左丁山對教師C上堂派蝴蝶酥當小獎品，甚有興趣，問佢有何效果。教師C話：「偶一為之而已，成日派就唔靈嘅嘞，最好就係在大時大節過後，大家還有過節氣氛時，班上還有興奮、玩樂心情及幽默感之時派獎品，在其他時候就比較唔自然。」但左丁山對IT教學更有興趣，問佢對間學校對爭取政府撥款有冇興趣，教師C話：「得十間尖子學校可以得到政府撥款（按：財政預算案建議撥款七千五百萬元俾十間頂尖IT中學），好難爭嘅，無謂俾自己及學校壓力，淨係要更新學校嘅電腦硬件，買多啲軟件，全校有WiFi上網等已經要一大筆錢啦，點知校董會（即學校管理委員會）肯唔肯投資，或者學校有冇錢㗎！」
咁又係，學校搞IT並非空口講白話，要校董會與校監校長達成共識，全力搵錢配合至得，香港所有津貼學校都係向教育局攞錢嘅，教育局有冇咁多錢俾呀，七千五百萬元只係資助十間頂尖IT中學，用流行術語嚟講，唔夠critical mass噃。
香港講IT，最弊係一窩蜂，九七、九八年間，高考尖子爭住入讀電腦、IT工程學系，但2000至2001科網股爆破之後，呢啲學系全無考試尖子問津，學生之入學成績只係啱啱熟嗰種，令教授老師都搖搖頭。今年有FB收購WhatsApp及智能電話Apps嘅刺激，會唔會提高IT科目嘅入學成績呢？幾難講。潮流就係講IT教學嘞，無論在形式上與教學技術上，個個講電子教學、網上教學。香港中學講電子教學，出發點有一半係政治，教育局啲官員要用電子教科書電子教學打擊教科書出版商，想法幾幼稚，好可能損人不利己。大學就時興MOCC（Massive Open Online Courses）、MIT，哈佛最先推行，其他大學紛紛跟風，如免費網站咁樣搞MOCC，有蝕冇賺，見不到有投資回報，但大學似乎樂此不疲，蓋茨夫婦基金會大力支持，但至今教學效果成疑，在美國正引起熱烈討論，此股風氣在香港是否可以持續，冇把握。 