ZKIZ Archives


炒apps「富四代」

2013-09-26  NM
 
 

 

老明韜(Teddy),二十七歲,一身肌肉猶如《激戰》中的張家輝,不笑時「嚇」倒眾生,怎成天使?但對有橋無錢、專寫apps的IT程式員來說,碰到這個「天使投資者」(Angel investor),的確比遇到天使更興奮!他是恒生銀行創辦人何善衡的外曾孫,嚴格來說,是「富四代」。出身富裕,他不愛炒樓炒股,獨愛「炒」apps,即入股並提供資金予start up的apps生意,搏股份隨時升值。扑中的,轉手賺五十至一百倍。現時有七隻apps在手,Teddy期望其中一隻變Facebook,他說:「如果我早啲識投資Facebook,計過數,已經賺到上萬倍!」

月中,記者在數碼港一個「配對」場合中遇到Teddy。此類「配對」,乃要撮合start up項目及天使投資者;由於近年不少IT人藉科網熱而自行創業,搏食番鋪大茶飯,投資者便揀蟀投放資金,成為所謂的「天使」。當天Teddy獲大會邀請,到場聽創業初哥簡介發展大計。不過Teddy聽的不是初哥們的「橋」,而是睇「人」:「有完整嘅business plan係吸引,但idea唔係最重要,往往同最後嘅成品係兩回事,反而要睇團隊肯唔肯學習同聽人意見。」不過,當日參加者不夠主動,沒有上前找他傾談,最終無人能打動Teddy。五年前,Teddy創辦創投基金Noir Fx,投資在不同類型的Start up生意,包括一間日本精品酒店,不過Teddy最鍾情的還是apps,他的十項投資,其中七項都是apps,投資額約三百七十萬,他說:「我日日玩apps,夠貼身。而且好多大公司好似Google同Samsung,發展緊wearable technology,會係發展apps嘅新平台,呢個係整個IT界嘅大趨勢!」

望扑中賺百倍

Teddy投資的第一隻app叫「靈機妙算」,當中包括星座、八字、塔羅等命理測算方法,玩家只須輸入時辰八字、名字,甚至QQ號碼等相關資料,經app運算便可趨吉避凶,在內地甚流行,已發展至擁有自己的網上商城及收費會籍。Teddy說:「到而家已有幾百萬個下載,團隊由七個人發展到六十人。四年前投資咗一百萬,每年都有分紅。」其餘的apps,包括體育訓練「Coachbase」,NBA華盛頓巫師隊亦用來協助訓練;而 「Snaptee」則讓客人用自己拍的照片來設計T-shirt。如想擁有實物,用家可選擇付款讓「Snaptee」代為印製。用家還可讓別人買自己的設計,成功賣出者會有佣金。Teddy可謂IT界的「窮人恩物」,但他一樣搵緊「更大」的老闆。因他同樣搏條橋被大公司睇中,以高價收購股份又或上市。他曾賣出兩個apps,但欲言又止說:「同partner有保密協議,唔講得細節。」炒股有分藍籌、仙股,Teddy說手頭的apps 隻隻都是「仙股」,實行以小搏大,期望「扑中」一個,就可以賺取幾十倍的利潤。「發大咗嘅app都唔會俾你買。不過細有細好,投資額細,但買中一個,講緊嘅回報可能係五十到一百倍。只要我手頭有一個app彈出就得!」Teddy說。炒apps 還要「坐得」,「正常都要四至六年先回本,有啲仲坐緊艇。依啲嘢逼唔嚟,要循序漸進。」他說。Teddy手頭的apps,暫時都在「坐」,記者問他不怕最終血本無歸?Teddy則認為「有賭未為輸」。他會定期和已投資的生意老闆們開會,以緊貼進度。事實上,Teddy一直期望投資的apps,他日會變另一隻Facebook,他飲恨說:「Facebook未公開俾人註冊時,我已經玩緊,覺得呢件事好刺激。如果早期識擺錢入去的話,可能已經有上萬倍嘅利潤!」

追尋 IT夢

回本無期,卻先滿足了Teddy的「慾望」,聽見Teddy有投資算命app,攝影師打趣的伸出手掌叫他睇掌,Teddy一臉認真地說:「我真係識睇相o架!我鍾意投資apps,其中一個原因係可以學到唔同嘅嘢,好似投資『Coachbase』,我學咗好多籃球戰術嘅知識。」這還讓非IT出身的他,能戴上IT人的帽子。Teddy的祖父老洪鈞,是恒生銀行創辦人何善衡的大女婿,父親老元迪曾任職於IBM,亦是上市公司駿科網絡(8081)前執董及股東。來自IT世家,「其實我daddy好多年前都有投資條碼掃描器,亦有幫人解決創業問題,算係早期嘅天使。」在耳濡目染下,Teddy對IT充滿興趣,「由細到大都鍾意打機,魔獸世界、CS同Monster Hunter 都煲過。」他中學畢業後,曾想過到美國讀IT,不過適逢科網爆破,最終選擇了更有前途的管理。

念念不忘,必有回響。平日做健身教練的Teddy,除了泵水,他投資其「波友」林基偉(Keith)創辦的「Coachbase」後,獲對方邀請擔任公司顧問,參與實際運作,Keith說:「好彩有Teddy嘅資金,我哋可以請多一倍人做研發,佢有投資其他apps嘅經驗,俾到好多意見,又喺network上幫到我哋好多。」Teddy亦樂於趕潮流做apps界的窮人恩物,「炒樓炒股,回報穩定,但無可能影響公司決策,但投資apps唔同,好多programmer唔識做生意同處理法律文件,我早排先同Keith返咗廣州見其他投資者。」他一臉滿足地說。

PermaLink: https://articles.zkiz.com/?id=75816

Next Page

ZKIZ Archives @ 2019