利世民：必勝賭術！
1 :
GS(14)@2012-05-14 23:53:16http://www.sharpdaily.hk/article/fin/20120514/89594
細路仔時，曾喺賭枱邊聽疊碼仔講：「想翻本？有條大細必勝法。1蚊買大，1蚊買細。贏個邊，收起1蚊盈利，下鋪再買1蚊。輸嗰邊，加碼買2蚊大。贏，就收4蚊，扣除兩局成本共3蚊，盈利1蚊。繼續輸，下鋪再加碼到4蚊，一路輸，就一路加，8、16、32……直到贏嗰鋪，總會淨袋1蚊。兩邊玩法一樣，明唔明？」
我搭嘴：「大佬，賭枱有限紅，點到你無限加碼。再講，圍骰通殺，咪輸兩邊囉。」放數佬：「死字識唔識寫呀？」唔知嗰位想翻本嘅賭仔下場係點？不過，斷估放數佬唔會因賭仔輸錢唔追數。
風險飆 要翻本
上周有個賭仔被揭發輸咗廿億美元，佢叫JP Morgan，就係跟疊碼仔條必勝法玩。銀行坐盤，即銀行打本畀自己人落場賭，玩法通常係沽出期權或類似賭具，淨袋期權金。沽出期權組合，都係所謂市場中性（Neutral），即唔睇升，亦唔睇跌。風險就係只要一邊升跌超出預期，就似連開幾十鋪單邊，賭仔就可以輸到好甘。
史上發生過好多次，銀行嘅「戥腳」輸咗錢，為咗追番條數，注碼加倍，再加倍……所以，當見到賭枱上面籌碼勁多，銀行Value-at-Risk勁升，就係時候諗吓，會唔會有人諗緊翻本呢？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
2 :
ux176(28668)@2012-05-25 16:12:46很好的賭法, 要研究,研究...嘿
3 :
GS(14)@2012-05-26 14:33:51這樣賭法大困難
利世民：大到不能再大
1 :
GS(14)@2012-05-17 00:10:41http://www.sharpdaily.hk/article/fin/20120516/90424
我先要向大家推介黃元山兄噚日《蘋果日報》專欄「貸評山下」拆解摩通「倫敦鯨事件」。元山兄係過來人，投行搞邊科佢最清楚。正如元山兄話齋，坊間評論班門弄斧，將摩通「倫敦鯨」對比霸菱法興，係低層次兼言不及義。
最衰摩通Jamie Dimon，一企出來就道歉，又話新策略「天殘地缺、複雜、無諗通、做得差、又無睇實」（flawed, complex, poorly reviewed, poorly executed, and poorly monitored）。又正如元山兄所講，20億美元，對一季利潤54億美元嘅摩通，濕濕碎，只不過好多人抽水之嘛。重點係元山提出，銀行「大得不能倒」產生道德風險，摩通「大得不能轉身」因而構成市場問題，所以控制銀行規模，先至係正路。
記得上星期，同元山兄喺有線做Money Cafe，講到歐洲問題。中間休息時間，元山兄靜靜問：「咁你支唔支持貨幣聯盟吖？」
我無答元山兄。歐洲問題，既有經濟又有政治同歷史。宏觀睇，除咗法國集權中央，歐洲國家絕大多數係弱勢聯邦，地方自治。歐盟近年就相反走法式集權，歐債危機後更有人提出財政聯盟，根本有違原意。其實銀行太大有問題，政府都一樣。歐盟已經大到不能再大，再槓桿放大，都無助解決經濟問題。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：投機定投資？
1 :
GS(14)@2012-05-17 22:25:58http://www.sharpdaily.hk/article/fin/20120517/90868
我對投資嘅定義非常嚴格：「投入嘅資本，一定要令到創造價格嘅能力提高。」
換句話講，買一樣嘢返來，等價錢升，唔係投資，係投機，因為你無令到件事「創造價格嘅能力提高」。投機賺錢，因為你估中（好彩），又或者承受一定風險（都係好彩）。買樓收租，算唔算投資？如果你執靚間屋，畀心機揀租客，落力同租客傾租，各種投入令回報更高，呢個過程就算投資。
買股票係唔係投機呢？老實講，如果以為買股票等於同誠哥、郭氏或者四叔夾份做生意，呢個諗法係唔係有啲天真呢？你試下股東會去同誠哥班人傾生意，睇下佢哋點答你？
