身為楊受成太座嘅陸小曼，身份亦係英皇國際主席，既然身居要位，當事人自然唔會齋做闊太陪老公去吓ball出活動咁簡單。上個禮拜五（十三日），陸小曼變身領隊，帶朋友行英皇鐘錶珠寶掃黃金。
家陣香港啲金鋪仲多過便利店，朋友想買金，楊太當然落足嘴頭，招呼周到！老闆娘拖師奶團駕到，兩位職員前後夾攻，由攞金飾到試戴，全程殷勤。肥水不流別人田，自己友幫襯，埋單可以有折扣，就算而家冇，學張家輝話齋：信佢！將來都會有。