賭債曝光冠華執董人間蒸發
2009-02-12 NextMagazine
本週日，賭王何鴻燊大放厥詞，指經營賭場好像日日印銀紙，想窮都難。
的而且確，很多富豪在賭場傾家蕩產。正被公安扣查的國美老闆黃光裕，原來也是賭船常客；曾被譽為中國首富的他，傳聞累計勁輸八十億元。最近，又有香港財經分析員齊齊力捧的上市公司冠華國際高層出事，其執行董事蘇錦華早前在澳門欠下過百萬元賭債，突然人間蒸發，被公司高調怒炒！
上月，冠華國際突然發出通告，指執行董事蘇錦華因曠工多時，宣布終止其服務合約。冠華財務總監李中成說：「蘇先生曠工超過一個月，根本履行唔到執行董事責任。」
從事紡織及漂染的冠華，一向是華資財經分析員的愛股，經常獲他們唱好。其中陸叔陳永陸更曾入股冠華，持股達半成以上，惟後來股權被攤薄才不須再申報。據悉陸叔的公關公司仍替冠華辦事，更經常帶團看廠及搞飯局；而另一股評人郭思治更自○六年起已任冠華的非執董，故此今次冠華高調炒人，在財經界也掀起小風波。曾多次參觀冠華廠房的股評人胡孟青說：「件事都幾奇，奇在咁高調，同埋個原因咁古怪，從未聽過有上市公司咁樣。」
根據冠華的資料，公司於八三年成立，蘇錦華當時已入職；九六年冠華上市，他更是執行董事，專責管理公司最大的新會廠房。有熟識蘇錦華的人說：「佢係陳天堆（行政總裁）第一批請嘅人，同陳天堆好熟，所以搵佢做執行董事。佢係工人出身，好熟漂染，但平時唔會出嚟，就算公司上市嗰日，佢都無出現。」雖然蘇錦華甚少與股評人打交道，但卻曾招呼中國紡織科學研究院院長參觀廠房。
賭輸二千萬
去年十二月底起，蘇錦華突然失蹤，新會廠房員工說：「之前已經無見佢，過年前上司仲話佢已經無做。」記者再到他的屯門住所，看更亦說：「蘇先生本來就好少返嚟，一年先得一、兩次；至於蘇太，之前都有見，但近呢一個月就未見過。」
蘇錦華人間蒸發，與他欠下賭場疊碼仔的巨債有關。現年四十九歲的他，除了在香港的妻子外，更在新會包了四川姑娘劉如萍做二奶，閒時更與她過大海賭錢。有賭場疊碼仔說：「我哋前年開始借錢俾佢哋，因為佢（蘇錦華）係上市公司董事，喺新會又管理成間廠，有頭有面，先借俾佢。」
據聞蘇錦華非常寵愛劉如萍，她較蘇年輕廿多年，二人更誕下一子一女，「二奶望落有少少氣質，蘇錦華成日黑口黑面，但二奶就成日笑笑口，賭輸錢講粗口都笑住鬧，幾好人緣。」一名賭場中人說。
疊碼仔指蘇的二奶較為爛賭，蘇經常替她還債，「二奶上年輸咗成二千萬，蘇錦華都幫佢還。有錢嘅時候，借據未到期都催我哋上新會收數。」蘇錦華看似疊水，但原來每年其董事酬金只約一百二十萬元，即使計及他在冠華的股權及持有物業，總值亦不過一千萬，能清還二千萬元賭債，實屬奇事。
由於蘇錦華一直有借有還，故一眾疊碼仔都很樂意借錢給他。去年十二月中，蘇錦華再同二奶到澳門搏殺。有疊碼仔說：「初時就喺金沙的廣東廳，佢哋問我攞八十萬泥碼，咁有生意無理由唔做，咪簽俾佢囉。跟住輸晒，佢哋又去美高梅嘅金威廳，話要借二百萬。但臨近年關，我哋啲錢無咁鬆動，只係借一百萬俾佢，佢最後賭剩六萬俾番我。」這兩張總值一百七十多萬的欠單，皆有蘇錦華影印了身份證及簽名作實，利息全免，還款期分別是五天及十五天。
生意淡薄不如賭博
事實上，不少有錢人都愛過大海搏殺，同好此道的「金牌庄家」詹培忠也聽聞不少上市公司高層愛「賭兩手」，「佢哋玩得好秘密，唔會俾人發覺。」而上落隨時數以百萬計，「尤其而家生意淡薄，好多人都會諗埋一邊，變咗不如賭博，最終搞到一身蟻。」
像蘇錦華，今次到期找數卻人間蒸發，逼得疊碼仔跑到冠華中港兩地的寫字樓找他還錢，但亦無功而還，「等咗個幾鐘，個秘書先話佢唔喺度。」接着冠華才發出炒人通告，與蘇錦華撇清關係。
但無獨有偶，冠華自去年底開始，同樣交上惡運，十二月公布的中期業績，盈利較去年同期倒退近一成三，現金不到五億元，而總借貸逾二十四億元，當中有十三億元是短債，顯然相當水緊，早前須供股集資約一億五千萬元應急。而冠華的股價，更由去年高位近二元五角，下挫至本週二收市只剩四角五仙，跌幅逾八成。
失踪接二連三
除了冠華有高層失踪外，其實金融海嘯後，亦有同類事件發生。去年底第一天然食品因炒燶利率掉期合約，五名董事先後請辭，其主席楊宗龍亦「失去聯絡」，公司最終在一月自行申請清盤。
此外，去年十一月港交所發出公告，找尋中國水業及中油燃氣合共四名前董事，但至今仍下落不明。
Next Page