世界第二大廣告公司與第三大廣告公司合併，成為世界第一，前者叫做陽獅，後者叫做宏盟，宏盟呢個名字認真難讀，呢間公司既然擁有世界一流嘅創意團隊，唔通單獨係冇識得廣東話讀音嘅創作人才，俾已故嘅黃霑、林振強聽到，實會笑死。
多一間超級巨型公司，當然競爭會減少，對廣告客戶無益，但世界上既然不斷有併購，外人亦好難阻止。日前與一位經常與4As廣告公司聯絡搵生意嘅報紙廣告總監在Domani食飯，佢話廣告公司愈來愈大，議價能力日益增強，報紙係難做的，但目前唔得閒去諗咯，因為有三重大山阻路，令廣告Sales十分困難，大山之一係樓市辣招，令成交量大減，二手樓廣告急跌，大山之二係一手樓銷售條例，發展商紛紛暫時停推新盤，一手樓廣告失曬蹤，大山之三係「商品說明條例修訂」生效，廣告內容動輒得咎，好多字唔用得，佢地老總已經指令停用「全攻略」、「必殺技」呢啲字眼，講銷量第一要有書面證據，初初搵律師睇過新修法例之後，報紙所有廣告內容要由廣告總監一審，公司秘書二審，老總三審，先至准出街。咁搞法，仲駛趕及印刷時間嘅？假如有兩個廣告要ban（禁），臨急臨忙，搵乜嘢新聞去補回版面呀？於是大家再度過，公司秘書發覺自己責任大到不得了，但自己從未涉獵過廣告業務，較為傾向於左ban右ban，又係唔掂喎，最後點搞？廣告總監話：「唉，最後咪又係我孭曬囉，但有事就由老總上法庭嘞！」呢條新例雖不致影響廣告收益，但大大增加合規（compliance）成本與時間，賺少啲囉。
聽佢一言，唔怪得呢排見唔到有「泰國香米」，一位知情人士話俾左丁山聽，由於泰國米太貴，高出越南米近一倍，所以不少泰國米與越南米混合溝成一包出售，如果叫做泰國香米就會違反條例！一位零售界頭頭講，佢地曾經與海關拗過「揚州炒飯」、「富士蘋果」、「陽澄湖大閘蟹」等名稱是否違例，海關卒之肯讓步，否則「揚州炒飯」要改名！ 