政府大力壓抑買樓需求，推出SSD、BSD、DSD之後，卒之打殘咗樓宇成交額，所有地產代理要食穀種，行內人士傳聞，今個月中原地產代理之本港業務，入不敷支，嘗試吓好多年來未見過之虧本滋味。至於中原會唔會執埋若干地舖，好難講，以施老闆性格，佢會叫屬下頂住頂住，等啲對手執咗先，再圖後策。
本港樓宇成交額衰過沙士嗰陣，樓價（根據中原城市領先指數）連跌四個星期，但跌幅不大，睇落係買家賣家僵持不下之局，炒家既已絕跡，自用買家好想壓價，賣家就不甘心割價求售，於是做成經紀代理，兩邊來回奔走，講到口水乾，仍難以說服買家賣家達成交易嘅僵局。
啲測量師行、地產代理不想坐以待斃，近月索性走向海外，推銷海外地產，以東南星馬及倫敦樓盤較多，睇吓免費「英文虎報」嘅海外樓盤廣告就知道。呢日遇到一間英國測量師行嘅諮詢部董事，佢話既然本地生意幾乎冇得做，唯有推吓英國盤。據講，英國樓盤絕大部份限於倫敦樓盤，因為亞洲買家絕少買入其他城市（如曼徹斯特市）嘅住宅，測量師講：「到香港開展銷會嘅英國盤，集中喺倫敦市中心，買家有五成係亞洲人，亞洲人之中，又以香港及星加坡人最多，另外三成左右買家係俄羅斯及東歐人，餘下嘅先至係英國人。香港星加坡居民對倫敦特別熟悉，買倫敦樓唔算隔山買牛，如果唔想蝕底，包冇買錯地區嘅，我建議大家專喺倫敦市Zone1（第一區）買新樓，如果去到倫敦東南部，最好飛過去睇一睇環境先，所謂Zone1，籠統啲講具體啲講，就係倫敦大學、車路士、富咸、文華東方酒店一帶，靚區也。」何止去倫敦買樓，獅子王前星期到北海道旅行，仲以為佢去睇櫻花㖭，點知佢返嚟之後對左丁山講：「冇睇櫻花，北海道仍然有雪落，我去睇樓嘅時間仲多，札幌啲住宅單位便宜過香港，三房單位月租七千港紙，平到我唔信，邊個想到日本退休，依家可以諗諗！」 