食中價漢堡包。
來源:
http://hk.apple.nextmedia.com/entertainment/art/20160415/19571438
馮仁昭四圍超：當劇團係仔女歐錦棠唔生B
1 :
GS(14)@2016-05-08 01:44:16歐錦棠同太太萬斯敏嘅劇道場，呢個月19日會喺上環文娛中心演出《春雨歸來》，日前佢哋喺九龍灣綵排，阿棠同萬斯敏之間默契十足，仲學韓星晒心形手勢。講到呢齣舞台劇，阿棠話：「今次係講30年師生情誼，講人生競賽嗰啲嘢，我母校知道，話會拉大隊支持。」向來不平則鳴嘅阿棠，今次竟然冇刻意加入爭議性聲音，佢話：「而家唔合理又荒唐怪誕嘅事，其實幾百年前都有，所以唔會太着迹去講，反而今次有好多諗頭，加上我又好百厭想加入自己元素。」
■歐錦棠日前喺九龍灣為舞台劇綵排。
信仰改變人生
佢哋兩公婆經歷過離離合合，但係最後都行過難關，一齊生活，阿棠話：「之前同太太分開咗，嗰陣關係唔好，加上我又有抑鬱症，不過有咗宗教信仰後，處事同對人都同以前唔同，內外會自我更新，睇嘢角度同人生嘅意義都唔同咗。」佢仲話：「太太負責把關提點我，當然，我哋都會有爭拗，但係總有一方會妥協。」至於生B，阿棠話：「吓？咁貴，讀埋呢啲咁嘅書，唔好喇！」萬斯敏亦都話：「結婚嗰陣有共識唔生B，加上社會咁樣，如果要生成個計劃都唔一樣，我哋而家當咗劇團係小朋友。」撰文：馮仁昭
來源:
http://hk.apple.nextmedia.com/entertainment/art/20160506/19599524
Next Page