📖 ZKIZ Archives

天真審計署 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121117/18068751

上星期六到文化中心聽完中樂團與龔冬健之後，步行到尖沙嘴碼頭搭的士，的士就唔見有嘞，人龍就一大條，排隊企足十五分鐘之後，先至上到的士，但巴士總站啲巴士就多到車等人，半打以上巴士呆等乘客，好彩自己唔係巴士公司股東啫，每架巴士開車時只有十個八個乘客，點為皮呀？香港公共交通便利到不得了，巴士載客能量似乎多過乘客數目，黃昏放工時份，軒尼詩道嘅交通擠塞大部份係載客量少嘅巴士太多所造成，太多巴士在道路上行走當然不利於空氣維持清新。
審計署發表報告，居然大彈環保署廿五年來坐視空氣污染指標不達標，去年路邊二氧化碳及可吸入懸浮粒子全年平均濃度水平不但超出法定上限5.3%及11%，更比世衛標準高出兩倍以上，審計署班會計審計專家仲教埋環保署點樣改善空氣指標──方法之一就係重整巴士路綫，減少重叠性巴士路綫。
不用審計署操心，環保署當然知道問題所在，但推行唔到呢！以我地普通常識，見到巴士導致塞車嘅例子為例，唔駛做過專業顧問，都知道應該重整，削減不必要之巴士路綫。但係政治上，知易行難，好難推動㗎，環保署搵運輸署，運輸署話要諮詢區議會，套用美國政治術語，任何重整巴士路綫方案，去到區議會就係DOA（Dead on Arrival）（一到即死），議員必然反對到底，審計署真係咁叻嘅話，不如教埋運輸署點樣說服區議會。
審計署又彈政府「電影發展基金」為22個電影製作項目，79個電影相關項目提供融資，蝕到眼坦坦，已開支約3800萬元，收回不足45%，其中有兩套戲「戰．無雙」與「贖命」，政府資助601萬，結果收番1769大元咁多！審計署為納稅人肉痛乎？唔好太天真嘞，凡係政府成立甚麼「行業基金」打着扶助行業發展招牌，定會變成該行業嘅撳錢機，呢啲基金遲早蝕清，之後行業公會一定大聲疾呼基金好有成績，冇咗唔得，於是，以為政府應當有為，干預市場有理嘅政客又會繼續支持撥款，當我地納稅人冇到。電影發展基金未曾成立，左丁山已經知道有今日嘅結果，審計署，唔駛咁天真嘞！


PermaLink: https://articles.zkiz.com/?id=39907
Next Page
ZKIZ Archives @ 2019