如果抗拒「買股等於投機」呢個諗法，我建議你將買股票視為「借錢畀上市公司做生意」。資本市場入面，撇除稅制以及其他各種交易成本等因素，原則上企業嘅融資方法，對企業嘅價值係無影響。即係話，對上市公司老闆來講，股民散戶只不過係資金來源，同銀行一樣。借錢畀人，應該問嘅係：一，信用好唔好？未來繼續保持同一個信用水平嘅機會有幾高？其二是有乜冬瓜豆腐，間公司有幾多實質資產做揸拿？其三是有冇派息？
股價升跌，屬於投機問題，要用另一套思維去諗，聽日繼續講。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
2 :
收息人(26699)@2012-05-17 22:54:50完全贊同，仲好感動！我一定唔賭喇！！！
利世民：都是OPM霸權
1 :
GS(14)@2012-05-19 10:33:01http://www.sharpdaily.hk/article/fin/20120518/91472
前日，朋友facebook（fb）貼咗一張好有意思嘅圖，入面有英國前首相戴卓爾夫人名句：「社會主義衰在，遲早使晒人哋嘅錢（The problem with socialism is that eventually you run out of other people's money）。」
轉貼呢張圖去《利字當頭》fb專頁，讀者留言：「資本主義同時管理我哋嘅錢，同埋人哋嘅錢。啊！我淨係要錢咋，唔要乜嘢主義！」
講到OPM（Other People's Money），再早兩日，另一位讀者留言：「同朋友講起強積金，我話只能當係捐公益金，對象係基金經理。o依家係全民焗賭，係由人哋代賭。」
自從70年代世界貨幣脫離金本位，滙率制度百花齊放，加上新興市場，同埋確立咗衍生工具嘅數理基礎，金融業就越做越大。不過真係令OPM行業真正越做越大，係因為兩個字：退休。
人口老化？從前，人人都工作到最尾幾年。以前儲蓄同投資嘅概念，同今日好唔同。但退休概念興起，開始教人將錢攞去投機基金，之後逼又好，唔逼又好，慢慢形成後現代OPM金融業大水塘。將退休講成人權，OPM亦將資本主義扭曲到面目全非。邊個唔想唔使做享清福？做金融業好、做政客政府又好，最終仍係識得搵OPM着數嘅叻仔可唔使做享清福。你又係邊種人？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：點解出招撐鐵路概念？
1 :
GS(14)@2012-05-23 23:36:59http://www.sharpdaily.hk/article/fin/20120523/92955
周末大陸又傳舊聞，話銀行會批出超過2萬億信貸用來起鐵路。同獅子山王弼講開呢件事，佢嘅反應一如平常，非常之冷靜，用中國歷史觀點去分析：「即係好似古代黃河一缺堤，做官嘅就好開心。」
市場嘅反應就非常唔一樣，鐵路股連升兩日，乜嘢中國中鐵（390）、中交建（1800）、中鐵建（1186），幾乎只要個名有個「鐵」字又或者「建」字，都升到停唔到。不過貼股呢味嘢，留番「300萬爽組合」啦！我有興趣嘅問題，始終都係宏觀經濟現象。究竟呢類大興土木，對幫助增加需求有冇幫助？另外一個問題係，究竟北京點解呢個時候要出呢招呢？
先講點解要咁樣出招。大家都記得08年，大陸用4萬億刺激經濟。結果，可以話當年好成功，經濟真係好激，物價，尤其係樓價，升到癲咗。自從呢次教訓，我係中央政府，就算係要刺激經濟，都唔敢輕舉妄動。所以呢次出招，限定資金用喺鐵路，從善良意願睇，就係大陸經濟官僚想刺激經濟，但又唔想影響到更廣泛嘅物價。
如唔可以將影響擴散開去，呢2萬億信貸對整體經濟又可發生乜嘢影響？我始終相信，當一般人長期收入升，先有可能持久增加內需。放鬆信貸最終只會造成泡沫，只不過炒起嘅唔係地產，而係第二樣嘢。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：又唱QE3
1 :
GS(14)@2012-06-04 22:28:58http://www.sharpdaily.hk/article/fin/20120604/97242
美國數據唔靚仔，就有人唱QE3。近來美國國債，尤其10年或以上，價格一直急升。一個月前，美國10年期國債仍有1.95%，上星期五就已經得番1.48%。至於黃金，經過差唔多大半個月呆滯，終於好辛苦爬上1620美元一盎斯水平。莫非有人用真金白銀去買QE？
