在置地廣場碰到投資Ｆ，佢素來精於搵錢，最叻低買高沽，三十幾年在中環打滾，從銀行見習生碌到今日成為投資富豪，手法之高超，拋離左丁山幾十個馬位。佢呢日開口就鬧盧寵茂，話佢係本土主義，排斥外人，違反香港價值，佢完全唔識誰是馬斐森，但因為盧寵茂之言，居然力撐港大新校長，話不惜投書南華早報，與盧大教授打筆戰，同時連「陳乜瑩」都鬧埋一份，問左丁山：Who the hell is she?
左丁山唔識盧教授，但與陳婉瑩相交多年，雖無意為佢辯護，但細讀佢嘅反馬斐森文章，自問可以領略些少佢嘅心情，佢在港大畢業後，移民美國，長期在紐約做華文報紙，地區報紙記者，親身見到與體驗不少美國社會之種族歧視、階級歧視各種不平事，見過不少美國白人學棍與佢地到中國搵食之作風，呢種經驗，非今日港大學生及香港其他大學生所能體會嘅，在陳婉瑩學生時代，港大之英國白人教授，位高權重，幾曾放華人講師在眼內呀。
左丁山曾有一位好友獲獵頭族垂青，多年前獲某英資大機構聘任做部門主管，係第一位本地人出任該職，但佢未上任之前，與僱主談判，要求獲得前任英國人主管之房屋津貼待遇，僱主堅決拒絕，而且機構內又傳出好多風聲，話左丁山位老友資歷不佳，只係浸會畢業，英文唔夠好云云，顯然係有其他華人高層對佢患上眼紅症，故意放風打擊之。老友一氣之下，不肯上任，轉去一間歐資大行做副總經理，英資行又點呢？從外地某個辦事處調咗一位全無香港經驗，三十歲出頭之英國人嚟做該部門主管，哦，有咗白人上任，機構內嘅華人高層平靜下來，冇人敢批評新人係僆仔無經驗、資歷淺，於是「天下太平」，呢類事情左丁山見過不止一次。英資行特別比美資行有隱藏性歧視，有啲美國老闆反而可以用人唯才，將信差出身嘅職員一路擢升至副總裁。港大請馬斐森本來無事嘅，只錯在沒有甚麼真正一流人才願意申請做港大校長職位箒，倘若馬斐森來自愛丁堡、UCL、史丹福，自然冇乜咁多批評聲音啦！布里斯托醫學院？英國「衛報」之最新英國大學醫學院排名榜（31間）之中，排第30名噃！ 