ZKIZ Archives


仍未開工要讀書 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130213/18161568

今日係年初四,通勝講係成日宜開市入學,不同嘅運程書專家都指今日係開市開工好日,最佳開工時辰係下午一時半至五時,但龍人就不宜。碰啱今日仍然係假期,如欲開工,不妨吃過午飯後先至出動,或者話公司放假噃,開工做乜呀?有高人以前講過一個方法,就係趁好日好時辰走返公司,坐在自己寫字枱,抹吓枱,開着電腦,睇吓過年前放下嘅文件,當作已經開咗工──逗留半小時或以上咪去行街返屋企囉。
左丁山就仍然在屋企休息至下星期一年初九先至恢復正常工作,一於唞多五日先。在家而不去旅行,有乜好做?大把啦!昔年大學中文老師葉龍博士送我一本新書,就係佢編錄嘅「錢穆講中國經濟史」,葉師於新亞書院哲教系畢業,時維一九五七年,佢在一九五三年入學,適值錢穆先生精神旺盛,教書演講有心有力之時,葉師係浙江人,聽錢先生嘅無錫話,毫無困難,抄寫筆記易如反掌,但最難得嘅就係,佢將錢先生啲講課筆記收藏得宜,有啲仲曾經俾錢先生睇過、修訂,啲講義大部份曾在報章連載,左丁山錯過咗,今葉師與商務印書館合作,將啲講義重新整理編排,出版一部書就叫做「錢穆講中國經濟史」,梗係啱晒左丁山讀啦。
左丁山學識淺薄,以前只識讀錢穆「中國歷代政治得失」、「中國歷史精神」、「國史大綱」等書,不知錢先生連經濟史都識,大概錢先生對中國歷史、文化、儒學皆精通,在新亞草創時期,一人教書瞻前顧後,連經濟史都教埋,到咗六十年代中期,新亞歷史系有交通史專家嚴耕望,經濟史專家全漢昇,國史專家牟潤孫等等,人才鼎盛,人們就淡忘了錢穆先生曾經教過中國經濟史。另一位桂林街時代新亞學生宋敘五對錢先生非常熟悉,曾出版過一本專書講近代中國經濟衰落之因由,由清代康乾黃金時代講起至雍正敗家,埋下伏筆,宋先生近在《新亞生活》月刊為文,力指錢先生不應被歸類為新儒家,值得各方參考。

PermaLink: https://articles.zkiz.com/?id=44100

Next Page

ZKIZ Archives @ 2019