ZKIZ Archives


讀書不成 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130707/18325101

馬雲讀大學時,入讀杭州師範學院(已升格為大學)英語系,1985年畢業,在杭州電子工學院(現杭州電子科技大學)教英語,1995年創辦網站,之後就是歷史了。記得在1997之前,創業基金經理S係全港第一個向左丁山講及一個叫做馬雲之人,佢話在杭州認識咗一位奇人,名叫馬雲,將來會係一位了不起的互聯網天才,決定投資於馬雲嘅公司,名字係阿里巴巴。當時香港互聯網站還是剛起步不久,于品海於1995年請莫乃光在明報工業大廈砌一個網站,叫做HKNet,左丁山入去睇過,都唔知莫乃光搞邊科,總之唔明就唔明,故此基金S對左丁山講馬雲之時,自己聽到一嚿雲。十六年過後,方知人地係天才,自己係白痴,基金S現長駐北京,馬雲應該仍然記得佢啩。
馬雲在「伴你啟航青年創業論壇」話讀書不問出身,杭州師範學院就係最好嘅學校,此大學如有馬雲住過嘅宿舍,應該留番馬雲住過間房,歡迎遊客或學生參觀,就好似肥仔K當年到耶魯學習一個暑假,耶魯學生向佢地介紹老布殊小布殊住過嘅宿舍一樣。馬雲讀英語系而成為互聯網巨人,美國追緝嘅史諾登中學未畢業就成為Booz Allen願意聘用嘅電腦技術員,可以接觸國家機密資料,一位讀者來信問:「看史諾登出身,如何教仔好好心機讀書上學?」
呢個係好有趣嘅問題,古老說話:英雄不問出處,錢穆係中學畢業生,馬雲不是北大清華學生,蓋茨、塞格保係哈佛退學生,喬布斯在大學未讀完,再睇嚇香港啲大粒富豪,有邊幾位讀完大學呀,肥佬黎只係小學畢業啫。咁講法,如果仔女話:「我唔讀書咯,我一樣可以做李嘉誠、蓋茨、肥佬黎、史諾登、錢穆!」點樣答佢?如果係左丁山,一定會話俾佢聽,成功無僥倖,讀書少而做成大事之人,一定係(a)聰明之極,(b)勤力過人,(c)具無比上進心,(d)驚人毅力。睇嚇仔女,如果呢四樣皆無,好心啦,考嚇文憑試爭取入大學好過。著名暢銷書作家Malcolm Gladwell(The Tipping Point,梁錦松曾大力推薦)在The Outliers一書就指出,成功之人皆曾對自己之專科下過最少一萬小時或以上嘅苦功,蓋茨就係一個好例子,讀書不成而事業成功之人個個都係咁嘅!


PermaLink: https://articles.zkiz.com/?id=63156

Next Page

ZKIZ Archives @ 2019