📖 ZKIZ Archives

賤男呃30幾個女仔財色故意不避孕為報復女性

1 : GS(14)@2017-02-18 09:51:26

內地傳媒上月揭發廣東江門鶴山市的阿標，自稱是順德工廠太子爺，先後與3名女子在沒有避孕措施下發生關係。（新聞回放：http://bit.ly/2larpja）隨後，阿標在網民在媒體壓力下，終於到派出所自首，並被荔灣警方刑事拘留。內地記者調查發現，除了之前報道的受害女子小敏和琪琪之外，陸續牽出8名受害女子，其中一名女子阿思訴說，於去年6月透過交友軟件認識阿標，看到阿標在朋友圈晒出別墅照「證明」自己很有錢；還向自己的爸爸道謝，將自己偽裝成一個十分孝順的人。阿標游說阿思只要願意和他發生關係，才能證是真心想以結婚為前提，至於如何同意不避孕發生關係，理由就是「如果有孩子，就馬上結婚」。阿思陷入阿標的陷阱當中，不僅被騙色，還被騙去1.8萬多元人民幣。另一名不願意上鏡的女子則比阿思下場更慘，在懷孕6個多月才發現阿標消失，無奈下只能接受墮胎手術。阿標被捕後供稱，到目前為止，被騙的女子約30、40人。他訴說自與前妻離婚後，世界變得很灰暗，能過一天就是一天，更想過自殺。至於為何不避孕欺騙女子，阿標指是為了「報復女性」。他自2012年開始用這種手段騙財騙色，總是覺得女方對自己不好。這些年來，阿標不敢用自己身份證，也無法辦理銀行卡，所以欺騙女子利用他人的名義開卡，用來收錢和轉賬。對於阿標欺騙女性的做法，有心理學家表示，阿標的父母事實上都健在，但是在其口中母親卻已經過世。由此可以判斷，阿標跟母親的關係不好，這種矛盾可以追溯到童年。阿標在成年之後又有了失敗的婚姻，這些經歷都有可能令他形成一種變態的心理，想要通過報復社會來轉移內心的憤怒和不滿。廣東電視台/《廣州日報》




來源: http://hk.apple.nextmedia.com/international/art/20170218/19932481

---

同媽咪細個餅印一樣鍾嘉欣囡囡似番個女仔喇！

1 : GS(14)@2017-03-24 17:08:04

究竟係爸爸嘅基因勁啲，定係媽媽呢？呢個問題，不少網民都想問下佢哋，例如楊冪劉愷威，或者Baby同黃曉明、周杰倫同昆凌等等，因為佢哋都唔想BB曝光，所以大家就更好奇咁。似爸爸又好媽媽又好，BB個樣，其實日日都變緊，一不留神就錯過。好似鍾嘉欣個B女Kelly咁，出世嗰陣就似爸爸，依家大大下，半歲有多喇，就越嚟越似媽媽喇。香港時間昨午一點左右，鍾嘉欣一口氣upload咗三張lovely Kelly嘅相，真係超得意，豬膽鼻似足媽媽，內雙眼皮，眼仔大大水汪汪，十足十鍾嘉欣細個咁。呢位新手媽媽帶埋囡囡行「姨媽傢私」，戰利品似乎唔算多，架車車主要都係做Kelly嘅「座駕」，但見相中嘉欣就好開心同囡囡selfie，囡囡就頭岳岳嘴扁扁露出一副「走得未呀？」嘅表情，cute爆！




來源: http://hk.apple.nextmedia.com/entertainment/art/20170324/19968703

---

【唔捨得個女】54歲張兆輝一講即喊半夜入房聞陣味

1 : GS(14)@2017-06-10 13:09:27

一講起女兒之後將離港升學，本來一直健談風趣的輝哥突然眼泛淚光。



張兆輝除咗識得唱情歌冧老婆，查實講到佢17歲嘅囝囝張焯鏗同13歲嘅張卓姿，輝哥都一樣咁鬼冧！講到以前拍劇搞到日夜顛倒，親子時間自不然唔多，之不過睇你點樣分配時間啫，輝哥話就算佢哋瞓晒覺，都會爭取時間「親子」：「咪入去房望吓佢哋，見到佢甜睡嘅時候，已經好安慰㗎喇，有時又幫佢冚吓被，索吓佢啖味咁樣囉！」



仔女o依家都17同13歲，輝哥諗番佢哋細個就最開心。(被訪者提供圖片)

輝哥講起個女就唔停口。(被訪者提供圖片)

收工返到屋企，仔女瞓晒覺，輝哥要聞吓佢哋陣味「親子」吓。呢個係妹妹BB(被訪者提供圖片)

