上星期日沙田跑馬，冇乜大賽，無甚吸引力，點知會員席內人頭湧湧，好多人噃，連一位馬場稀客會計C也一早到場，問佢做乜一早到馬場，佢話：「為咗年初三賽馬訂位吖嘛，早啲到廂房排隊訂位呀。」現場訂唔到位又點？有部份枱係留俾電話訂座用嘅，但打電話會打到你手軟，等半小時都未必輪到有人聽你個電話呀。
會計C慶幸到得早，卜到一張六人枱，遲佢十分鐘嘅人士，已經要落入「等候名單」，極可能得個等字，最近呢幾年，馬場人流逐漸恢復九七前氣氛，入場者眾，但入場人士嘅外貌，越來越老，此乃馬會面對之「馬迷老化」之隱憂也。此日在會員席沙圈對上嘅牆邊座椅，眼見一位老婦與一位五十零歲嘅男士對罵，互不相讓，男士鬧老婦霸位，老婦鬧男士遲來先告狀，呢啲事，都唔知邊個啱，邊個唔啱，不理為妙。
馬迷老化，係不爭之事實，但馬會投注今季嘅政策就令啲老化馬迷老大不爽，左丁山今季好少賭波，就因為唔鍾意打1885被轉往1886，一定要按1按2按3咁樣落注，冇人聽電話嘅。原來買馬亦如是，一啲長者馬迷就投訴打電話接咗亦被逼如此，過往啲電話接線生全部唔知去咗邊。喂，長者及中年馬迷邊度鍾意或識拎住個電話㩒1字，㩒2字㗎。馬會投注部即係想趕客箒。
如果話咁樣做會對年青馬迷更方便，咁又表錯情噃，左丁山導咗幾位80後年青人升仙，教佢地刨馬，佢地學懂後，好似肥仔K同佢班老友，全部用智能手機上網下注，根本唔識、亦唔理會甚麼電話投注。如果馬會希望逐步淘汰人手聽電話投注，對普羅馬迷實在唔公道，對年長馬迷更加唔公道。如果話咁樣可以慳錢，不如叫梁振英政府少啲打馬會心口搞這樣那樣嘅展覽啦，難道特區政府五行欠水咩，政府每年拿一億半億搞文物展覽恐龍展覽，根本係舉手之勞，全無難度，馬會係唔應該做冤大頭嘅，有時配合中央做宣傳，搞火箭展覽，民政事務局理應挖自己荷包，點解要搵民間機構贊助？馬會做慈善係要惠及貧民，唔係幫忙坐擁萬億元儲備嘅政府做公關騷。 