燃氣股，都有過一段不短嘅美好時光。
可能好日子實在太長，令大家都沉溺喺入面，總之好多人總有一隻半隻燃氣股係個倉入面，而更是不少人嘅「核心持股」
603最靚嗰段升浪已經在今年3月完結。之後呢半年，都是浮浮沉沉。
呢幾日，更連續下跌，近2日成交更明顯增加。求其打開張圖睇睇，「都幾樣衰下」⋯⋯
星期一（26號）出業績，睇下又會點？去到呢個位，就坐多日吧⋯⋯唔爭在。
呢尐股其實先輸死人，燃氣股喎，個個都讚好，又有增長，佢唔升姐都無跌呀（mid to long term計）！你渣住呢尐股，已經輸咗機會成本，磨足半年都係咁，依家仲要穿埋底，業績前先搞尐咁嘅嘢，我諗若非對其業績有充份了解及信心爆棚，一定唔會舒服得去邊。唉，唔係想抽水，只係慨嘆呢尐外表善良嘅股先令人輸得最甘。唔輸過錢點買到教訓呢？
中國電力（2380）好似都有不少人想買或者已經持有。你仲諗緊煤價下跌（或者KEEP住平）或者覺得水電仲有得去？業績好好喎，同比增長1.6倍喎⋯⋯ 我覺得2380已經唔sexy嚕，仲有，煤股彈緊啦都，煤價係咪有尐嘢呢？水電？雨季過咗一半有多啦？今年都落唔少雨啦，再增長係咪即係再落多尐？我唔敢講2380要gameover，但係，唔sexy嘅公司，做乜仲要買？我買股係好濫，但係同時都好揀擇，無幻想空間嘅股票，除非個圖好靚（因為我覺得無姐，但好有機會係我唔識嘢發掘唔到佢sexy個位），根本就唔應該買，就算買都唔會大注。
我咁講可能得罪不少人，而我亦只是一個成日輸錢兼有時好「燈」嘅小小老散，可能一出完POST第二日603同2380就即刻見底回升都未定。歡迎留言交換看法，多謝。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
吹水區：
現在嘅我沉迷炒作，可能好快會炒到破產。可是，我又唔見得打著「價值投資」旗號嘅人又有邊個係勁到無倫，你有信心勝過雪球網或者中國內地嘅高手嗎？我純粹以個股分析而言，基本上，無乜邊個做到一樣買股票極之重要嘅嘢：前瞻性。
你拎份年報出嚟刨，好喇，你真係好熟間公司喇，得出既結論係間公司好好，值得持有甚至要加注。我好求其咁舉個例子，就手機股啦，前幾個月幾強勢大家都好清楚。手機股王，一定唔會無瑞聲科技（2018）份。之前就炒iphone啦（都好耐之前嘅事），之後話有三星訂單嘛，所以iphone嘅衰落仲有三星頂住，咁依家佢又做乜跌呢？兩大龍頭都幫襯佢喎⋯⋯我都唔知，我無研究亦從未買過2018，而我覺得佢要跌都合理。蘋果三星個份額可以講話係飽和咗，如果瑞聲過往嘅增長動力無以為繼，就算盈利保持到，但因為增長前景無以前咁好，調低earning multiple，由20倍變成15倍，都要唔見25﹪啦（如果純利不變）。我唔係話2018死梗，不過，如果做功課嘅程度仲未深入到可以預視佢未來嘅增長動力（即是發掘真正嘅價值），例如可能是知道佢仲有新客戶，或者新產品帶來新財路，或者身為龍頭嘅佢地位進一步鞏固，做成Oligopoly 寡頭壟斷嘅局面令到佢享有溢價（或者呢一點現時已經price-in咗），等等，即係諗唔到有理由要繼續升。如果隻股票諗唔到有升嘅理由，就唔好玩。如果覺得佢會升，但實情佢係跌，咁就要重新檢視自己嘅看法，永遠先尊重市場（如果掉返轉你覺得佢會跌但佢又升畀你睇都要重新再睇過）不過，太多人個self-esteem太強，做唔到快速修正看法，結果多數是輸死。
忽然覺得講完一大輪都講唔到重點⋯⋯
OK，用呢句做結論：如果你嘅研究並未能真正解釋到公司嘅業績股價嘅升跌，例如你仲係覺得間公司RUN得好好但股價已經回落咗好多，離場吧，我地做散戶最大嘅優勢係倉位細，易走鬼，咁都唔好好利用，太傻了。
以上全部都係我亂UP，重申，我從來無研究過2018⋯⋯
我呢尐亂UP全部係圍繞佢前景。如果講前景，手機界現時增長最勁係平價smartphone，以此思路去睇，我會揀台股聯發科（2454）。因為佢係專門研發平價手機解決方案，sony嘅中低階機都係用佢嘅出品，實質乜嘢係「解決方案」⋯⋯well，我無深究⋯⋯不過，睇下人地個股價表現，我相信市場已經話咗你知佢好唔好。
歡迎大家留言交流，多謝！