📖 ZKIZ Archives

富豪拉頭馬 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130207/18158477

上星期六沙田賽馬，眼見現場人數好似比平時星期日賽事少啲，但投注額就一啲都冇少到，全日投注額有十二億二千三百八十萬元以上，平均每場過億元，係星期六賽事一個罕見數字。近來投注額顯著上升，幾乎場場過億，與着紅燈後不少大注大注落飛有關，至於呢啲「聰明錢」（如果落飛得手）或者「填海錢」（失手之時）來自何方，我地無從稽考，總之港澳珠三角地區以至澳紐海外都有大把人睇住香港馬搵食。
呢日有一隻馬就受「聰明錢」威力，就係印度裔馬主嘅「綠色寶」贏咗「鄉議局盃」，由鄉議局主席劉皇發頒獎，只見劉主席冇乜表情，強展微笑，好似有苦自己知咁款，皆因佢自己嘅愛駒「驪龍」係隔夜賠率大熱門，諗住有機會贏到「鄉議局盃」，頒獎時咪左手交右手囉，誰知事與願違，難免冇癮之至。
相反地，感到非常有癮嘅就係信和集團主席，大富豪黃志祥，佢位公子黃啟華名下有隻馬「連利多」一出即勝，上星期六又贏，大有希望爭到打吡入場券。其他馬若以大熱姿態贏出，馬主必定與成村人（親朋戚友）拉頭馬影相，黃家贏馬就特別啲，只有馬主黃志祥一人，黃生似乎好興奮噃，影完相突然與騎師杜利萊一路行一路傾，幾乎行埋入去秤磅室。黃家在新加坡發跡，以遠東集團名義，在新加坡養好多馬，但新加坡商人從來唔敢在新加坡馬圈高調示眾，贏咗頭馬都極少露面，點解如此，因港新文化不同，香港冇大阿哥（或者將來有）睇到實晒，做闊佬馬主係輕鬆自在好多嘅。不少思想簡單年青人猛話新加坡好，佢地唔知其中深層次社會代價啫。
跑完馬，見到藥房W，原來失覺晒，唔知佢已經退休幾年，於是笑佢：「咁係咪錯過咗奶粉黃金時代？」藥房W長嘆一聲：「我做藥房零售，賣奶粉幾十年，從來蝕本，未賺過錢，點知啲行家在2012年賺番晒幾十年來所蝕嘅，不過咁，如果藥房得唔到美贊臣、美素佳兒嘅充足貨源，只係得個恨字啫，唔知點解，人人都搶呢兩隻牌子，藥房有大把其他奶粉就冇人吼，邊鬼處有奶粉荒呀，有牌子荒就真！」

PermaLink: https://articles.zkiz.com/?id=43801
Next Page
ZKIZ Archives @ 2019