| ||||||
賭王何鴻燊九十二歲生日，密密食足三餐，上週四晚最後一站，嚟到香港仔珍寶海鮮舫由三房陳婉珍為他賀壽。今年何超雲身邊沒有了小聰子，舉動也較為低調，反而著Dolce & Gabbana紅裙嘅超蓮，與細佬何猷啟於席間滿場飛，代阿媽招呼賓客，搶盡風頭。貪靚捱凍 當晚氣溫驟降只得十三度，但身穿金色背心裙的何超雲抵冷貪瀟湘，寧願食西北風也不著外套，凍到要攬住雙臂等賭王老豆駕到，問她送什麼生日禮物？「我哋夾錢，喺外國買咗隻金雞嘅擺設做禮物。」天氣寒冷，賭王就由頭包到膝頭哥，但可能連日舟車勞頓，他亦明顯有些疲態。 其實之前四太為賭王擺壽酒，何生為免過分勞累，也會先行離席，留低太太主持大局，今次三房設宴，他更是逗留一粒鐘便撤退，三太擔心丈夫，於是陪埋一齊回家，剩低三個仔女招呼客人。 代母宴客 為了代父母招呼賓客，身穿購自北京唐裝衫的何猷啟，孖住超蓮整晚滿場飛，忙着與親戚朋友寒暄、拍照，又要與酒樓部長安排打點餘興節目，相反家姐何超雲就只係留守主家席。何超蓮與細佬每見有長輩離開，即飛奔出去相送，記者問她歡樂滿東華表演排練成點？超蓮竟然話 ：「我尋日先返嚟，仲未開始練習，其實我未肯定發生乜嘢事，無喇喇就叫我唱歌。」會唔會同緋聞男友吳克羣合唱？超蓮聞言即耍太極話：「媽咪搞嘅嘢，我好多朋友都支持。」忽然見到猷啟隻右手傷痕纍纍，原來又係為咗東華表演，「佢（猷啟）好犀利，為表演整親隻手，縫咗八、九針。」以為三太一定好肉赤，超蓮笑話 ：「媽咪慣咗，佢成日都整親。」 | ||||||