📖 ZKIZ Archives

連番出錯 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131006/18451452
今年啲傳媒機構好似輪住出錯，令當事人（例如總編輯）非常尷尬，恨不得搵窿捐，例子之一係「信報」在九月十七日頭版頭條，大字標題「鷹派棄掌儲局毆美股揚」，將「歐」變為「毆」，意思大不相同，為何如此，只能以「鬼掩眼」嚟解釋。例子之二就係九月三十日，無綫電視新聞報導日本政府打算在十月提高消費稅，由5%加到8%，同時會推出刺激經濟措施高達五萬億日元，折合係「港幣3900萬港元」，真係俾無綫嚇死，五萬億日元相等於3900億港元就差唔多，三千九百萬港元對日本經濟何來甚麼刺激呀？呢段新聞播完又播，無綫新聞部嘅財經編輯走咗去邊？但最好笑嘅還是十月一日「明報」新聞網站居然、突然將「特首即將致辭」，誤寫為「特首即將辭職」，「致辭」與「辭職」相差好遠噃，唔係「鬼掩眼」呢個藉口可以解釋錯誤呀嗎？
左丁山寫專欄，大意錯字當然唔止一次，有時諗番轉頭，欲速則不達，爭住快，快快快，最有信心之時最易出錯，好似上次寫冼為堅博士間「萬雅珠寶」是私人「公司」，點知，印出來之後，竟然係：「萬雅不是私人公司」，明明改過原稿，點解刪漏一個「不」字呢，唯有仰天長嘆，鎖你鎖你。
寫錯字，猶可脫身，理念錯了，就吟詩吟唔甩，近日有人寫和黃負債近萬億，和黃最後總要負責，未免強辭奪理，又有基金經理寫電能負債過多等等，在資產負債表上不見之負債，都入埋和黃、電能條數，其實十分牽強，可能作者慣咗係只議論，無實際金融工作經驗之故。
左丁山在銀行負責貸款年代，對大集團附屬公司或聯營公司或合資公司貸款，理論上當然為咗最佳保障，向呢類公司之最終控股公司索取擔保（parent company guarantee），但永遠得個桔，借款人之紐約總公司唔會睬你嘅，經多番談判，頂多只能拿到Letter of Responsibility，或者係較弱嘅Letter of Awareness，放在檔案，以示已經盡咗最大努力，保護銀行利益。但熟悉法律嘅律師會同我地講，呢類文件未必受法庭認定有效，有等於無。到了後來，借貸對手實力越強，越係大鼻，貸款全部係non-recourse（不能向母公司追討），完全係項目貸款（project financing），借不借由得你，世界上多的是銀行。以今天和黃、電能之聲譽及實力，左丁山幾難相信佢地嘅附屬公司、合資公司舉債，會提供母公司擔保，未睇過貸款協議，就說甚麼和黃、電能要為非本身負債負責純屬猜測，無理據支持。
PermaLink: https://articles.zkiz.com/?id=76495
Next Page
ZKIZ Archives @ 2019