朗拿度: 諗樣先生本人想你比D意見,我下一部應該點做?本人25歲係酒店做待應生月入$11000左右,股息連TIPS及加埋兼職收入平均可以去到17000。本人有$30萬投資了3隻藍籌股,$15萬人民幣定期,$10萬儲蓄,及一份儲蓄保險5年拎番$10萬3隻藍籌股一路都有息收,一年大約一萬左右,每個月我都會儲$5000作為儲蓄,$2300左右作為儲蓄保險,再想拎$5000儲係作為投資之用大約30歲前希望可以儲到首期買樓,以又會有一筆資金投資緊係股巿到。但女朋友好想快D可以上到車(1-2年內)但近期的樓價真係好難,而且我最怕係以現在的樓價,會買貴左好多。況且係咁急買樓,我的股票就要全部賣掉,實在不忍。可否比少少意見我可以點做?積極儲錢以買樓為主,亦或投資股巿?如果要買樓的話,除左選擇了地區多點留意樓檟外還可做甚麼?
首先多謝咁多識諗既年青人在此發問，你分享自己既諗法有助鼓勵其他年青人。不過年青人(泛指18-30歲，未婚人仕)踏入社會最要去諗既唔係買樓，而係充實自己既專業知識，改善工作態度，累積人脈。買樓始終都要靠銀行借，若非得屋企支持年輕人買樓點都要借錢，而銀行借比你既理據係睇你收入。所以專注工作，得閒諗下點做好份工為上策。當然時下加入政府係個出處，政府工係穩定但只得少部份人收入是穩定地高。如果做左政府工幾年而感沒有出處，可向自己興趣埋手搞一門生意。
亦有人一投身社會就搞生意，希望快手財源廣進。此做法諗樣不支持，成功例子見少。因你未打過工就體驗唔到打工仔心態，當生意一發大你唔係咁易就明白下屬諗咩。仲有未睇過一間公司運作既你，阿Q去諗就話你可以think out of the box! 但對建立公司運作制度都唔熟悉，點去創業呢??
想快好多時會變慢。朗拿度既處境符合哂要特首想幫既人。請你入紙攪個一年5000居屋大抽獎，5月知結果。單人申請要入息低於兩萬同資產不過41萬。二人同行總入息不超四萬與80萬。請攪攪你的資產，18號(下星期五)停收飛。
再講一次居屋有咩好? 就係唔使係比個地價。而家樓貴地價少都百幾萬，你被抽中就可用綠表價買入居屋，以你月入不宜先呈強 ，多利用政府資助及褔利，打穩根基再向第二間樓進發。居屋冇得租比人或套現，除了過幾年後補埋地價先至有得諗。
現時買私樓有點超出你一人能力所限，就用你月入一半即八千五計，此為你供盡數，而推斷出你借盡數為二百五十萬。假設你係九成上會，即樓價為2.5mil/0.9~2.75mil。可惜用2.75mil根本買唔到咩樓。如加上你女仔即可大改善情況，可回覆再同你諗下。
諗樣所見成功之輩有幾個相同地方:
1.講信用(至少對重要既事都會)
2.不會隨便指手鬧人，先想自己做錯什麼
3.珍惜時間
4.絕不拖延(亦即有高既執行力)
5.懂得站在別人處想
其實新婚買樓，好多人會選返近男或女方父母屋企，放工遲都有飯開，第時有小朋友都可照應。至於區份，由於香港可建樓地方少，公屋豪宅有時都係隔兩條街，所以要留意為盡量避開多供應地區，亦小心不要買入實用率偏低之樓宇。底層或事故單位不要胡亂購買，買樓之前三到六個月好去睇定樓。如果你問我，我會積極儲錢攪好第一間樓先去炒股。不可亂咁搵一定要置業既錢去炒股，如果你已決定了人生要置業。
如你連你自己都覺得貴就唔好買。務請參考諗樣提及過之五點，你會發覺你每人行為之不同，會影響了你的運勢，而其中一個小效果係你每月出糧明顯多左。請將多賺之錢存入聯名戶口買下股票，定期，給女友一個安心吧!