Banker與我 人在中環
http://manincentral.blogspot.hk/2013/04/banker.html早陣子因為《
主場新聞》既關係，讓我跟蔡東豪先生有一次坐低食飯既機會。席間唔記得講緊乜嘢topic，提到有關ibanker既東西。我衝口而出地爆咗一句：「其實我好鬼討厭啲banker…」食完飯回到offiice，忽然諗起，
蔡先生以前都好似係ibanker嚟㗎喎。oops，係咪口快快得罪咗人？
*****
酸葡萄我對banker這一行有點不合理既偏見，這個我以前都有寫過了。當中最大既原因，可能係因為我冇能力做到。入ibank，either你老豆超級有錢，or你係精英中既精英。前者故然冇我份，但我更介意既應該係後者。我對呢一行其實從未試過提起興趣，但剛畢業既時候，膚淺既我卻對自己「冇資格」入行非常介意。一個年輕人要接受自己平庸，欣然接受自己唔係精英，其實難度是幾高的。所以今時今日每當我心裡面覺得好唔妥班banker既時候，我都懷疑，其實可能係自己心裡面既酸葡萄作祟。
Banker與我我做卑微既小本生意，一班身光頸靚既banker跟我本來係距離十萬八千里。縱使大家同樣身處中環，但實際上係生存於兩個互不相干既世界之中。直至有一日，我那盤小本生意，引入了一個外來既投資者，banker們又忽然再出現響我既世界裡面。
當然，呢班banker服務既對象並唔係我，而係我果位新來既股東。對新股東黎講，我呢盤小本生意，係一次「有潛力」既投資。而佢身邊既呢班banker，則負責「確保」呢個投資，至低限度「有機會」合乎新股東所要求既回報。
問題嚟嘞。banker服務既對象係我果位新股東，原則上同我並冇直接既關係。但係由我負責管理既呢盤生意，卻又影響住佢地果位客人既投資回報。於是乎，banker跟我既關係就變得有點尷尬了。banker響工作上，係新股東既董事局代表。新股東同我既關係，「理論上」係生意夥伴。呢位股東營商經驗比我豐富百倍，自然明白跟「夥伴」關係不能搞得太差。股東跟我見面時總係嘻嘻哈哈，但講到利益既時候，總係需要有醜人的。那位banker，就正正成為最好既人選。
觀點與角度也許係職責所在吧。banker對我生意上既指指點點，我其實理解的。然而一個創業既人，跟一個金融界既人，對一盤生意既分歧可以有幾大？
例如，成本控制。
對我黎講，我所投入既每一分每一毫，我認為都有其意義響度。當中既效益，並唔係單單用一個計算機能夠計算出黎。生意總有起落，有cycle。環境唔好既時候，我認為公司需要「捱」。捱得過，就能海闊天空。所以遇到逆境既時候，我認為重點係想辦法「捱過去」。banker跟我既分歧係，佢地唔認為應該捱過去，而係要「保持利潤」。假如無法開源，那就節流吧…你可以選擇減同事人工，又或者簡單啲，減同事既人數。我話咁樣會影響公司底子，長遠會好大鑊，佢地既回應係搬出一大堆數據同甚麼甚麼ratio，同我講我點樣唔夠人地efficient。好幾次，我幾乎想響meeting room裡面同佢地開拖。
又例如，所謂價值。
對一個經營者黎講，那盤生意既價值，就係佢本身所能帶俾股東既利潤。我靠呢盤生意養妻活兒，生意對我黎講，係bread and butter。banker時不時就向我要求，應該多做些甚麼甚麼業務，多跟甚麼甚麼建立甚麼甚麼聯盟諸如此類。我話：呢啲嘢，冇錢賺又唔會有咩前途㗎喎，仲要影響到同事們既日常工作…佢地話：係吖，呢個我理解。但係咁咁咁做，又可以增加盤生意既value。
「value？乜野value呀大佬？」我問。
「響下一個potential買家眼中既value。」
banker俾我既答案，我覺得係匪夷所思。一些我同佢都明白，實際上係冇value既嘢，卻又能增加公司響下一個買家眼中既value。咁即係想點？
*****
由引入新投資者那一天開始，我就明白，遊戲規則從此就會不一樣。我冇要求，投資者會有跟我對公司同一樣既感情。然而終有一日，投資者會將佢手上既股份，賣俾下一任既買家（如果檔生意仲未瓜柴既話…）。
然而呢個過程當中，banker既責任，係幫投資者「湊大」我呢盤生意。假如呢盤生意係一個小孩子，banker同我就好似一對有完全不同理念既家長一樣。當然呢對家長，對呢個小朋友既成長同期望，有住截然不同既要求。
我明白這是偏頗，但我對banker既偏見，怕且還是會不受控地延續落去。