📖 ZKIZ Archives

日圓跌，日本貨、旅行團再度成為搶手貨，受惠的還有香港各大日式超市百貨。本週一，第四間一田百貨於荃灣廣場正式開幕，場面墟冚，未來三個月，屯門及旺角的一田超市亦會陸續開張。如此「狼死」擴張，市場罕見，更兩次逼走對手AEON（前稱JUSCO），霸佔其地盤。對此，有「橋王」之稱的一田行政總裁莊偉忠反高潮道︰「唔係我想o架！」事實是，一田和所有場地，都由新鴻基地產持有。「阿媽」話開，「阿仔」聽命。不過，「阿仔」亦很爭氣。莊偉忠六年前接手一田後，不但扭虧為盈，生意額更升近四倍，分店亦由一變六。但這位半途出家的「高才生」，卻指份工是有史以來「最輕鬆的」，更招積道︰「我用緊嘅方法，係大家喺小六前都聽過晒嘅道理，做唔做到絕頂高手都係靠呢啲！」

荃灣廣場的一田百貨，於上週五開始試業。自小住在荃灣的記者，從未見過這個位於荃灣西的廣場如此熱鬧。早上九時多，超市開門前，已有長龍在守候。本週一開幕儀式上，日本駐港總領事﹑日本貿易振興機構所長等都俾面出席，行政總裁莊偉忠滿場飛。他其實不諳日語，卻能和日本嘉賓「攬頭攬頸」，老友鬼鬼。超市人頭湧湧，問莊偉忠有否統計開幕人流，他再次語出驚人﹕「人流只係虛榮，香港好多商場老作人流。我哋係全年咁睇，唔會逐個月睇到數定唔到數。」一田所在鋪位，原是對手AEON百貨，現已搬至一街之隔的灣景商場。為抗衡一田開張，近日正聯同大窩口新店推出「開店200祭」優惠日，部分貨品低至七折。對此，莊偉忠亦不放在眼內﹕「除咗一年兩次優惠日，一田從來唔做減價，你唔會喺鋪頭入面見到Sale字眼。鬥平只會摧毀盤生意。」

「做人講禮貌」

莊偉忠強調一田的迅速發展，不是靠「平」，而是靠「關係」。「唔理係日本或香港嘅供應商，都好鍾意同一田合作。」推銷員出身，他最擅長的正是人際關係。「其他行家對待供應商，會有一種『我依家幫緊你』嘅態度，我就着重互利嘅關係，見到佢哋都笑晒o架。細個阿爸都有教，做人最緊要有禮貌，小學生都識。」莊偉忠笑說。為表「誠意」，五年前他上台後，立即取消在業內通行已久的「上架費」。「講互利唔可以得棚牙，無理由人哋都未建立到銷售網，就要先俾嚿錢出嚟。呢個唔係唯一賺錢嘅途徑，佢哋賣到貨我哋先抽佣，一樣有錢賺。」莊偉忠指，由於「風險很低」，供應商都喜歡在一田推售新產品，「燈油火蠟都係我哋出，佢租我哋嘅器材，就實報實銷。」生意以外，還要拿出「真心」。日本三一一地震，是一田發展的其中一個轉捩點。地震後，一田的日本海產﹑肉食銷情暴跌七成，莊偉忠一方面急找其他貨源補位，另一方面是想到日本供應商的苦況。「人哋死人塌樓，生意點都要擺埋一邊先。我出咗一千封親筆簽名嘅信俾所有日本供應商，叫佢哋唔使擔心，我哋唔會中斷合作。」同年七月，災情穩定後，莊偉忠親自帶領香港傳媒團，到日本各地視察，希望恢復香港人對日本食品的信心。「日本人覺得我嗰次係義舉，高規格招待我哋，成個日本都知我哋嚟。嗰次我交到好多日本朋友，仲同熊本縣知事做埋好朋友。依家我喺嗰邊真係打橫行o架！」莊偉忠道。

「識為對方着想」

為人着想，聽來肉麻，但莊偉忠卻說得出﹑做得到，在公在私，都贏到掌聲。其中一個例子，就是縮減數期，始於○八金融海嘯後時。「嗰年嘅購物優惠日生意好好，埋數時我突然間諗，我哋有數期，供應商唔可以即時受惠，當中可能有人因為金融海嘯而有困難。」於是莊偉忠致電公司的財務部主管，「叫佢計吓公司嘅現金流及提早找數蝕嘅利息等，睇吓可唔可以提早找數俾供應商，佢第一時間答我﹕『咁做唔啱行規喎』。」最後，一田仍提早十日找數予全部供應商。「當中唔少公司規模仲大過我哋，但我唔知邊個有困難，咪一視同仁囉。」○八年只是一次性措施，但年半前，莊偉忠開始正式分批縮短找數予供應商的數期，部分已減至少於四十五日。每一次出信予供應商，都有他的親筆簽名，以示誠意。他的「努力」沒有白費，「好多供應商肯喺購物優惠日時賺少啲，俾個好價我哋，仲會俾最好嘅sales﹑最好嘅貨，以最好嘅運輸嚟支持一田。」莊偉忠興高采烈地說：「有個供應商同我講：『莊生，人哋做推廣，叫到我先應酬吓落一個廣告；但你唔使叫，我都落夠八個！』」

「自發好過強迫」

連番改革中，另一最重要的是提高員工效率。「我一個月淨係開三個會，一個係管理層會議，一個係超市部，另一個係百貨部。」數完，他又搞笑地補充﹕「不過我成日都搵啲藉口唔開會，好像呢排荃灣店開張，好忙，唔開，之後屯門店開幕，多數又唔開。你諗吓自己過去一個月開嘅會，有幾多個係有用嘅？」不喜歡開會，另一原因是讓員工可全情投入工作，他收起笑容道﹕「打工仔個個都想喺工作上有得發揮，想升職，要佢哋做報告﹑做分析，都係浪費時間。最有效率嘅管理方法，就係五個人做十個人嘅嘢，出八個人嘅人工！」對於百貨營運，他自稱「門外漢」，所以給予員工很大的自主權。「佢哋只會係唔夠錢用，人事上有問題，或者聞到