美國聯邦儲備局大力推行量化寬鬆政策，實施零利率，將三十年國庫債券孳息率（Yield）推低到2%左右，目的係刺激商業投資，振興經濟，增加就業，降低失業率。但事實係，自2008金融海嘯至今，除咗標普五百指數升咗兩倍以上，股市投資者（如果有持久力及耐性嘅話）大喜過望之外，整體經濟復甦緩慢，失業率下降速度如蝸牛爬行，商業投資唔見得有大起色，充份證明咗伯南克嘅政策只係益咗炒家及基金，大部份美國人毫無得益，奧巴馬總統咬牙切齒咁話要向富人加稅，提高最低工資，實質上佢就任由聯儲局明益有錢人，打擊中產退休人士，窮人搵唔到工，奧巴馬係最大偽君子！
最近紐約時報報導，因美國利率超低已有幾年，股市不時震盪，中產投資者俾股市波幅嚇親，早已退出股市，故此標普指數大升都益唔到美國普羅大眾，相反地，大量中產退休人士因退休金苦無出路，擺在銀行無息收，於是心思思追求六至八厘回報率嘅投資工具（嗱，香港買雷曼迷債之人，有同樣心理），市場上不少財務策劃師與經紀合作，迎合退休人士所好，推出複雜結構性產品。非上市Reit（地產信託投資基金）、私人募集之另類投資基金（例如買入汽車投資組合），以7%、8%回報率吸引散戶，過去幾年，美國不少呢種另類投資爆煲，由加州至阿肯薩斯州都有，中產人士嘅退休儲蓄損失不菲，由幾萬至幾十萬美元都有，各州政府嘅證券投資監管機構紛紛立案調查。
追源禍始，就係伯南克嘅超低利率令退休人士吃盡苦頭，「鋌而走險」之故。超低利率製造貧富懸殊，有錢人（凡有餘錢買股票者皆屬有錢人，每月靠糧單僅足以糊口者邊度有錢買股票吖）明知股市若然大跌，聯儲局一定救市，變咗穩賺不賠，每次美國宣佈失業率上升（即窮人痛苦），股市就會上揚（即有錢人開心），皆因大家估得到，失業率高企嘅話，聯儲局就會保持超低利率，股市投資者的快樂建築在工人白領失業痛苦之上。美國愈多人失業，大富豪畢菲特就愈賺得錢多，香港買樓人士就愈高興。 