其實聽落一啲都唔重口味，如果你哋都係工作型父母，都一樣會咁做，你懂的！之後輝哥講到第一次要離開香港幾個月拍劇，見唔到家人嗰種感覺，講講吓仲眼濕濕話：「我有個電腦入面有好多佢哋細個嗰啲相同短片，我太太唔俾我睇㗎，因為怕我會感觸，佢話：『嘩！你睇埋呢啲咁嘅片，仲聽埋呢啲咁憂怨嘅歌，梗係唔開心喇！』」仔女細細個時就最得輝哥鍾愛，因為成日都喺自己身邊嘛，尤其囡囡呀：「細女細個好得意㗎，譬如佢自己好輕鬆行咗去前面都好喇，咁我喺後面，佢行吓停吓又望番轉頭，見到你又走番埋嚟捉住你對手拖，即係永遠都係喺身邊。見唔到我，又會猛問daddy喺邊度呀，成日都daddy、daddy。」又諗番起件冧爆事件：「個女兩歲時，夏天好熱㗎嘛，我着鞋嘅時候，已經一頭汗，佢就行去攞張紙巾幫我抹汗，嘩…仲唔值呀，超值啦！嗰陣時兩歲咋喎。」人哋話女兒係爸爸嘅前世情人真係冇講錯。



唔捨得。真係好唔捨得。

有時要離家幾個月去拍戲，輝哥掛住啲仔女就會睇相，然後好感觸。(沈健程攝)

不過細女下年會跟埋哥哥去留學，輝哥都話唔捨得，但係諗深一層都希望佢學多啲，惟有自己抽多啲時間飛去探佢哋，又話好彩近排都係喺香港工作：「咁咪可以留喺屋企，又可以去拍嘢，拍完辛苦又可以見到啲家人，如果呢幾個月又離開屋企，咁咪又少咗幾個月見面。」珍惜同家人嘅相處嘅輝哥，o依家每朝都6點半起身陪個女食早餐，抱抱、傾吓偈維繫感情。唔知輝哥遲啲又會唔會做「呷醋外父」呢？「我唔敢諗咁遠喎！呢啲嘢順其自然喇！如果佢真係搵到一個好好嘅男仔照顧佢又愛佢，冇所謂，最緊要佢開心快樂喇！細個嘅時候喺daddy身邊好快樂，大個嘅時候喺佢愛人身邊一樣要好快樂！」



哥哥已經去咗外國升學，下年到妹妹喇，輝哥兩老當然唔捨得。(被訪者提供圖片)

妹妹細個好得意，唔怪得輝哥咁錫佢。(被訪者提供圖片)

採訪：何慧斯、懷鈺攝錄：馮峰、Neo攝影：沈健程服裝：Ted Baker化妝：Frances Ho@jessicachan_make-up場地：Big Echo




來源: http://hk.apple.nextmedia.com/entertainment/art/20170608/20047946

---

林俊賢喊住認番個女

1 : GS(14)@2017-06-18 11:18:12

曾經結過兩次婚的林俊賢，與前妻所生的女兒林鈺洧（Denice）一直沒有聯絡，女兒亦由歲半開始未見過爸爸，直至數年前林俊賢主動於facebook與Denice相認，父女才有機會重逢，Denice更爆父親當時激動到哭。遺傳了父親優良基因的Denice，近年更跟隨父親加入娛樂圈，於模特兒公司做楊穎（Angelababy）師妹及返內地拍劇。日前Denice與父親慶祝夜蒲，提早慶祝父親節。Denice於微博上載父女合照，更留言說：「今晚第一次跟爸爸喝酒，開心。」林俊賢雖然已經56歲，但他除了一頭白髮外，樣貌和身形均保養得宜。撰文：魯吉




