ZKIZ Archives


接王晶羅鈞滿班 蘇永康搶做新一代負皮王

1 : GS(14)@2016-12-24 10:55:36

負皮是如何煉成的?其實唔難嘅,只要口沒遮攔兼惹火,或者係不斷有是非,都好易引起網民圍剿,再講多幾句,久而久之就好易變成「負皮王」喇。王晶:王晶不嬲都好有「自信」,一向都有同網民開火嘅習慣,試過為《大唐雙龍傳之長生訣》選角問題同fans嗌交;又試過就雨傘運動同前學民思潮召集人黃之鋒喺facebook駁火。俾人負評唔係一日嘅事,今年初仲有人話杯葛王晶套賀歲電影《賭城風雲3》,而王晶又好寸咁話香港,票房只係得內地嘅25分之1……王晶啲言論咁唔重視佢出身嘅香港,就知點解點啲人要負皮佢啦。羅鈞滿:講起羅鈞滿,會諗起啲乜?滿身是非囉!幫佢數一數,2012年違反交通條例停牌3個月;13年被指曾經炒燶窩輪,幾十萬債要家人幫手填數;之後又博出位,指王維基嘅香港電視不獲發牌係商業失敗;2015年又背住女友張文采搭上空姐,結果被對方狠批浪費花陰;再到今年3月,再次因為醉駕,被判社會服務令同停牌兩年。咁多是非,有人就寫咗篇網文《做人別太羅鈞滿》,一邊暗寸佢唔生性,一邊叫人唔好學佢。負評太多機會又冇珍惜,結果係連大台都唔同佢續約,喺上個月台慶日,羅鈞滿要宣佈離巢。蘇永康:蘇永康一向都好有火,睇佢年中同「天下第一關」鄭紹康隔空開火,就知佢像講嘢唔顧後果。上月底蘇永康宣佈老來得子,咁高興當然要分享啦,不過佢講到對個隻嘅期望,就好狠咁話:「我唔想生個梁天恆,我唔想生個游蕙禎,我要佢識分莊閒。」一次過拉咗梁頌恆、梁天琦同游蕙禎落水,搞到網民反感。蘇永康仲被人拎番以往吸毒件事嚟講,又俾人喺facebook洗版,不過統統都俾蘇永康刪除晒啲留言,成為新一代負皮王。




來源: http://hk.apple.nextmedia.com/entertainment/art/20161224/19875760
PermaLink: https://articles.zkiz.com/?id=319994

Next Page

ZKIZ Archives @ 2019