大西洋另一邊，其實德國10年期國債一樣升到嚇壞人；一個月前，德國10年期國債有1.67%，上星期五就得番1.17%。投機者話，買德國國債，可以一次過賭幾個結局：一，如果有歐豬脫歐，銀行體系分分鐘又來一次2008年式凍結，買德國國債保險過現金。二，如果歐豬唔脫歐，歐元區各國又睇法國新總統，唔減開支，結果即係歐元QE，到時會唔會輪到德國話要脫歐呢？如果真係用番馬克，馬克兌其他歐洲貨幣一定升，到時滙水都賺唔少。講到尾，呢一路投機，都係買歐元會玩完。
美數據差 勢開機印銀紙
歐洲唔好，美國都唔會好得去邊。上星期一系列數據都反映復蘇放緩，但實際情況更加複雜，並唔係加快或者減慢咁簡單。其實，舊年美國已經有地方政府危危乎，只要經濟一轉差，就好易出事。聯儲局早就豁咗出去，只要有銀行有事，理論上就會有QE3。但係QE3之後會點，真係好難講。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：假如我係財爺
1 :
GS(14)@2012-06-05 22:34:56http://www.sharpdaily.hk/article/fin/20120605/97737
噚日，財爺話樓市唔健康，冇理由只升不跌。我雖然唔反對佢講嘅嘢，不過，冇乜人會理佢。畢竟，要明白風險嘅人，唔需要提醒；覺得永遠都有得炒嘅人，點都唔會醒。假如我係財爺，為咗香港，應該講出事實最驚人嘅一面：
「今日，我以欣喜嘅心情向大家宣佈，政府打壓樓價嘅措施，已經喺二手市場有初步成效。過去周末，主要屋苑錄得零成交，反映炒家明白特區政府對打壓炒樓，絕不手軟。
不過，仍然有個別發展商，積極開盤。日後如果樓價升，政府唔排除會以競爭法，向發展商追究助長炒風嘅責任。此外，政府亦要提醒大發展商，日後如果樓價跌，小業主輸錢，將會引起嘅政治同法律問題。
住屋乃基本人權，令到冇人有意欲炒樓，將會係未來特區政府嘅施政綱領。政府會繼續密切留意樓市發展，有需要時主動推出更嚴厲手段，務求令樓價回復到合理水平。
我所講嘅合理水平，就係唔再有人覺得炒樓有獲利機會，炒家完全離場。我已經委託嶺南大學文化研究系，研究超特別印花稅嘅可行性：初步構思係，兩年內有交易過之任何住宅物業，印花稅稅率為交易利潤之100%。」我擔保，如上述內容「出街」之後，一定全場靜晒。
利世民
2 :
passport(1491)@2012-06-06 02:47:17德國係咪好似都係咁？？
3 :
GS(14)@2012-06-06 21:59:37http://blog.caijing.com.cn/expert_article-151434-6605.shtml
具體如下：
首先，在土地稅上，政府對於自用式房屋購買者和其他土地買賣經營者進行嚴格區分，不同對待。土地稅，實際上是政府向德國境內的地產（包括土地、地面建築物）徵稅，稅金的多少則按照登記的地產狀態和價值確定。其徵稅基礎為每年初按照稅收評估法（根據成交土地的價格得出同類土地的納稅價值）所確定的課稅標準價值，一年一繳。根據聯邦統一的稅率，建築用土地的稅率為3.5‰，獨戶住宅土地稅率分兩類，價值在75000馬克以內的稅率為2.6‰，75000馬克以上的稅率為3.5‰，雙戶住宅稅率為3.1‰。為了鼓勵購買住宅自住，政府對居民自用的第一套住宅不徵地面建築物部分稅收。也就是購置住宅的普通居民，每年只需繳納房基地部分（該房基地價值單獨評估，並在房產證書中備註）的土地稅。
其次，政府對地產買賣獲利者徵收高額的土地購買稅和資本利得稅。土地購買稅亦可稱土地交易稅，凡國內登記過的土地被出售就要按規定繳納土地購買稅，此處徵稅基礎同樣指土地和地面建築物兩者的價值總和，稅率為3.5%。對於買賣獲利部分，政府還將對出售房徵收資本利得稅，十年內出售即參照公司稅標準徵收資本收益的25%。土地購買稅和資本利得稅的適用範圍還包括買賣房地產公司的股票。
利世民：投機速成
1 :
GS(14)@2012-06-06 21:51:39http://www.sharpdaily.hk/article/fin/20120606/98208
盛女話題，令男女關係，成為香港最矚目嘅行業。有報道話，坊間有人搞「戀愛速成班」，教班獨男去追女仔。
