Victor 張錦成上個月回歸美聯（1200）做顧問後，隨即高調宣佈同佢一手創立嘅盈富物業斷絕關係，仲將間公司賣咗畀人。盈富冇咗Victor呢位元帥坐鎮，即時 變成孤兒仔，最近樓市二手成交又少，據聞生意唔多好，分行執吓一間又一間，難怪近日不斷傳出盈富執笠消息。繼尖沙嘴分行後，傳聞盈富西貢分行啱啱關門大 吉，解散咗幾個伙記。有前盈富經紀話，以為可以捱過呢場海嘯，點知上個禮拜六突然收到大信封。盈富高峯期有成10間分行，執埋西貢嗰間，家陣得番生意較好 嘅美孚新邨一間分行，加埋總部員工，成間公司好似得番唔夠廿人。有業內人士話，由於盈富仲有好多佣金未收，所以應該唔會摺住。