工作壓力太大，希望早點能達到財務自由(答) Home Blogger
http://www.homebloggerhk.com/?p=7452恭喜讀者! 相信如有機會和你面談大家更會有進益。人生四十經歷起起跌跌，當然曾經歷負資產、失業，自己生意亦不會一帆風順，能克服起跌，於四十歲累積到筆算可觀的資產，確是可喜可賀。
讀者成功之道在於自己爭氣，於失業時沒有氣餒，懂得打逆境波外，太太支持尤其重要。以太太每年1.15mil之收入，有條件為家庭快手累積現金，實現筆者在早前提及，讀者亦在來文有所引用的平均投資法。前文可見本BLOG「樓市下平均投資法」。樓原本是很難「平均買入」的，你無可能買個廚房就唔買廁所，權宜方法係反細些少SIZE既單位埋手，最好自己資金夠，比50%首期報明是投資用途，該單位租約即可用於下次借錢時作收入証明，於多間物業投資者很有幫助。
另外開立有限公司戶口作樓宇買賣絕對有好處，首先是稅項問題，如遇有心買家可將現有物業放入「另一個殼」，即另開公司及注入物業，將樓宇買賣轉作公司股份交易，省回不少印花稅。另外讀者持有幾間劏房，唔好彩招惹麻煩事上身不為奇，劏房內的租客，不是「唔該」兩句便交租的! 更有人提取政府房屋資助，好心就比當中一半你交租，但係租單就要你寫到足去CLAIM錢。再唔係，個租客去坐監走佬，你都唔知清唔清佢房入面D野好。油尖旺當地有不少地產公司，係專幫你解決呢種「租務糾紛」，亦可以幫你收埋租。總之攪劏房，都係由買間屋苑樓學收租開始，一步步步學起。
但亦不全全部租客是咁可怕，現時不少單身女子要求獨住單位，對自住房要求亦頗高。所以你出本錢去收間屋劏得靚D，租客質素自然好些。講返MJ，7間樓加埋總值一千八百六十萬，距離第一個上岸價二千萬仲有些少距離。點解二千萬可上岸? 其實點先可享受無憂生活，每人也有不同定義，惟二千萬勉強夠你成立一個家庭信託，每年為你製造八十萬收入，食息唔食本了。當然信託會收管理費，亦會幫你將收入與通賬掛勾每年提升。讀者現在先四十才，還有機會為自己資本增值，不過諗起佢仲有些少就先達二千萬第一保險線，不禁想起將劏房分拆之法。大家有冇留意近日不少鋪王、資深炒家均將自己物業分拆出售? 將大鋪拆細再分開賣係一個快速令物業「再增值」之法，只宜旺市適用。翻查記錄在樓市上一高潮，不少業主將彌敦道原本是酒樓的鋪位改裝成商場出售，求在旺市搵多一桶金。可以選擇其中物業去附近地產問下價，再叫律師睇下能否分契，拆裝成每百萬一個套房，肯定有價有市。鴨寮街一個分契單位可以叫到五千幾蚊呎，仲有大把人追價。
劏房及分契樓都有法理依據，請大家不要誤會本文談及是違法之事。傳媒不斷報導局長議員經營劏房，只是其劏房劏得不及格，或道德上之指控而矣。供甩按揭的樓房可先查下能否分契，當然要單位門窗位置充足才可完成間房之事。由於食盡細價樓升浪，五年來樓房投資總回報已達一倍(100%)，如單計用作按揭上會的首期作投資本金，回報可達數倍，租金回報過10%，未來還有上升空間。未來幾年物業市場始終要靜，建議花些少時間在股票債券投資學問，讀者亦會同意，只靠買香港樓「單腳」，未能使自己投資組合長勝吧!