📖 ZKIZ Archives

記者不如清潔工 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121128/18082239
上季最高價，歷史上最高價嘅國際拍賣會靚馬，由北京富二代投得，取名「北京金寶」，作價九百萬元，係「甜將」嘅細佬，買入後，一場未跑過，就已經退役，馬主損失慘重。不過北京金寶街係北京至靚至高級會所──香港賽馬會──嘅所在地，馬主家族就係金寶街地王，九百萬啫，唔見咗冇所謂，但由此可見，唔係有錢就可以買入一匹馬王嘅，「雄心威龍」係周歲馬時，幾乎冇人肯要㖭，身價平過「北京金寶」十倍。
近日到馬會食飯，發覺侍應中多咗一啲廣東話口音不純、鄉音未改嘅侍應，想嚟係樓面難請，舊人離開，有新人就要之故。最低工資實施一年後，飲食業叫苦連天，洗碗工人最難聘請，廚神肥佬韜在「爽報」專欄寫：「很多五十多歲的，大部份走去做看更，幸好尚有一群新移民撐住不至於真空，但都要四十五蚊一個鐘！」即係話最低薪食肆工人都有八九千蚊一個月，仲驚請唔到㖭。
呢日在中午飯局，大群傳媒老總在場，傾起最低工資與標準工時，報紙老總Ｔ嘆曰：「請看更過萬元……請洗碗阿嬸近萬元，但我地請新入職記者就只係八九千，幾抵請！」
為何如此？個個老總都話幾間大學有大量新聞系學生，供應不缺，兼逢傳媒對記者需求並非太大，故此新記者供過於求，人工自然冇得升，大學新聞系畢業生如想有較高薪酬，去酒樓洗碗好過！老總Ｃ指呢個係經濟學道理，冇得好講，佢原來係一個新界屋苑嘅業主委員會主席，屋苑管理費幾便宜，每平方呎收一元七角，已有十二年未加過價，但今年因最低工資影響，看更人工急升，兩個游泳池嘅管理維修、水電費一年超過一百萬元，出現赤字，唔加管理費唔得，加到齊頭兩蚊一呎，加三毫子啫，但計百分比就係17.6%，立即俾業主/住客鬧到暈，左丁山笑老總Ｃ：「你地成日批評無良企業加價太狼，你咪又係加價加到如狼似虎！」老總Ｃ唯有苦笑，畢竟業主法團點可以忍受虧本，邊個負責噃，點都係要加價嘅啦！
（代郵：左丁山接獲中文大學哲學系校友會通知，中大哲學系於十二月十六日星期日下午三時正在崇基學院康本國際學術園三號演講廳舉行勞思光教授追思會，敬請師生、校友及各方友好出席，同表哀思。）
PermaLink: https://articles.zkiz.com/?id=40757
Next Page
ZKIZ Archives @ 2019