ZKIZ Archives


張震遠的中間人 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130530/18276364

C君與你在社交場合見過兩三次面,叫做彼此認識,你知佢係邊個,佢知你係金主。突然之間,你位老友B君同你講:「喂,救吓急,借八百萬俾C君,一個月期,有期票抵押」,你借唔借呀,普通人怕且連八萬元都嗤之以鼻,但C君係張震遠,B君不知是誰(只有你知),你突然就立即轉賬過戶(入支票都嫌遲)八百萬元交俾張震遠係大股東嘅公司(商交所),而且講明不收利息。
你咁好人,係唔係施恩勿望報呢?還是埋下一條伏綫,學習姜太公釣魚呀?是但一個答案,都會產生不同詮釋,令人疑惑。而且主要關鍵在乎邊個係B君,B君做中間人,有何得益,有何目的?有冇得到任何好處,物質上的或非物質上的?講代價如涉及銀紙,有數得計,不算高昂,但最怕如中文所講:「欠我一個人情」,或英文所講:You owe me one,咁就可大可小,借人情債,借金錢債,始終有日要還,故此商交所事件最令人疑惑之處,就係呢點。詹培忠咁大方闊佬借八百萬元俾商交所,係透個一位朋友吖嘛,詹培忠點解要咁俾面呢位朋友?還人情債還是甚麼,記者每次見到詹大哥呢位lender of last resort(對張震遠及商交所而言),不妨問一問。
之不過,事情發展得太快,左丁山想話打聽吓啫,已見到五月二十六日星期日《蘋果》頭版報道賴焯群(Arthur Lai)與其兄長賴焯藩(Raymond Lai)就係上述舉例嘅B君。哦,假設這是真的,即賴氏兄弟代張震遠向詹培忠求助八百萬元,對張先生嚟講,對政府嚟講:That's bad news!
張震遠之商交所事件,愈揭愈怪誕,三位內地人膽敢持虛假渣打、滙豐銀行文件來港,銀碼高達幾億美元,想話騙邊個?張自稱自己亦是受害人,當然係笑話,一位受過高等教育、位高權重嘅人物會受呢啲幼稚園級數騙術蒙蔽?左丁山初入銀行做見習生之時,師傅已經教路啦!


PermaLink: https://articles.zkiz.com/?id=56325

Next Page

ZKIZ Archives @ 2019