📖 ZKIZ Archives

記者訪問 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130127/18147426
在81/2吃過午飯，搵路行返寫字樓，特登走過去IFC兜大圈，在交易廣場外天橋就碰到醫生K，原來佢又係搵路行，遊完IFC先至返皇后大道中醫務所，總之吃飯後行二十幾分鐘，有助消化，城市人如唔駛趕住返工，可以一試。
醫生K一開口就問施政報告點睇，佢係有心人，好為香港前途擔心，大家唔知有乜好講，幾乎相對無言。CY上台後，好多人唔忍心批評太多，總希望俾佢多啲時間空間，等佢證明自己有料到，但見佢推出之房屋土地政策，似乎係頭腦發熱之人諗出嚟嘅，CY自己又係房地產專業專家，又確實令人擔心嘅。
中午同醫生K傾偈，最好唔傾咁耐，否則累咗佢嘅病人在醫務所等多半個鐘頭，背後大駡都似。拜拜之後急急腳行，到咗恆生銀行通往國金一期天橋，又碰到研究L，另外一位搵路行之人，迂迴曲轉咁行番置地廣場。佢對樓市素來有研究，果然一開口就批評左丁山：「喂，你在專欄講2018樓市陷阱，遲啲噃，你應該知道市場有預期派，相信到咗2016年，美國經濟一如所料復甦嘅話，利率循環已經轉向，利息調頭向上，碰啱CY啲樓盤大計進行得如火如荼，你話樓市會點？重演香港1998-2003年歷史都似。」譁，聽到都驚，人嚇人冇藥醫，千祈唔好講1998-2003嘅地產市道，大家都不敢回憶，不能忘記，不知歷史嘅新人物除外。
研究L又講：「除咗睇數據之外，我都留意到一啲不良氣氛（sentiment），一位仁兄一聽就知道記者有預設立場，只係想搵佢攞一句sound bite去砌人啫，於是故意被要求接受訪問講土地供應，開發新界東北、西北等等，記者堅持要求佢舉出例子，證明地產商買入農地，補地價，起樓賺大錢，仁兄特登舉出一啲地產商蝕到補完地價眼光光嘅例子，記者好似聽唔入耳，係要聽一啲賺大錢實例。仁兄挑通眼眉，於是笑笑口咁問：你地係唔係要搵新聞，製造鬥地主嘅sentiment呀？」呢樣嘢好難講，香港滿是憎人富貴厭人貧嘅言論，報章新聞充滿排斥歧視外來人嘅文字，整體氣氛確是不利發展。
PermaLink: https://articles.zkiz.com/?id=43362
Next Page
ZKIZ Archives @ 2019