📖 ZKIZ Archives

直資為收生 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130610/18290995

地產Ｌ請吃飯，到文華扒房，點解要從九龍走過嚟去文華鋸扒呢？原來金融Ｃ在此吃慣午飯，請埋佢咯喎，文華扒房就係最佳地點。我地乘機問金融Ｃ，商交所單嘢點搞，佢只話冇得搞，張震遠要問到詹培忠私人借八百萬，顯見已係好desperate（絕望），商交所可能向金融機構撲水不成先至會咁樣做嘅啫。最近報紙報導，引述接近港鐵嘅消息人士，港鐵在商交所出事之前，已接政府通知，張炳良提議，接納張震遠為非執董。好彩港鐵還未開AGM，張震遠已經成為新聞人物，否則港鐵董事會諸公咪冇晒面子，公司管治原則蕩然無存？港鐵今次一額汗避過一次風波，算主席錢果豐還有運氣，不過佢就快任滿，唔知邊位會代替佢呢？據一啲專欄報導，原來梁先生係想請張震遠做非執董，等錢果豐退休嘅，到時港鐵咪會有一位張主席囉！
講完張震遠。我地三個人點嘅主菜都係羊肉，咬落去有啲韌，唔夠爽，同是文華東方集團，置地文華嘅Amber顯然比文華扒房勝一籌，如果俾左丁山揀，幾時都係去Amber好一啲。張震遠已是歷史，不談也罷。地產Ｌ話佢與幾位老友嘅千金都係聖士提反女校畢業生，現已成為律師、醫生等等，家長對聖士提反女校相當滿意，何解要轉為直資學校呢？以左丁山接觸咁多教育界人士得到嘅消息，傳統名校受限於學校網派位制，例如聖士提反女校屬中西區校網，收生來源限於中西區，中西區係老區，學童數目幾難增長，久而久之，收生質素好難保證，變成學生質素參差不齊，一啲根本難以即時接受英語教學，唔通開中文班咩，咪失去英中金漆招牌，變成中中？改制為直資，學生可來自全港各區，選擇立即大增，唔好唔收，包保唔會變成band2學校。轉直資乃傳統名校對抗學生分區抽籤派位制度嘅最後方法，聖公會屬下名校（聖保羅男女、男女拔）皆用此策略，點解天主教會學校如華仁、喇沙、瑪利諾、瑪利曼、聖瑪利又唔轉直資？此則非吾所知也，只知道華仁成功推動小班教學，拔尖補底，教育局不予撥款就由袁天凡等著名校友籌款億幾元嚟頂住，呢點並非其他學校可以學習得到嘅！


PermaLink: https://articles.zkiz.com/?id=59499
Next Page
ZKIZ Archives @ 2019