| ||||||
無綫近期連番出口術阻止增發免費電視牌照，一時批評對手城電未夠班，一時又警告整體廣告收入減少，全行會攬住一齊捱粥水。不過，公眾要求開放免費電視頻道的聲音嗌到拆天，立法會也促請政府明年三月底前發牌。發牌戰如箭在弦，無綫於是盡地一煲，明年狂加廣告費，最高增幅達五成，黃金時段廣告每秒叫價高達三萬二千元，趁最後機會刮多一筆。 上週五，各大廣告代理盡最後努力，跟電視廣播業務總經理鄭善強「講數」。因為無綫已推出二○一三年的廣告價單（rate card），新客仔要賣一個三十秒的廣告，最高價要付九十六萬元，較今年的六十三萬元，貴五成一！熟客如在上週五前確認明年的廣告金額，便可以享有預訂折扣（early bird discount）。鄭善強負責市場營業及業務拓展，來自馬來西亞，讀大學時主修數學，睇數挑通眼眉。「啲客話加價加得好厲害，於是要同無綫講吓攞多啲折扣。」一位廣告代理稱，無綫要視乎客戶投放廣告的金額，才決定折扣多少。 廣告費海鮮價 打開無綫的廣告價單，猶如一份酒樓餐牌，無綫、明珠台、連同高清翡翠台、J2、互動新聞台，再加上電腦平台、手機apps等，簡直盡用每個平台賺錢。「最慘係廣告費好似海鮮價，臨到廣告出街前幾日，我哋會幫個客mark出街時間，TVB呢一刻覆個價俾你，但隨時有其他客戶出高價搶走嗰個時段，我哋要同自己個客講加碼至得。」該廣告代理呻道。公眾經常聽到的廣告套餐，每三十次廣告收取一筆費用。但如果想在最熱播的電視劇集落廣告，就要如競投地皮般鬥出價。「依家有啲產品想喺《大太監》播映時段賣賣告，就要競投。無綫本身有價目表，分十一級價錢。假設你提出第九級價錢競投，如果冇人爭就成交。但現時《大太監》所有廣告時段，全部都去到最貴的第十一級。」無綫明年的價目表增多四級，由第十一級跳到第十五級，差距達三成三，PHD廣告代理黃國柱說，難以替客戶制定預算，「吓吓都話滿晒，跳到最頂級價錢，個客已經失晒預算。」廣告代理商GROUP M行政總裁盧嘉慧也收到廣告客戶呻無綫廣告費加價驚人，「咁做生意係咁喎，講來講去因為冇得揀。」即使牙痛咁聲，在兩台強弱懸殊情況下，黃指舊客的投放額有增無減。特首梁振英本週一出席公眾諮詢會，表示會着實處理免費電視牌照申請。有資深廣告代理推算，無綫趁未發牌前先大幅加廣告費賺一筆，「如果到時真係發免費牌，無綫還有水位可以減價應戰。」 亂插產品入電視劇 除了廣告大幅加價，近年無綫亦利用「置入式廣告」開多條財路。○三年起廣管局放寬《電視廣告守則》，容許在節目中展示產品，間接賣廣告。在無綫工作二十七年、曾經製作過《怒火街頭Ⅱ》、《尋秦記》等高收視節目的劉順安，最近過檔王維基的城市電訊擔任電視部總導演。他表示在無綫拍劇時，為了遷就產品出鏡，曾經鬧出笑話，「劇情係話一個過氣球員，窮到要去執汽水罐。我建議傾可口可樂、百事（贊助）啦，佢（廣告部）話唔得喎，傾咗王老吉。但王老吉踩唔扁喎！」「我曾經拍一場戲背景係麵檔，已經整好晒布景準備拍，監製突然話搵到即食麵商做贊助，個麵檔要整過。但古裝嚟喎，佢哋依然要求拆晒即食麵的包裝袋，將麵餅放喺度，其實冇人知道包麵係咩牌子，只係片尾出番鳴謝贊助品牌。」他明白在商言商，置入式廣告也是無可厚非，但有些安排愈來愈不合情理，「點解要影支豉油近鏡，然後拉wide？點解劇裡面成間雜誌社嘅人都攞住包優之良品嚟食，點解個個演員都攞住《都市日報》睇，仲要報頭向住鏡頭？」藝人李璨琛認為置入式廣告間接剝削藝人酬勞，「唔係我收錢，只係公司收錢，可否分一份俾我？」通訊事務管理局曾經就無綫的置入式廣告太過明顯，作出警告，例如：今年七月的《愛‧回家》，就因為太顯著展示鉅記餅店，令人覺得牽強，違反《電視廣告守則》。