灣仔北有一座灣景大廈，係小型住宅單位，可能係當初規劃署規劃錯誤，在周圍甲級商廈之中，竟然撥一幅地作住宅用途，而且係細住宅㖭，簡直係嚴重錯配，呢啲蝦碌嘢唔好講嘞。灣景大廈之平台有天橋與華潤大廈、新鴻基大廈、海港中心及鷹君大廈連接，每日人流不少，華潤大廈披上新裝之前，將海景平台（前稱三里屯）亦重新策劃，將之變身為新型食肆集中地，好有生意眼，點知最近收到食環署通知，平台唔可以有食肆座位，呢個平台收檔都得嘞。
華潤兼營華潤創業（291）上星期宣佈2012年業績，全年租售額高達1262.36億元，扣除資產重估及出售業務收益後，核心純利只有15.27億元，純利率只係1.2%，即係做一百蚊生意，賺到一元二角，利錢好低啫。華創四大業務，即係零售、啤酒、食品（五豐行還併在內）、飲品，全與一般消費者有關，獲利能力低，只靠生意額夠大，唔怪得華創話五豐行供應活牛冇錢賺，要再次加價。
全世界嘅零售店業務都係薄利多銷嘅，超級市場拉上補下，更難賺取大錢，依家利率超低，連玩財技（售貨收現金，付貨錢在數十日後）賺利息都無大幫助。睇吓貿易帝國利豐（494），去年全年營業額高達202.22億美元，核心純利只得5.11億美元，比率係2.52%，好過華創一倍，不過都係低得緊要。有一隻新股票叫做靄華押業信貸（1319），招股書披露截至2012年2月29日止財政年度嘅營業額有六千六百三十六萬元，稅後純利高達三千三百三十七萬元，獲利率係50%；截至2012年11月30日之九個月，營業額有五千二百三十萬，純利一千九百二十六萬，獲利率係36.6%，仍然高出華創，利豐甚多。做當舖及貸款，真係好好賺噃。小時候聽見當舖生意係九出十三歸，曾不明其意，後來入咗銀行做事，先知道係借十元，扣一元，實得九元，還款十三元，實質利率就係44%，現在有當舖上市，果然證實此說。上市公司有高達50%之超高獲利率，記憶之中，全盛時期之南華早報（1993至1995年間）就有，當時印刷職業搵工廣告好似印銀紙，南早員工嘅福利好到令人羨慕，現在往事只能回味矣。 