ZKIZ Archives


入行19年經歷肥瘦鼻歪韓君婷轉行OL 做美容白老鼠

1 : GS(14)@2016-11-10 08:02:39

■韓君婷毅然離開娛圈,上月轉做醫學美容,她表示新工作令她重生,帶來很多滿足感。攝影:林德雄



現年41歲、97年亞姐冠軍韓君婷,當選後在娛樂圈打滾至今19年,曾因40吋坐圍被取笑做「籮霸」,過去十多年體形又脹又縮。前年她在新加坡仆崩鼻,搞到破相,幸好手術後康復。韓君婷忽然對醫學美容有興趣,上月低調到一間藥廠返工,退出幕前轉行做OL,公司日前更派她主持一個醫美講座,即場示範美容儀器,貪靚的她直認愛做「白老鼠」。



韓君婷於97年當選亞姐冠軍,之後加入娛樂圈,由亞視做到無綫,她曾離港到新加坡協助胞兄打理生意,近日韓君婷回流香港,個多月前受聘Merz德國藥廠做診所發展培訓執行員,主力宣傳醫學美容和相關儀器。韓君婷日前接受本報專訪,被公司安排到尖沙嘴一間皮膚中心主持醫美講座的她,對新工充滿熱誠:「轉工係可以令一個人有重生感覺。」



■韓君婷日前主持講座,又親自向客人講解儀器。

■韓君婷不介意自己的身形成焦點,14年前成功纖體後,即把家中的磅都丟掉。

■去年韓君婷承認仆崩鼻,之後接受鼻骨矯形手術。資料圖片

做演員永冇辭職

講座中,韓君婷細心介紹最新美容儀器和示範,表現淡定。告別幕前轉做OL,她強調並非厭倦當藝人,只是想接受新挑戰:「藝人講際遇,好多外來因素,我唔係嗰種要做明星。做藝人成日要聽唔同聲音,有真有假。我而家搵到啱嘅工作,受公司賞識,嗰份滿足感好大,我對醫學美容好有興趣。」會否因戲癮想復出?韓君婷直言:「演員成日有戲癮,做演員永遠係演員,永冇辭職,到我死嗰日都會寫出嚟,避唔到呢啲新聞。」過去演藝生涯絕對為她留下美好回憶,即使被稱「過氣藝人」都不計較,韓君婷說:「我唔會嬲,反而開心佢哋對我咁深刻印象,證明當年做出成績。」


獨愛大躉尤加利

新工讓韓君婷接觸新事物、新科技,比做藝人時話題更多。她的工作要推銷美容儀器和產品,必須做「白老鼠」,但她強調多年來臉孔從沒添加或微調:「五官純天然。」韓君婷前年不慎在新加坡滑倒令鼻歪變形,去年醫生建議接受第一期鼻骨矯形手術,她表示暫時不會再做手術:「基本上係康復,唞氣運作正常冇問題,個鼻太多注意力,就等同以前太多注意力擺咗喺我嘅盆骨度。」5呎7吋高的韓君婷過去10多年暴肥暴瘦,一時巨咪籮霸,體重高達150磅,一時變火柴人,弱不禁風,多年來成為笑柄,她說:「身形同體重,對我嚟講最冇壓力,我肥又有導演搵我拍嘢,瘦又有人搵我拍嘢,對我工作冇阻礙。我最鍾意當年錢嘉樂叫我做『大躉尤加利』呀,日本妹,卡娃兒!」眼前仍偏瘦的韓君婷到底現在體重多少?她說:「我唔知,我屋企個磅喺減肥後掉咗,你日日望住佢畀你壓力,唔需要咪掉咗,點解要為一個冧把咁唔開心?」韓君婷自評現在狀態有7分,她說:「我唔係生出嚟靚女,要靠打扮加分,懶人享受唔到呢啲,如我有80歲命,仲有3分可以進步。」採訪:陳杰




來源: http://hk.apple.nextmedia.com/entertainment/art/20161110/19828224
PermaLink: https://articles.zkiz.com/?id=314892

Next Page

ZKIZ Archives @ 2019