我心入面第一個問題係：「吓？乜香港唔係有『男人荒』咩？咁都追唔到女仔，獨男真係好有問題。」
「佢哋教嘅嘢，叫Pick Up Artist，簡稱PUA。你都話啦，男仔畀現代教育制度抑制男性賀爾蒙。PUA其實都係要佢哋做番一個原始男人嘅行為。」曾經研究PUA嘅朋友娓娓道來。當然亦有唔少朋友，尤其係女仔，覺得PUA比獨男更加幼稚。
受到「戀愛速成班」嘅啟發，我不期然諗，有冇「投機速成」呢？人類本能行為係求存，但現代社會，令到好多人失去咗求存嘅心態，尤其投機行為。好多人輸錢，就係因為求存意識唔夠強。
求存乜嘢？最好嘅學習對象，係蟑螂。蟑螂好勁咩？一拍就死啦！不過，點解有人話蟑螂係唯一可以喺世界末日之後繼續存活嘅生物呢？一，蟑螂繁殖力強，一粒蛋可以爆廿幾隻出嚟。二，蟑螂乜都食，可以長時間乜都唔食，就算要食，都係食少少。
投機求存之道，除要好似蟑螂蛋，以少博多，最重要係唔可以令自己負累太大，尤其利息支出，生活但求夠使用不但係美德，亦係生存之道。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：長線投機邊樣好？
1 :
GS(14)@2012-06-07 23:02:40http://www.sharpdaily.hk/article/fin/20120607/98734
老友星期一入領匯（823），噚日好威威咁話：「既然有領匯，我都唔明點解，仲有人買啲得厘幾嘅國庫債券？」
近來好多人講，股票抵買。唔止香港，美國同大陸都有人話：「未來十年買股票好。」當然，未來十年，梗有股票跑贏。不過，係邊一隻呢？好似2007年6月蘋果出iPhone，股價都只不過係120美元左右；5年，升咗大概5倍。如果時光可以倒流，你話幾好呢？
老友：「買股其實好過買樓。股票流動性夠高，外圍有乜事，走路都快過人。香港人鍾意買樓，係因為做按揭有槓桿效應，賺到盡嘛！」
話雖如此，世上亦有唔少人為逝去嘅股票，守足一生一世。投機，當局者永遠都有佢哋嘅理由，只有事後大家先知道，究竟決定係啱定錯。
同樣，話買樓好嘅，一樣有佢哋嘅道理：「過去幾十年，買樓長線一定賺梗㗎喎！央行印銀紙，一定通脹。股票唔一定派息，股價又唔一定升。買樓，可以自住，又可以收租。」
如股票長線一定賺，樓又長線一定賺，點解有人輸錢？其實買股要揀，買樓何嘗唔係？除咗時機，投機者都要問吓自己有冇能力長揸。一百個人，同一時間買同一樣資產，都可以有一百個結果，冇話買邊樣一定贏。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：我遺憾你個遺憾
1 :
GS(14)@2012-06-09 15:33:08http://www.sharpdaily.hk/article/fin/20120608/99318
歷時三年半，耗資近二千萬，成三百幾頁，立法會嘅所謂雷曼報告，就連最簡單嘅一個問題都答唔到：「咁點樣監管至先堵塞到個『漏洞』？」
立法會唔係法庭，調查唔係講證據，政治演員亦唔識財經同政策，一味為咗博出位；對呢個所謂調查，老早就唔應該有任何期望。不過，呢一次係一個好好嘅機會，畀我哋睇吓香港班政治演員，係乜嘢水平。
權力及特權法，原意並唔係畀政治演員用來公審佢哋眼中嘅人民公敵。立法會調查，結果應該係點樣去改善政策，同埋有乜立法需要。睇吓人哋Dodd-Frank啦！雖然我唔贊成Dodd-Frank，但至少有得講吓道理。港式政治演員淨係識搵人祭旗、要人頭落地，點講道理？
如果要有人為事件負責，點解唔譴責「以伯南克為首嘅美國聯儲局，未有及時放水拯救雷曼兄弟」？爆煲之前幾個星期，雷曼仍然有三條A，「評級機構未能及時因應風險，降低雷曼評級」，立法會點解唔表示極度憤怒？當時亦唔少財經媒體日日話冇事，「呢班人未能預見問題發生，散佈錯誤訊息」，立法會點解又唔表示失望？
政治演員，你哋老竇老母有冇教過「有早知，冇乞兒」呢個道理？呢份報告鼓勵「輸打贏要」，我對此表示極度遺憾！
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
2 :
鱷不群(1248)@2012-06-10 17:22:24輸打贏要，中晒point
Next Page