一○年也裁定劇集《富貴門》過於突出介紹恒生銀行，但局方在兩宗個案只發出警告及勸諭，在五級罰則中，屬較輕微的第一、二級，無綫一於「你有你勸，我有我搵錢」。 亞視嚇窒客戶 專做嬰兒保健食品的衍生行老闆彭少衍，指近年無綫獨大，商戶落電視廣告沒有選擇可言，「在收視比率太過懸殊情況下，談判時好多方面受制。」衍生曾經是亞視長期廣告客戶，但王征入主後狂加廣告費，令老主顧忍不住要割席，「都唔係話佢哋（亞視）叫價太貴，貴定平冇一個定義，但喺亞視賣廣告可能對我哋效益冇咁大。」亞視自吹收視率跟無綫是六四比？彭說：「不敢認同。」盧嘉慧稱，指亞視接連有負面消息，令無綫廣告收入一面倒，「負面新聞有少少影響，佢哋（亞視）唔係好穩定，好耐冇拍攝好的劇集，令我哋有啲抗拒啦。」其實亞視原本也曾有反轉二奶台命運的機會，例如：九九年大陸劇《還珠格格》，○一年的《百萬富翁》等，亞視當年憑高收視搶去無綫部分廣告客戶。可惜亞視其後因多番易手，股東又有內訌，節目內容及收視均無以為繼。業內人士指免費電視台的廣告分配，無綫佔絕大優勢，跟亞視的比例是九十二比八。連同兩個收費電視台計，免費台佔八成，收費台只有約兩成。無綫所屬的上市公司電視廣播，○八年金融海嘯後盈利稍為下跌，但過去六年盈利一直每年逾十億元。去年的盈利創新高達十五億五千萬元，而今年八月公布的上半年盈利達八億五千萬元，也是歷年之冠。雖然無綫節目受批評，但亞視放軟手腳，沒有自家製作，每日重播節目三次，觀眾流失到無綫。羅兵咸永道娛樂及媒體行業發展報告指出，香港仍然以電視及報章為廣告渠道，合夥人邱麗婷在報告中預料，二○一六年之前，電視及報章廣告的年均複合增長率，將分別達到8.6%和7.1%，整個香港廣告市場的增幅可達7.7 %。 員工滿肚苦水 無綫賺大錢，但員工卻一直不滿待遇。曾為無綫工會主席的劉順安，自○四年創會後，差不多每年與無綫執行董事兼集團總經理李寶安談判，「我攞住本年報俾李寶安睇，你話冇錢賺？但盈利有增長喎。」他稱○三年沙士爆發，公司希望同事共渡時艱，「當年cut咗第十四個月糧，冇人出聲，大家知係沙士，都有簽新合約。公司仲話如果環境好會加番俾同事。加條毛呀？咪凍足八年呀！「最為人詬病係點解台慶只係演員有份抽獎，幕後冇份抽？以前喺海洋皇宮有餐台慶飯，都有幾百份禮物抽吓，怨氣冇咁重，而家汗水就有。演員係你的財產，幕後就唔係？」劉順安坦言離開無綫時，已服務了廿七年，月薪仍只二萬五千元。他過檔城電，人工是舊公司三倍。近期李寶安開倉派庫般宣布加人工，派花紅約一點七五個月薪金，是否怕再有員工跳槽？「李生近期講嘢幾奇怪，以前從來冇咁講過加人工呀，以前從來無話一定有花紅分o架。」他期望李寶安講得出做得到，不要鑽空子只有小部分員工受惠。 王維基新台巡禮 商務及經濟發展局局長蘇錦樑於上週的立法會上，被議員逼到埋牆角，質問他何時發牌，最終立法會通過動議，要求政府在明年三月底前，就發出免費電視牌照作決定。雖然此項動議對政府沒有實際約束力，但仍然令城市電訊的王維基及一眾工作人員帶來一線曙光。他們週二舉行大型節目巡禮，並發布新台徽。王維基週一親自參加彩排，「你一定要來看，我都被佢哋感動咗。」不過，接收到請柬的廣告代理卻仍替城電滴汗，「城電唔知幾時先出到牌，現時出唔到廣告價單，即係冇收入，咁搞法唔知點落去。」記者問王維基發牌不成，有何準備？「我冇plan B，亦唔需要。」現時投資如燒銀紙，一套劇集的投資費過千萬元，他坦言現有二十億元的儲備中，投資回報每年有一、兩億元，可以支持開台。亞視則繼續上演鬧劇，一時報警指王維基盜用亞視資料，一時去信特首辦投訴前任特首辦新聞統籌專員何安達，曾協助城電游說立法會議員支持發放免費電視牌照。何安達已發聲明否認指控，而王維基也反擊入稟控告亞視及盛品儒誹謗。一片亂象，最終犧牲了市民選擇的權利。 | ||||||