📖 ZKIZ Archives

港美機票貴 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130425/18238992

美國接二連三發生傷亡案，先是波士頓馬拉松，繼而德州肥料廠大爆炸，跟住名校MIT（麻省理工）有槍擊殺人（與波士頓兇案有關連），奧巴馬總統本已在預算案與共和黨談判陷入僵局，一籌莫展，跟住一個星期內遇上三宗慘案加上佢大力推動嘅槍械管製法案在參議院死火，不能通過，在辦公室內唔大發脾氣先至奇。唔好以為呢啲係美國內政，與我地無關，實際上如果奧巴馬因此而民望受損，變成美國版曾蔭權、梁振英嘅話，美國經濟無人掌舵，復甦似有若無，我地香港點會唔受拖連？
911至今已有十二年，加上拉登死咗，美國反恐力度，本可逐漸放鬆，減少國土安全局支出，配合削減公共開支政策，點知發生一單415，美國之內部反恐，必然再度加強，無法子削減此方面開支，難以解決財赤問題，對香港人最貼身嘅問題，就係去美國旅行搭美國飛機，會更加麻煩！
公子L不時為公為私往來紐約、波士頓，對乘搭美國嘅航空公司客機，已到憎厭地步，認為搭美國飛機，上機前不時被搜身，受不禮貌對待及歧視性問題，故此非國泰航空不搭，無可奈何就搵其他亞洲航空公司（要轉機）。佢位二公子在紐約讀大學，已計劃暑假回港，碰上機票最昂貴季節，國泰客機來回紐約，經濟艙要二萬元，特選經濟艙要三萬，商務艙要九萬，公子L大呼吃不消，國泰機票咁貴，皆因香港人絕不喜歡美國航機，爭搭國泰之故。左丁山聽到就皺眉頭：「咁鬼貴，點搭呀？」公子L話：「乖仔有辦法，用積分換機票。」何來這麼多里程（mileage）積分？公子L話：「大學學費貴，用信用卡交學費可以吖嗎？」一言驚醒夢中人，我地每年交稅牙痛咁聲，應該用信用卡交稅，換番張長途機票都好吖，自己過往用支票交稅，實在太笨！不過咁，如非有必需，去美國做乜噃，每次入境例牌俾移民局人員窒一兩句，上機前要搜身，除鞋除皮帶，諗嚇都冇癮。賓加W一次去紐約，沉不住氣，過關時對關員講What is the problem（有何問題），即刻被送入一間房呆等一小時！關員官階本來甚低，但人在佢手，千祈唔好得罪佢呀！

PermaLink: https://articles.zkiz.com/?id=54959
Next Page
ZKIZ Archives @ 2019