最近科技大學辦家長日，且有一位教授出電郵要求班上學生準時上堂，不可遲到，否則罰企，於是一時傳為「笑談」，講吓香港大學生是否變成「小學雞」。
辦家長日其實無可厚非，香港增加大學學位，只係近二十年之事，二十年前嘅大學畢業生，如非留學海外，便是港大、中大生，人數甚少，即係話，今天之大學生家長，理論上年齡在四十五歲至五十五歲之間，呢個年齡組別之香港人之中，有大學學位嘅，相信在10%以下，肥仔K係80後，佢讀中學之時，老師問班上40人：「邊一位同學嘅爸爸係大學畢業？」佢記得只有一兩人舉手。
既然香港家長之大學生比例偏低，大學搞一次家長日，向佢地介紹大學生活，道理係冇錯嘅，最怕一啲家長參觀大學宿舍之後，批評多多箒。據一位九十年代畢業嘅師弟Y講，佢揸車送表弟攜帶行李入學生宿舍，見到一位阿媽猛咁投訴房間內把掛牆風扇有好多塵，要求校工清潔。大學宿舍何來那麼多校工清潔宿舍房間風扇吖，師弟Y話：「當年我又係住嗰間宿舍，記得我同roommate一齊夾手夾腳去將房間抹一次嘅，包括抹埋風扇。」
送子女入學，在美國甚有傳統，一到九月升學時間，美國大學校園內人來人往，家長大量湧至，校園附近嘅酒店都唔知幾好生意。跨國公司亞洲區總裁、師兄C十幾年前送過女兒到耶魯，參觀宿舍，房間設備簡單，鐵床一張，有風扇，冇冷氣，秋風未至，房內氣溫炎熱，還有蚊蟲飛來飛去，C太太見了，為之大皺眉頭，問吓人：「間間房都係咁㗎？」一位職員答得幽默：「布殊總統同佢個仔（當時未做總統）都係住呢啲房嘅，幾十年未曾變過！」
大學生上堂可否遲到或教授點名，多數有明文規定，但各處鄉村各處例，大學各有不同，教授也各有不同。哈佛大學嘅暑期英文班收費極高（約十萬港元讀八個星期），規矩極嚴，學生有三次遲到紀錄，不問情由，會被立即驅逐出暑期班，學雜費一概不奉還。一位老友之子今年去完返嚟，大嘆上堂密集刨書作文讀得辛苦，佢隔籬班就有一位日本學生犯了遲到規矩，喊住咁離開宿舍返回日本呀！不過哈佛做乜都係香嘅，若果香港有大學膽敢如此，實俾傳媒鬧死！ 