來源: http://hk.apple.nextmedia.com/entertainment/art/20170618/20059456

---

Celine爸爸道義上有問題？薛家燕：希望佢唔好影響到個女

1 : GS(14)@2017-06-22 08:03:19

近日因為參加《全美一叮》（America’s got talent）嘅比賽片段一夜成名嘅Celine(譚芷昀)，前日就同爸爸一齊現身機場，搭飛機去旅行。不過人紅就梗係是非多啦！有人直指親手培養Celine妹妹嘅爸爸譚順生有問題，而苦主竟然係家燕姐！事源Celine曾經係「家燕媽媽藝術中心」嘅學生，而Celine當年仲係喺家燕姐介紹下去大台參加節目，其後喺2014年參加《中國新聲代》亦係由家燕姐穿針引線，不過家燕姐就好似對譚爸爸有微言。問及家燕姐係咪一早認識Celine爸爸？佢話：「係呀，Celine大約四五歲嗰陣就嚟家燕媽媽嗰度學嘢，我認識佢（譚先生）就應該係新城電台嗰陣識，佢唔知係咪參加個比賽定乜嘢，我唔記得，見到佢囡囡好精靈，同埋同聲好靚，咁我就問佢有冇興趣嚟我哋學校上堂呀？咁佢就嚟咗上演藝班嘅。佢爸爸教佢唱歌嘛。」原來譚順生後來成為「家燕媽媽藝術中心」嘅導師，家燕姐話：「後來佢爸爸（即譚先生）就上嚟自薦，話想喺我哋度做音樂導師，咁好啦。」咁之後發生咩事令家燕姐對譚順生有戒心？佢苦笑話：「應該係話失望。做我哋呢行，尊重行規，咁你自薦上嚟教，就算有乜嘢學生要補課，或者係要點樣上堂，都係要同我商量，就唔係嗌啲學生去佢個工作室上堂嘅。」家燕姐續指：「我最初都唔知嘅，咁逐個逐個學生去咗佢度上堂，啲學生話學費好貴，我收二千幾，佢成萬幾蚊，走返嚟問我哋，問『家燕媽媽知唔知我哋去佢度上堂好貴呀？上完又要再俾。』我就『吓？點解會咁㗎？』因為我就冇理到佢嗌啲學生去佢度上堂。我都唔知佢點聯絡啲學生，梗係逐個學生攞電話啦。就算個學生要上乜嘢堂，佢都應該要同我講聲。咁我諗起碼…佢喺我度教咗半年左右啦，咁我覺得『咦，呢個人道義上有啲問題喎，咁我決定唔用佢。』家燕姐不忙大讚Celine唱歌有天份同好乖。所以有合適工作都會安排畀Celine妹妹，佢話：「推薦過佢去無綫拍MV同母親節節目，大陸都有個《中國新聲代》。當時佢好似想去參加，但參加唔到，咁可能嗰期嘅年齡問題，咁佢有同我講，我話好吖，睇下我嘅關係可唔可以幫到佢，咁後來聯絡到湖南衛視畀佢上嗰個節目。」有指Celine爸爸當正自己有渠道安排學生去比賽，仲喺網站宣傳，家燕姐笑說：「係呀，佢話自己關係好，如果邊個想去就搵佢啦，哈哈哈哈。係啲學生話番畀我聽，我就得啖笑，唉，佢個人都係有點那個，不過真係其實呢啲嘢過咗去架喇，我都好開心佢個女，今次係《全美一叮》攞到個名譽，係一件好事，不過都提一提佢爸爸，以後安排自己做嘅嘢唔好影響佢個女。」對於好多人擔心Celine太細個唱歌會影響學業？家燕姐就認為唔會：「佢媽媽都ok，只係佢爸爸係佢經理人，所以處理事方面自己要留意。」而同樣喺「家燕媽媽藝術中心」工作過嘅蔡立兒回應《蘋果》話：「非常感激家燕姐之前給我機會在藝術中心教小朋友唱歌，任教時及現在都不認識及不曾接觸過譚先生及他的女兒Celine，所以對此事一無所知，不便參與任何意見！」




來源: http://hk.apple.nextmedia.com/entertainment/art/20170620/20062227

---

【動畫】黃宇詩遭鬧爆化妝師陳文輝：黃霑個女又點

1 : GS(14)@2017-07-09 03:55:27

現年41歲的黃宇詩，賣bra之前，曾挾黃霑女兒之名加入無綫，而且日子不短。佢有份參演嘅劇集，好似係《再生緣》較為人熟悉，其餘時間主力做主持工作，包括頒獎禮同《都市閒情》。在未嫁前的黃宇詩，主持了《都市閒情》8年，又做過《全線大搜查》，但唔係筍工，亦冇可能爆騷，因為一個禮拜開得一兩日工，一個月賺多幾千蚊。黃宇詩曾表示「不是沒有試過拍監製門，但冇用。」佢假假地都係加拿大卑詩大學畢業，主修亞洲研究，副修戲劇，又是名人之後，但在那個時刻，明顯無用武之地。而大家嗌佢都仲係「霑叔個女」、「黃霑個女」，但做黃霑個女唔一定有著數。02年黃宇詩就「成功見報」，因為被當年無綫首席化妝師陳文輝公開狂鬧。嗰陣黃宇詩做緊《全線大搜查》主持，一次佢自己落手化妝，企喺佢側邊嘅陳文輝突然嘈到拆天：「你做乜自己化妝，化到一撻撻，你睇吓自己似咩呀……我依家同你講緊嘢，你仲唔企起身！」嚇到黃宇詩即時成個彈起身。當時鬧足五分鐘嘅輝哥意猶未盡，仲即時問黃宇詩個藝員編號，然後打畀藝員科高層投訴。當知道黃宇詩係黃霑嗰女，輝哥更嬲，加多幾錢肉緊繼續鬧：「黃霑個女又點呀！黃霑咁有修養，但係生個女咁冇家教……。」事後黃宇詩被問及此事，佢只能夠話「其實係小事」，將成件事攬晒上身。




來源: http://hk.apple.nextmedia.com/entertainment/art/20170707/20081645

---