| ||||||
上期的旺角毒網報導，很多古惑仔和差人都讚圖片精彩，睇得過癮，連那班毒販、道友都拿着本《壹週刊》嘖嘖稱奇，在長沙街檔口打牙骹，個個頭岳岳，周圍指手畫腳，研究記者究竟隱身在什麼地方偷拍。係，你冇睇錯，佢哋真係膽大包天，仲夠膽返去現場通街走，記者返去做follow up，見到原班人馬不時在眼前出現，若無其事行街、篤魚蛋，同街坊打牙骹，巡警行過，雙方都當無事發生過，難怪班毒販可以明買明賣毒品，只可以講，在CY管治下，香港真是無奇不有。 好多人，包括班西九龍雜差問，那些精彩圖片，記者何以影得如此清楚，連毒販補貨後，兩邊面撐到變形都影到，對唔住，商業秘密唔講得，無理由拆穿自己的秘技。不過，可以講俾大家知，今次一仔C組隊員做了大量資料搜集，包括向毒品調查科的前探員取經，怎樣透過廿四小時高空監視、地面跟蹤，掌握毒網的運作，包括從毒販補貨的次數，逗留唐樓的時間，推算每次返貨數量，毒品放置的樓層。班毒販雖然明目張膽，但有天文台守住兩邊街角睇水，外人行過，一定到實，於是搵個靚高位偷拍，成為調查的關鍵。記者試過站在唐樓梯間偷拍，但樓上是鳳姐宿舍，不時有紋身大漢上上落落，十分驚險。好不容易，記者找到「安全屋」，可以長時間放置攝錄機。有一晚氣溫得十一、二度，記者只能攬着電氈（特登飛車返屋企攞），一邊監視目標，一邊翻看錄影片，果然發現毒販經常走向上海街補貨。記者馬上轉為在車上偷拍，終於拍到毒販揭開雪糕筒取出毒品，在車隙間把毒品塞入口的驚人一幕，但幾名記者都因此冷病了，而且咳到無朋友。 | ||||||