中環在線：電盈用西裝友維持秩序
|
|
噚 日朝早8號仔電盈召開股東會，原訂通過私有化議案。一如以往，公司主席李澤楷再次施展佢至強嘅「估我唔到」神功，喺吹晒雞企硬話唔加價之後，失驚無神揼多 3毫子畀班小股東。不過現場所見，好似得一位何先生因為「唔想同佢（李澤楷）鬥氣」，而投下贊成一票，其他人擺明反對。可能為免出事，主辦單位噚日加多咗 一班西裝友「維持秩序」，好彩最後除咗李生係咁俾小股東「數」之外，都冇乜唔愉快事件發生。
中場休息時，有部份小股東對住記者高呼「呃人o架」、「係賊嚟 o架」，言論鬼咁激。咁呢班「躁底」中年男子係乜來頭呢？「路邊社」消息話，噚日出席嘅小股東夾埋揸唔夠300萬股，當中有幾十人都係只揸住一手8號仔。 佢哋言論未必代表全部股東，但俾人唱就唔多好啦！
|