| ||||||
中五畢業，做過掃街和跟車工人的駱錦輝（Mike），是個沉迷日本動漫文化的典型宅男。二十五歲第一次離開香港，到日本「朝聖」，對當地的女僕咖啡店一試難忘，迷上了女僕文化。回港後，Mike膽粗粗向銀行借下十五萬，在旺角開設樓上女僕咖啡店，取名Cafe Dreamin' Akiba，意指夢想中的秋葉原。初試啼聲即嘗甜頭，因鋪細成本低，Mike每月淨袋三萬元盈利，漸漸心雄起來。去年初，他分別向三間財務公司及一間銀行借來四十萬，租下旺角登打士廣場全層，咖啡店面積急增三倍，租金由每月八千元跳至五萬元。新鋪開業不久，Mike已「吃不消」，咖啡店更由賺變蝕。因一時衝動，原本一個搵錢的美夢頓時變成夢魘。 上週五下午，Dreamin' Akiba只有兩枱客，包括熟客阿漢。三點開業，他兩點九已來到。「我個個禮拜出糧就上嚟，每次都叫二百零八蚊嘅套餐，有飯食仲有女僕上台跳舞。」在IVE讀電腦並兼職送外賣的阿漢邊吃邊說，眼睛卻一直盯着衣著性感的女僕雪雪。店內女僕全是兼職，時薪三十至三十六元，全都是日本動漫迷，有的仍是學生。「平日有四個左右，週末就有五到六個。」Mike說。 Dreamin' Akiba跟足典型女僕咖啡店的模式，客人踏進門口，女僕便熱情的一擁而上問：「歡迎主人返屋企，請問幾位呢？」侍候入座後，女僕更會跪下落餐。不過，環顧四周，就會發現店內不但椅子款式不一，裝修亦十分粗糙，天花喉管外露。「開咁大間餐廳，起碼要八十萬，我借到盡都係得四十萬，唯有頂硬上。」明知不夠錢仍「去馬」？Mike解釋：「以前間鋪太細，客人上到嚟都無位，成日都係咁，就唔會返轉頭。為咗箍住啲客，決定搬咗先算。」一句「搬咗先算」，令他陷入今天的困局。 衰衝動 三年前，Mike在旺角豉油街福泰大廈開設咖啡店時，亦是從日本回港後的一時衝動。從未做過飲食的他，身兼大廚及入貨，他笑指﹕「主要係買啲現成嘅嘢返來整，包括拉麵湯底，都係買醬料磚返來開嘅，最難係蛋包飯，練咗好耐，用爛咗十幾隻唔同款式嘅平底鑊。」Dreamin' Akiba當時是香港第四間女僕咖啡店，熱潮未退，吸引到一眾動漫迷捧場，經常爆滿。 第一次衝動為Mike開闢了一片新天地，自信大增的他，不惜借錢擴張。這次，幸運之神沒有再眷顧他。「梗係唔支持佢同財務公司借錢搬大鋪啦，俾佢嚇死！一個月五萬蚊租，點做啊？」在店內幫忙洗碗的Mike父親嘆道，但Mike仍執迷不悟﹕「既然知道女僕咖啡店有得做，時間就係金錢，等到我儲夠錢，個熱潮都過咗啦。做生意梗係要不停變，唔變就係退步。」不過，他亦認同「搬得太大」，「當時諗得太長遠，覺得既然要搬就搬大啲，因為搬運費裝修都係錢，依家諗番都覺得太冒險，有啲頂唔住。」除了租金，Mike每月合共要還一萬三千元的貸款。上月有復活節假期，扣除還款後，尚有數千元盈利，但沒有節日的淡季，卻要倒蝕數千元。如今正值考試月份，生意更淡靜。 衰裝修 資金不夠，收銀處櫃台的圍欄﹑天花的燈飾及舞台的圍欄，都是Mike參照日本女僕咖啡店的糖果屋主題而自製的，但手工粗糙，看上去「岩岩巉巉」，開業僅一年，已予人破舊的感覺。這並不是Mike夢想中的咖啡店﹕「如果有錢，我會裝過晒啲冷氣同防火花灑，整假天花同燈槽，在牆身加裝飾。」不過，他仍感自豪：「我咩都識啲，咩都自己做，慳番好多錢。」店內大部分餐桌及椅子都是逐批由夜冷店買來的二手貨，一眼望去，餐桌一高一低，椅子款式不一，Mike苦笑﹕「最初全部都係膠櫈，啲客嘈得仲厲害，我夾硬話係特色嚟。」因此，旺季的數千元盈利，他都用來添置不同的基本設備﹕「二月買咗套入單系統，上個月有七千蚊盈利，用咗六千來買洗碗機。」在購置洗碗機之前，為節省開支，一切清潔工作都是由Mike已退休的父親負責。 衰浪費 Mike在店中間了一個約四百呎的特別室，以課室做主題，原是方便客人包場。但除了聖誕假期外，一直無人問津。後來，曾有攝影愛好者在課室內搞私影會，但卻「無肉食」，「之前淨係收飲食費用，做一單最多得二百幾蚊收入，後來定咗包場價千五蚊，又無人來。一般客人都唔會主動要求坐課室，因為坐得無咁舒服。」Mike指，現在課室主要供員工休息及擺放雜物，他後悔道﹕「單係課室，計番租都已要一萬蚊，如果轉做普通座位，又無咁多客填滿個場。咁大地方，雜費都多咗好多。」現在，香港有四間女僕咖啡店，有的生意亦僅打和，熱潮已大不如前。上週六晚，咖啡店只有約八成滿座，Mike嘴扁扁道：「星期六晚應該係最多人，都唔知點追番啲數好。」對於前景，他亦並不樂觀﹕「明年三月租約到期，樓上樓下嘅租金都加到六萬五蚊。我依家已經頂得咁辛苦，如果加租就好大機會唔做。」前路茫茫，對二十八歲的Mike來說，只能見步行步。 開業資訊 （03/12）裝修$300,000按金*$180,000雜費$100,000入貨$20,000總開支$600,000*按金，上期及佣金 營業資料 （03/13）營業額$160,000人工^$40,000設備$6,000雜費#$23,000入貨$40,000租金$50,000盈利$1,000^包括兩個兼職廚師及十個兼職女僕#連償還貸款款項 一點意見 咖啡店Holly Brown創辦人，旗下擁有五間分店。看過Dreamin' Akiba的裝修及食物照片後，他並不看好咖啡店：1. 咖啡店以女僕綽頭吸引客人，難以吸引回頭客，一定要靠提升食物及飲品質素，以及定時推出新產品，才可累積熟客。2. 這類賣綽頭的咖啡店，顧客群窄，較適合小本經營，Mike未看清店鋪的定位及市場的需求，就貿貿然搬大鋪，並不理智。3. 創業不會一開即賺，不應該借錢創業，因為一旦周轉不來，就會很麻煩。加上女僕咖啡店仍屬潮流，市場未成熟，借錢擴充的風險更大。 | ||||||