上世紀八十年代至九十年代初紅極一時嘅女大狀，譚惠珠議員，係所謂「四料議員」，即區議員、市政局議員、立法局議員，與行政局成員，當時風頭之勁，一時無兩，乜嘢民生、政治議題，都關佢事，直情係政治明星。點知俾創刊未久嘅壹週刊封面故事踢爆佢在的士牌照方面有利益衝突嫌疑之後，引起無線新聞部（當時仲未係是但台）跟進追蹤，譚議員不知如何，竟然向無線高層申訴，於是掀起一場干預新聞自由風波，影響巨大，彭定康治港時期，港英政府逐漸與譚惠珠保持距離，逐漸疏遠，譚女士亦逐漸投向跑馬地（而今已搬去西環）。回想起嚟，當年壹週刊之封面故事，可說改變了香港政治生態、政壇面貌，影響深遠。
今天的譚惠珠係全國人大代表、《基本法》委員會委員，本已減少曝光，但近月為了政改問題，為公（阿爺）為私（《基本法》委員噃）都要出嚟為梁振英之政改諮詢，穩住陣腳，為政府打打氣啦。點知為梁振英辯護得落力之時，突然說溜了嘴，在電台公開講：「以前外界常鬧官商勾結，現在他經常出來找地、找屋，可能得罪了大財團。」又話：「被人撳住郁唔到，即使梁振英有能力也不容易發揮。」
大家聽咗，以為譚大狀有感而發，為梁振英擊鼓鳴冤，炮轟大財團阻頭阻勢㖭。於是記者趁當日下午郭炳江出席慈善活動之便，搵郭大富豪攞回應，郭二少平時好少好少評論政治，但呢日突然肯開金口，話譚大狀講法相當不公平，「大財團能影響的，對政府非常有限，大財團只能反映聲音，政府不聽是他們自己決策的事……真的好笑，如大地產商可影響政府，我真的不相信。」郭炳江話好笑啫，譚大狀就一啲都唔敢笑，驚到當晚就致電烽煙節目，次早又致電烽煙節目，連續兩次解釋佢嘅言論只係針對政客（自由黨？）請地產商切勿對號入座，又話親自打電話向郭炳江解釋咗咁話。如此說來，譚惠珠嘅行動，親自揭發咗佢自己係好怕得罪大財團，對郭炳江一句回應居然介懷得咁緊要，可說對梁振英越幫越忙，以後譚惠珠最好收聲，回覆低調！ 