其實諗樣係懶導師就真，不算得上好導師。希望往後有更多資源放係網站令我可集中回信。睇完你來信，心中覺得平淡便是福，人既煩惱好多時由自己貪念而起。當然為自己儲錢買樓談不上係貪念，為自己累積足夠財富供老來使用是對自己對身邊既人負責任既做法。真係既貪念很多時是得一想二，對自己能力有過大想象而做出損己又不利人之事。好啦，答你問題如下:
Q:我不太明白放租要5成按揭,
A:其實你只要擁有一間樓，你要租比人定係做義莊冇人過問。衰在自己唔夠錢，要問銀行借所以押左張屋契係銀行度，咁你租出去就要攞銀行approval。銀行受金管局監督，批按揭比你要聽金管局支笛，間中一兩單唔跟足都係留比大客先肯博，仲要係輕輕過界，唔敢超越。因應要求，銀行對報稱出租既物業唔可以借市值/買入價既五成比佢(以較低者為準)。就咁所以如果你想名正言順出租，最好轉按去另一銀行講明物業係放租，咁就冇問題啦! 當然你可以同現有銀行申請，睇下人地批唔批。
早年呢個要求係七成。如有心買樓收租者可等金管放鬆對銀行按揭業務之借出成數才考慮入市，但諗樣真係唔知你要等幾耐。
Q: 放租要打厘印費受法律保障?
A: 其實放租打左厘印唔代表你受法律保障，唔打亦唔代表唔可以搵警察律師幫手。仲有千祈唔好以為打左厘印等於租約上面既條文成為金科玉律，政府亦唔會承認條約上條文既任何合法性。打厘印係等同你交稅既責任，當然你唔打厘印又唔交物業稅，放到法庭上面，梗係冇咁理直氣壯啦。另外，放租厘印係可以補打既。
Q:你說現時居所還到欠款只剩市價一半更可將佢名正言順租出，我是否已經可以合法地放租現在住的樓呢?
A:引述問題一，你要名正言順先要去銀行搞掂佢，如果估價差唔遠你係可以的。
Q:假設我可以租出物業, 租金7成甚至全部可作收入, 咁做第二層樓自住既按揭有冇問題?
A:你如轉按現居所，應要每月還約六千。而家庭總收入會因租金收入已可計算在內而升至三萬五千左右，照咁睇你可以借多二百六十萬而每月還一萬元黎買新樓。新樓係可以計自住，有出租物業不會對你買入自住樓構成影響，只要你總入息對比負債過到壓力測試便可。
最後一個建議，係你新買自住樓唔好超過2.80mil，同埋你要有四至五十萬cash預防樓價下跌要比銀行追差價之風險。如你將全部cash放哂係股票，當股樓齊跌，你絕對活得不開心! 雖少發生，但有備無患呀朋友!